Хитойнинг илғор технологик стартапи EHang 2030-йилга келиб мамлакат осмонида парвоз қилувчи йўналишли таксилар ҳаракатлана бошлашига ишонч билдирмоқда. Бу ҳақда China Morning Post нашри хабар берди.

EHang компаниясининг фикрича, беш йил ичида нафақат технология, балки зарур инфратузилма ҳам етарли даражада ривожланади. Шу билан бирга, айрим йирик шаҳарларда парвоз қилувчи таксилар индивидуал буюртмалар асосида ҳам хизмат кўрсатишга тайёр бўлади.

Компаниянинг дрон асосида ишлаб чиқилган EHang 216 номли учувчисиз ҳаво воситаси ҳозирда синовдан ўтказилмоқда. Мазкур транспорт воситаси икки кишини олиб уча олади ва автоматик бошқарув тизими билан жиҳозланган.

Технологик жиҳатдан бу янгилик Хитойда урбан мобилитетни тубдан ўзгартириши мумкин. Парвоз қилувчи таксилар тирбандлик муаммосини камайтириш, тезкор ва экологик тоза транспорт воситаси сифатида жорий этилиши кутилмоқда. Бироқ бу технологиянинг кенг оммага татбиқ этилиши хавфсизлик, ҳуқуқий тартибга солиш ва ижтимоий қабул қилиш каби қатор муҳим босқичларни талаб қилади.

Шу билан бирга, EHang компанияси бошқа мамлакатлар билан ҳам ҳамкорликни йўлга қўйиш ниятида. Бу эса келажакда парвоз қилувчи таксилар глобал транспорт тизимининг бир қисмига айланиши мумкинлигини кўрсатмоқда.

Мадинабону Насриева, Улуғбек Тўхтаев, ЎзА