5-sentyabr kúni Ózbekstan Respublikası Prezidenti Shavkat Mirziyoevtiń Amerika Qurama Shtatları Prezidenti Donald Tramp penen telefon arqalı sóylesiwi bolıp ótti.

Ózbekstan – AQSh strategiyalıq sheriklik qatnasıqların jáne de bekkemlew hám óz-ara paydalı birge islesiwdi keńeytiwdiń ámeliy tárepleri tolıq kórip shıǵıldı.
Sóylesiw aldınan AQSh Prezidenti sońǵı jıllarda Jańa Ózbekstanda ekonomikanı modernizaciyalaw hám xalıqtıń abadanlıǵın arttırıw baǵdarında ámelge asırılıp atırǵan artqa qaytpaytuǵın reformalardı joqarı bahaladı hám qollap-quwatladı.
Mámleketimiz basshısı, óz gezeginde, Prezident Donald Tramptı AQSh hákimshiligi alıp barıp atırǵan ishki hám sırtqı siyasattıń úlken nátiyjeleri menen qızǵın qutlıqladı. Amerika tárepiniń xalıqaralıq hám regionallıq kelispewshiliklerdi tınısh jol menen sheshiw, global qáwipsizlik hám turaqlılıqtı támiyinlewge qosıp atırǵan úlesi hám háreketleri ayrıqsha atap ótildi.
Eki mámleket arasındaǵı kóp táreplemeli birge islesiwdi keńeytiwge ayrıqsha itibar qaratıldı.
Tiykarǵı tarmaqlarda biznes kooperaciyası joybarların alǵa qoyıw hám sawda kelisimleriniń kólemin túp-tiykarınan arttırıw máseleleri kórip shıǵıldı.
Sońǵı jılları óz-ara sawda kórsetkishleriniń turaqlı ósiwi baqlanıp atırǵanın atap ótiw kerek. 2024-jılı tovar almasıw 15 procentke arttı.
Perspektivalı kooperaciyalıq joybarlar portfeli puqaralıq aviaciya, áhmiyetli mineral resurslar, elektrotexnika sanaatı, energetika, awıl xojalıǵı, sanlı texnologiyalar, qarjı, innovaciyalar, bilimlendiriw hám kóplegen basqa da baǵdarlardı qamtıp alǵan.
Usı ayda AQShtıń jetekshi kompaniya hám shólkemleri menen uzaq múddetli hám turaqlı sheriklik baylanısların jolǵa qoyıw maqsetinde bir qatar eki tárepleme ushırasıw hám sóylesiwler ótkeriletuǵını atap ótildi.
Bunnan tısqarı, qáwipsizlik tarawında, bárinen burın, terrorizm, ekstremizm hám nızamsız migraciyaǵa qarsı gúresiw baǵdarında nátiyjeli birge islesip kelinbekte.
Mádeniy-gumanitarlıq almasıwlar keńeymekte. Tashkentte AQShtıń jetekshi joqarı bilimlendiriw mákemeleriniń filialları tabıslı jumıs alıp barmaqta.
Kelesi jılı AQShta bolıp ótetuǵın futbol boyınsha jáhán chempionatında Ózbekstan milliy saylandı komandası birinshi márte qatnasatuǵını qanaatlanıwshılıq penen atap ótildi. AQSh jetekshisi futbol saylandı komandamızǵa shın kewilden áwmet tiledi.
Telefon arqalı sóylesiw waqtında mámleket basshıları áhmiyetli xalıqaralıq máseleler, sonıń ishinde, Oraylıq Aziya mámleketleri hám AQShtıń “S5+1” formatındaǵı regionallıq birge islesiwin tereńlestiriw boyınsha da pikir alıstı.
Mámleketimiz basshısı Prezident Donald Tramptı ózi ushın qolaylı múddette Ózbekstanǵa rásmiy sapar menen keliwge mirát etti.
Ámeliy birge islesiw boyınsha joybar hám baǵdarlamalardı alǵa qoyıw maqsetinde joqarı dárejedegi sóylesiwlerdi dawam ettiriwge kelisip alındı.
Ózbekstan Respublikası Prezidenti Shavkat Mirziyoev hám AQSh Prezidenti Donald Tramptıń telefon arqalı sóylesiwi ashıq, konstruktivlik hám doslıq ruwxında ótti.

ÓzA