Ózbekstan Respublikası Prezidenti Shavkat Mirziyoev Pekin qalasına rásmiy saparı sheńberinde 3-sentyabr kúni Tyananmen maydanında Ekinshi jer júzilik urıstaǵı Jeńistiń 80 jıllıǵına baǵıshlanǵan saltanatlı áskeriy paradta qatnastı.

Ilajǵa jigirmadan aslam mámleket basshıları hám wákilleri, sonıń ishinde, Rossiya, Belarus, Ázerbayjan, Qazaqstan, Qırǵızstan, Mongoliya, Tájikstan, Túrkmenstan, Iran, Vetnam, Egipet hám basqa da mámleketlerdiń jetekshileri qatnastı.
QXR Baslıǵı Si Czinpin óziniń shıǵıp sóylegen sózinde búgingi sharayatta tariyxıy estelikti qásterlep saqlaw, tınıshlıqtı saqlaw hám ádillikti támiyinlew áhmiyetli ekenligin atap ótti.
Paradqa Qıtay xalıq azatlıq armiyasınıń 45 bólimi qatnastı. Qıtay qorǵanıw sanaatı tárepinen islep shıǵarılǵan raketa sistemaları, tankler, aviaciya texnikası hám ushıwshısız ushıw apparatlarınıń eń sońǵı úlgileri kórsetildi.
Bunday paradlar 1949-jıldan berli Pekinde ótkerilip kelinbekte, qurallı kúshlerdiń sońǵı úlken kórgizbesi bolsa 2019-jıl 1-oktyabrde bolıp ótken hám onda 15 mıńǵa shamalas qatnasıwshı qatnasqan.
Ózbekstan Respublikası Prezidentiniń Pekin qalasındaǵı saltanatlı ilajlarda qatnasıwı mámleketimizdiń xalıqlar arasındaǵı doslıq hám óz-ara túsinisiwdi bekkemlew, tınıshlıq, turaqlı rawajlanıw hám abadanlıq jolında regionallıq hám globallıq dárejede konstruktivlik sóylesiwdi rawajlandırıwǵa qaratılǵan izbe-iz sırtqı siyasatınıń gezektegi tastıyıǵı boldı.

ÓzA