– Ишсизлик баҳона эмас, агар қўлингда ҳунаринг бўлса, – дейди биз билан суҳбатлашган хўжалик устаси Арман Шержанов. «Бекорчидан Худо ҳам безор,» деганидек у штатли ишим йўқ деган баҳона билан бекор ётишни ўзига эп кўрмай, ҳунармандчилик қобилияти билан оиласини тебратиб, буюртмачиларнинг ҳам олқишини олиб келмоқда.

Унинг ҳунармандчиликка бўлган қизиқиши ўзи туғилиб ўсган Кегейли аҳоли пунктидаги мактабда ўтган ўқувчилик давридан бошланган. Меҳнат дарсида ёғочдан ҳар хил буюмлар ясашга ўргатган устозининг ҳар бир сўзи унга қизиқиш бағишларди. Қушларнинг уясини ёғочдан ясаб келганида у муаллимидан кўп мақтов сўзлар эшитган. Мана энди, бу санъат унга ҳаёт озиғи бўлиб хизмат қилмоқда.

– Буюртмачиларнинг таклифига кўра уй-рўзғор буюмларини ясаб бериб юрдим. Лекин ўзимнинг қизиқишим кемасозлик бўлгани учун бор кучим билан сувенирлар ясаб, харидорларга сотиб келяпман. Асосан буюртма бўйича ишлайман. Беш юз мингдан бошлаб, бир, бир ярим миллионгача ҳажмдаги кемаларни ясаб, ўз эгаларига топшираман, – дейди Арман.

Ҳозирги кунда кема ясатадиган буюртмачилар сони ошган. Турли байрамларга, туғилган кунларга совға сифатида топшириш учун харидорлар доимо у ясаган кемаларга қизиқиши юқори. Шунингдек, унинг бу санъатига қизиқиш билдирган қўшни Қозоғистон Республикаси ва вилоятлардан ҳам буюртмалар келиб тушмоқда. Хоразм вилоятига ҳам бориб, тўрт ой давомида шартнома асосида ҳунармандчилик фаолиятини давом эттириб, кўплаб буюртмачиларнинг талабига кўра кемалар ясаб бериб қайтди. Шунингдек, у ҳунармандлар кўргазмаларига ўз ҳунармандчилик буюмлари билан қатнашиб келмоқда.

Яқинда Мўйноқ туманида бўлиб ўтган байрам кўргазмасида унинг ясаган сувенир кемаларига сайёҳларнинг ҳам қизиқиши ортган. Туманда ҳар жойда ижарага жой олиб ишлаб юрган ҳунарманд А.Шержоновга туман раҳбарлари томонидан ёрдам берилиб, яқинда тумандаги 19-сонли мактабдан хона ажратилди. Уста ҳунарманд у ерда ўзининг дастгоҳларини қуриб, мактаб ўқувчиларини ҳунармандчиликка тайёрлаб ўргатмоқда.

-Дарсдан бўш вақтларимда шу ерга келиб устозим Армон акадан ёғочдан буюм ясаш сирларини ўрганяпман. Унинг ясаган кемалари менга жуда ёқади. Яқинда мен ҳам ўз кемамни ясашни режалаштиряпман, – дейди 19-сонли мактабнинг 10-синф ўқувчиси Бегис Муратбаев.

Арман шунингдек спортнинг миллий кураш тури билан болалигидан шуғулланиб келган. У мактабда ўқиб юрган кезларида миллий кураш ва дзю спорт тури бўйича ўтказилган республика чемпионатларида фахрли ўринларни эгаллаган. Айни пайтда спорт соҳаси бўйича ҳам шогирдлар тайёрланмоқда. Ўғли ҳам кураш спорт тури бўйича ҳозирги вақтда мусобақаларда қатнашиб яхши ютуқларга эришмоқда. У ўзи ясаган кема сувенирларини мусобақаларда чемпионларга совға сифатида топшириб келмоқда.

Келажакда иш кўламини кенгайтириб, кўплаб шогирдлар тайёрлашни мақсад қилган Арманнинг ҳар куни буюртмачиларнинг кўнглидагидек қилиб кемалар ясаш билан банд бўлмоқда. Ҳар бир кемани ясаш учун ўн, ўн беш кун вақт кетади. Уйқусиз тунлар ўтади. Лекин у афсусланмайди. Сабаби, унинг болаликдаги орзулари ушалиб, халқнинг кўнглидан чиқиб, қўлига эса меҳнатига яраша даромад тушмоқда. Бугун у ўзи ясаган қанчадан-қанча кемаларнинг «капитани».

Г.Турдишова, Қорақалпоғистон ахборот агентлиги