Nókis rayonı «Diyqan arna» mákan puqaralar jıyını aymaǵında jasawshı Miyrigúl Allambergenova máhálledegi hákim járdemshisi arqalı jeńilletilgen 5 mln sum kredit alıp, úy sharayatında qoyan baǵıwdı jolǵa qoydı.

-Burın shuǵıllanıp kórmegenlikten, dáslepki waqıtta bul qalay bolar eken dep on qoyan alıp, shańaraq aǵzalarımız benen birgelikte baǵıp baslaǵan edik. Mine, nátiyje jaman emes. Kútimniń nátiyjesinde házirgi waqıtta qoyanlarımızdıń sanı eliwge jetti. Kóbeyiwi de jaqsı eken, hár ana qoyan 8,10 ǵa shekem gójekleydi eken. Shóp, dán, geshir, kapustanıń qabıǵı, qullası onsha tańlamay jey beredi. Tez kóbeyip hám dáramatı jaqsı bolǵan qoyanshılıq penen shuǵıllanıwdı basqalarǵa da másláhát etken bolar edim,-deydi M.Allambergenova.
Qánigelerdiń anıqlawınsha, kuramı hám paydalı qásiyetleri boyınsha qoyan gɵshi basqa gɵsh túrlerinen ajıralıp turadı. Sonday-aq, qoyan gɵshi birinshi nomerli dieta gɵsh esaplanadı.
Sonlıqtanda, Sayxunabad tájiriybesi boyınsha bul baǵdardaǵı jumıslardı aymaqlarda rawajlandırıw ilajların ámelge asırıwdıń zárúrligi bar. Óytkeni, isbilermenliktiń bul baǵdarı xalqımız ushın paydalı azıq bolıwı menen birge, dáramatlı talap esaplanadı.

Qaraqalpaqstan xabar agentligi