2025-jıl 2-11-oktyabr kúnleri Saudiya Arabstanı Patshalıǵında «Ózbekstan mádeniyat kúnleri» bolıp ótpekte. Bul ilaj Ózbekstan mádeniy miyrasın, kórkem ónerin hám milliy qádiriyatların xalıqaralıq kólemde úgit-násityalawǵa qaratılǵan.

“Ózbekstan mádeniyatı kúnleri” baǵdarlamasınan kórkem óner sheberleriniń koncert baǵdarlamaları, milliy taǵamlar, ónermentshilik buyımları hám mádeniy pavilon kórgizbeleri, siyrek ushırasatuǵın qoljazbalardıń nusqaları, kitap hám milliy ádebiyat úlgileri kórgizbesi sıyaqlı baǵdarlamalar orın alǵan.
Ilaj Ar-Riyad qalasındaǵı Riyadh International Book Fair kompleksi hám Malika Nurah Bint Abdulrahmon universiteti maydanında shólkemlestirilmekte.
“Ózbekstan mádeniyatı kúnleri” dáslep 2011-jıl 25-31-mart kúnleri Saudiya Arabstanı Patshalıǵında shólkemlestirilgen edi. Óz gezeginde, bul mámlekettiń mádeniyat wákilleri elimizde ótkeriletuǵın “Sharq taronalari” xalıqaralıq muzıka festivalı, “Maqom” ánjumanı, “Lázgi” xalıqaralıq ayaq oyın festivalı sıyaqlı abıraylı ilajlarda turaqlı qatnaspaqta.
Ózbekstan Respublikası hám Saudiya Arabstanı Patshalıǵı arasındaǵı birge islesiw keyingi jıllarda izbe-iz rawajlanıp, ásirese, mádeniy-gumanitarlıq tarawda jańa basqıshqa kóterilmekte. Eki mámleket arasındaǵı mádeniy baylanıslardıń huqıqıy tiykarı 1995-jıl 18-noyabrde qol qoyılǵan «Sawda, ekonomika, investiciyalar, texnika, mádeniyat, sport hám jaslar isleri tarawlarında birge islesiw haqqında»ǵı Kelisimge barıp taqaladı.
Házirgi kúnlerde Saudiya Arabstanı Patshalıǵında bolıp ótip atırǵan «Ózbekstan mádeniyat kúnleri» sheńberinde Ózbekstan birinshi márte “Riyadh International Book Fair” festivalında “Húrmetli miyman mámleket” sıpatında qatnaspaqta. Mádeniyat ministri Ozodbek Nazarbekov usı festivalda boldı.
Bul iri xalıqaralıq ilaj Saudiya Arabstanı paytaxtı Ar-Riyod qalasında hár jılı ótkeriletuǵın xalıqaralıq kitap festivalı bolıp esaplanadı hám 10 kún dawam etedi. Onda 2 mıńnan aslam baspa óz ónimleri menen qatnasadı.
Ádette bul festivaldıń húrmetli miymanları sıpatında arab mámleketlerinen mirát etiledi. Sońǵı 10 jıl dawamında birinshi márte Ózbekstan bul festivalǵa húrmetli miyman sıpatında qatnaspaqta. “Riyadh International Book Fair” festivalı tek ǵana kitaplar kórgizbesi emes, al mádeniyatlardıń ushırasıwı, bilim hám ilham deregi bolıp esaplanadı.
Ilaj sheńberinde mádeniyat ministrleri arasında birge islesiw ushırasıwı bolıp ótti. Ózbekstan Respublikası mádeniyat ministri Ozodbek Nazarbekov hám Saudiya Arabstanı Patshalıǵı mádeniyat ministri Badir bin Abdulla bin Muhammad bin Farhan Al Saud mádeniy-aǵartıwshılıq birge islesiwdiń jańa perspektivaların belgilep aldı.
«Ózbekstan mádeniyatı kúnleri» dawam etpekte.

N.Usmonova, ÓzA