Ózbekstan Respublikası Prezidenti Shavkat Mirziyoev 15-oktyabr kúni Saudiya Arabstanınıń jetekshi kompaniyalarınıń basshılarınan ibarat abıraylı delegaciya basshılıǵında elimizge kelgen Saudiya Arabstanı Patshalıǵınıń investiciyalar ministri Xolid al-Falihti qabılladı.

Ushırasıw aldınan joqarı mártebeli miyman mámleketimiz basshısına Saudiya Arabstanı Patshası Salmon bin Abdulaziz Ol Saud hám Miyrasxor, Bas ministr Muhammad bin Salmon Ol Saudtıń sálemi hám eń jaqsı tileklerin jetkerdi.
Joqarı dárejedegi kelisimlerdi ámelge asırıw sheńberinde Ózbekstan-Saudiya kóp qırlı birge islesiwin hám keń kólemli sheriklikti bunnan bılay da keńeytiwdiń áhmiyetli máseleleri kórip shıǵıldı.
Nátiyjeli birge islesiw jedel rawajlanıp atırǵanı úlken qanaatlanıwshılıq penen atap ótildi. Barlıq dárejedegi baylanıslar jedellesti. Óz-ara sawda kólemi, tikkeley investiciyalar hám birgeliktegi kárxanalardıń sanı artıp barmaqta. Eki mámleket arasındaǵı aviaqatnawlar kóbeydi.
Birgeliktegi joybarlar portfeli 27 milliard dollarǵa jetti. “ACWA Power” kompaniyası menen energetika tarawında 15 milliard dollarlıq bir qatar iri joybarlar ámelge asırılmaqta.
Kúni keshe Tashkent qalasında ótken Húkimetleraralıq komissiya hám Isbilermenler keńesiniń gezektegi májilisleriniń paydalı nátiyjeleri, olar sheńberinde jańa kelisim hám shártnamalarǵa qol qoyılǵanı joqarı bahalandı.
“Jasıl” energetika, awıl xojalıǵı, elektrotexnika, kóshpes múlk, mámleketimiz aymaqlarında infrastrukturanı modernizaciyalaw hám basqa da tiykarǵı baǵdarlardaǵı joybar hám baslamalardı qısqa waqıt ishinde ámelge asırıwǵa ayrıqsha itibar qaratıldı.

ÓzA