Sońǵı jılları xalıq xojalıǵınıń barlıq tarawları sıyaqlı, respublikamızda mádeniyat hám kórkem óner tarawında da úlken ózgeris hám jańalanıwlar júz bermekte. Elimizdiń barlıq aymaqlarında balalar muzıka hám kórkem óner mektepleri boy tiklep, olarda keleshegimiz bolǵan jas áwladlarǵa ózleriniń qızıqqan óner túrleri boyınsha zaman talabına say tálim-tárbiya berip kelinbekte.

Bozataw rayonında jaylasqan 20-sanlı Balalar muzıka hám kórkem óner mektebi de usınday oqıw orınlarınıń biri bolıp, búgingi kúni 223 oqıwshı estrada, xalıq sazları, baqsıshılıq, xoreografiya, súwretlew óneri, ámeliy kórkem óner, fortepiano hám teatr baǵdarları boyınsha óz ustazlarınan tálim almaqta. Mektep sońǵı jılları bilimli hám izleniwsheń kadrlar menen tolısıp barmaqta. Usınday jaslardıń biri Uldáwlet Sársenbaeva bolıp tabıladı.
Jigirmalanshı ásirdiń sońǵı jılında Kegeyli rayonınıń Abat awıl puqaralar jıyını aymaǵındaǵı «Ómir keneges» awılında dúnyaǵa kelgen Uldáwlet ádebiyat hám kórkem ónerge oǵada qızıǵıp ósti. Buǵan álbette, ol tuwılıp, kamalǵa kelgen shańaraqtaǵı ortalıq sebepshi bolsa, kerek.
– Ákem Ańsat Jumatov penen anam Qalbiyke Uzaqbergenovalar da mádeniyat tarawı xızmetkerleri, – deydi Uldáwlet onnan shańaraǵı tuwralı soraǵanımızda. – Ekewi de Nókis qalasındaǵı burınǵı Q. Ayımbetov atındaǵı mádeniyat hám aǵartıw texnikumında bilim alǵan. Anam házir Kegeyli rayonındaǵı mádeniyat bóliminde jumıs isleydi. Óziniń pidayı xızmetiniń arqasında «Qaraqalpaqstanǵa xızmet kórsetken artist» húrmetli ataǵın alıwǵa miyasar bolǵan. Eki qız apam Miyasar hám Dilbar da baqsı. Olardıń úlkeni Nókis qánigelestirilgen mádeniyat hám kórkem óner mektebinde, onnan tetesi Kegeyli rayonındaǵı Balalar muzıka hám kórkem óner mektebinde muǵallim bolıp isleydi. Mine usı ortalıqtıń tásiri shıǵar, men de kishkeneligimnen ala moynaq duwtar shertip, mekteplerde ótkeriletuǵın hár qıylı bayramlarda qosıq ayta basladım. Sol jılları rayonda mektep oqıwshıları arasında ótkeriletuǵın hár qıylı tańlawlarǵa qatnasıp, sıylı orınlardı iyelewge miyasar boldım. Bul bolsa, meniń jáne de kórkem ónerge degen qızıǵıwshılıǵımdı arttırıp, alǵa qaray umtıldıra basladı.
Haqıyqatında da, Uldáwlettegi tábiyǵıy talant hám qızıǵıwshılıq onı jańa maqsetlerge qaray jeteley basladı hám orta mektepti tamamlaǵannan soń Nókis qánigelestirilgen mádeniyat hám kórkem óner mektebine hújjet tapsırdı. Mektep imtixanlarınan súrnikpey ótken ol, bul jerde milliy baqsıshılıq óneri boyınsha Ózbekstan xalıq baqsısı Ǵayratdin Ótemuratov qolında, baqsıshılıq óneriniń álwan túrli sırların úyrendi. Xalqımızdıń súyikli dástanları bolǵan «Ǵárip-Ashıq, «Sayatxan-Hámra», «Qırmandáli» hám «Dáwletiyarbek»ti yadlap, úlken saxnalarda atqara basladı.
– Shákirtim Uldáwlet Sársenbaevadan úmitim kóp, – deydi onıń ustazı Ózbekstan xalıq baqsısı Ǵayratdin Ótemuratov. – Onıń Qońırat rayonında ótkerilgen keshede «Dáwletiyarbek» dástanın tolıq yadlap aytqanına bárekálla dedim. Shákirtimniń bunnan da basqa dástanlardı tolıq atqarıp shıǵıp, xalqımızdıń sıy-húrmetine ılayıq bolıwına tileklespen.
Shınında da Uldáwlet oǵada miynetkesh hám izleniwsheń dóretiwshi. Ol bárqulla óz ústinde izlenip, miynet etedi. Jas baqsınıń islep atırǵan dóretiwshilik isleri bárhama xalıq názerinde. Atap aytqanda, Uldáwlet Sársenbaeva 2023-jılı jaslar arasında ótkerilgen «Yangi Wzbekiston yulduzlari» tańlawında «Jıldıń eń jaqsı jas baqsısı» nominaciyasın jeńip alǵan bolsa, 2025-jılı «Bwzatov FEST» jaslar festivalında baqsıshılıq baǵdarı boyınsha birinshi orın iyesine aylandı hám usı jıldıń 30-iyun sánesinde Jaslar kúni múnásibeti menen Qaraqalpaqstan Respublikası Joqarǵı Keńesi tárepinen «Úmit ushqını» kókirek belgisi menen sıylıqlandı. Sonday-aq, ol usı jılı Ájiniyaz atındaǵı Nókis mámleketlik pedagogikalıq institutın tabıslı tamamlawǵa eristi.
Ulıwma aytqanda, bıyıl Uldáwlet Sársenbaeva ushın oǵada áwmetli keldi, desek boladı. Ásirese, Ózbekstan Respublikası Prezidentiniń «Muǵallimler hám ustazlar kúni» múnásibeti menen tálim-tárbiya sistemasında ayrıqsha órnek kórsetken xızmetkerlerdiń bir toparın sıylıqlaw haqqındaǵı Pármanı tiykarında, «Shuhrat» medalı menen sıylıqlanıwı, oǵan ózgeshe quwanısh hám kúsh-jiger baǵıshladı.
– Meniń azı-kem islegen xızmetimidi inabatqa alıp, mámleketimizdiń eń joqarı sıylıqlarınıń biri menen sıylıqlawı meni sheksiz shadlıqqa bóledi,-deydi Uldáwlet. – Bizge kórsetken joqarı húrmeti ushın húrmetli Prezidentimiz Sh.Mirziyoevqa úlken raxmet aytaman. Aldaǵı waqıtları ózime bildirilgen bul isenimdi tolıq aqlap, shákirtlerimdi ana-Watanımızdı súyetuǵın tereń bilimge iye insanlar etip tárbiyalawǵa barlıq kúsh-jigerimdi jumsayman.
Bizler sóz etken Uldáwlet Sársenbaeva búgingi kúni ómirlik joldası Axmet Berdaxov penen birgelikte, Ábdiqádir hám Ábdiraxman atlı perzentlerdi tárbiyalap kamalǵa keltirmekte. 20-sanlı Balalar muzıka hám kórkem óner mektebi bolsa, onıń ekinshi úyine aylanǵan.

Adilbay Orazov,
Qaraqalpaqstan xabar agentligi sholıwshısı