Maqam ózbek milliy kórkem ónerinde eń áhmiyetli orın iyeleytuǵın baǵdar. Ol ásirler dawamında áwladtan-áwladqa óziniń ırǵaǵı, tartımlılıǵı ayrıqsha sazı menen jetip kelmekte. Xorezm, Buxara, Tashkent, Ferǵana sıyaqlı jónelislerge iye bolǵan maqam janlı process sıyaqlı rawajlanıw jolın basıp ótti.
On jıllar aldın ol ǵalabalıq ilajlardan, telekanal baǵdarlamaları, mámlekettiń itibarınan shette qalǵanday edi. Ózbekstan Prezidentiniń maqamdı rawajlandırıw hám ǵalaba en jaydırıwǵa qaratılǵan qararlarınan soń hár bir wálayatta maqam orayları shólkemlestirildi. Ferǵana wálayatında bolsa Ózbekstanda birden-bir maqam teatrı dúzildi. “Ullı jipek jolı” Xalıqaralıq maqam muzıkası festivalınıń Marǵilan qalasında ótkeriliwi de áne usı tiykarda jaratılǵan.
Marǵilandaǵı “Dóretiwshiler baǵı”nda bolıp ótip atırǵan maqam seyilinde Túrkiya, Ázerbayjan, Qazaqstan, Qırǵızstan, elimizdiń barlıq wálayatlarınan kelgen maqam sheberleri qatnaspaqta. Dáslep úlken baǵdıń bir neshe saxnalarında olardıń maqam ıqlasbentleri menen dóretiwshilik ushırasıwları hám shıǵıwları boldı. Sońınan waqıya tiykarǵı saxnaǵa kóshti. Íqlasbentler qosıqshılardıń hár bir jeke atqarıwshı, topar bolıp aytqan maqamların qızıǵıwshılıq penen tıńladı. Ásirese, ázerbayjan muǵamı, túrk maqamshılarınıń dártli qosıǵı, Xorezm, Buxara, Ferǵana jolındaǵı nama menen atqarılǵan qosıqlar tamashagóyler kewlinen orın aldı.
Kollegiya qatań tańlaw aldında qalǵan edi. Aqırında jeńimpazlar járiyalandı. Maqam kórkem óneriniń áyyemgi hám biytákirar dástúrlerin qásterlep saqlaw, rawajlandırıw jáne dúnya kóleminde keńnen úgit-násiyatlawǵa qosqan úlken úlesi, sheber atqarıwı hám festivalda belsene qatnasqanı ushın “Ullı jipek jolı” xalıqaralıq maqam muzıka festivalınıń statuetkası, arnawlı diplom hám estelik sawǵaları menen Túrkiya, Ázerbayjan, Qazaqstan, Qırǵızstan jáne Qaraqalpaqstan Respublikaları, Buxara, Jizzaq hám Ferǵana wálayatlarınıń maqam jámáátleri sıylıqlandı.
Saxnaǵa shıqqan shólkemlestiriwshi – Ózbekstan Respublikası Mádeniyat ministrligi hám Ferǵana wálayatı hákimliginiń wákilleri jeńimpazlarǵa tiyislisinshe diplom hám sawǵalardı tapsırdı.
Rásmiy túrde tańlaw juwmaqlandı. Biraq maqam túnlerde Marǵilannıń hár bir kóshesi, máhállesine shekem jetip bardı.

Muhammadjon OBIDOV, ÓzAnıń xabarshısı