Prezident Shavkat Mirziyoev 21-oktyabr kúni paytaxtımızdıń Mırza Ulıǵbek rayonında jaylasqan IT-parkke barıp, joybardıń ekinshi basqıshına tırnaq tasın qoyıw máresiminde qatnastı.

Eki jıl aldın 200 million dollar investiciya esabınan bul joybardıń birinshi basqıshı ámelge asırılǵan edi. Derlik 4 gektar maydanda 20-25 qabatlı 6 ofis imaratı hám zamanagóy kongress-xoll qurıldı.
Bul jerde qánigeler ushın barlıq sharayatlar jaratılǵan, perspektivalı startap joybarlardı qollap-quwatlaw maqsetinde inkubaciya hám akseleraciya baǵdarlamaları shólkemlestirilgen. Málimleme texnologiyaları, fintex, logistika, elektron kommerciya, elektron bilimlendiriw, biotexnologiya hám basqa da baǵdarlardaǵı joybarlar tabıslı ámelge asırılmaqta.
Házirgi kúnde “IT-Park” rezidentleriniń sanı 3 mıń 200 kompaniyaǵa jetti, olarda 14 mıńnan aslam qánige jumıs alıp barmaqta. Ótken jılı rezidentler tárepinen 1 milliard 600 million dollarlıq xızmet kórsetilgen bolsa, usı jıldıń juwmaǵı menen bul kórsetkish 2,5 milliard dollardan artıwı kútilmekte.
Eksport kólemi bolsa birinshi márte 1 milliard dollarlıq shekten artıwı rejelestirilgen.
“Ózbekstan – 2030” strategiyasına muwapıq, 300 mıńnan aslam jaslardı málimleme texnologiyaları tarawında joqarı dáramatlı jumıs penen támiyinlew maqset etilgen. Sırt elli ekspertler tek ǵana jasalma intellekt baǵdarınıń ózinde Ózbekstannıń potencialın 10 milliard dollarǵa bahalamaqta.
– Búgin irge tası qoyılıp atırǵan bul iri kompleks aldımızǵa qoyǵan úlken sheklerdi qolǵa kirgiziwde, sonday-aq, investorlar menen Ózbekstan arasındaǵı paydalı birge islesiwdi bunnan bılay da kúsheytiwde áhmiyetli orın iyeleytuǵınına isenemen, – dedi mámleketimiz basshısı.
Joybarǵa bola, “IT-Park” aymaǵı 1,5 esege keńeytiledi. Bul jerde Saudiya Arabstanınıń “Data Volt” kompaniyası menen birgelikte quwatlılıǵı 12 megavatt bolǵan, 150 million dollarlıq data-oray qurıladı. Keyingi basqıshlarda jáne 3 milliard dollar investiciya kirgizilip, quwatlılıq 500 megavattqa jetkeriledi.
Bunnan tısqarı, bul aymaqta jámi 6 imarat – Jasalma intellekt orayı, Kosmos hám keleshek texnologiyaları orayları, eki 20 qabatlı ofis imaratı, sonday-aq, servis hám sawda orayları qurıladı.
Bir sóz benen aytqanda, bul kompleks eń zamanagóy texnologiyalar, innovaciyalar hám bilimlerge tiykarlanǵan “Jasalma intellekt xabı”na aylanadı.
Prezident Shavkat Mirziyoev kapsula qoyıp, “IT-Park” joybarınıń ekinshi basqıshınıń qurılısına rásmiy start berdi.

ÓzA