1732-jılı (bunnan 292 jıl aldın) – Orta Aziya kartasın dúzgen grek sayaxatshısı hám kartografı Vasilio Vatache Londonǵa barıp bul kartanı Korollik geografiya jámiyetine tapsırdı.

Tariyxshı Feruza Rustamovanıń atap ótiwinshe, sayaxatshı Badaxshan kánlerinen tabılǵan hám Buxara xanınan satıp alǵan eki bahalı tas, birinshisi 830 karatlıq, ekinshisi 870 karatlıq bahalı tastı da usınǵan. Onıń sózlerine bola, Rossiya patshası usı bahalı taslar ushın 7 mıń funt sterling beriwdi usınıs etken. Biraq sayaxatshı razı bolmaǵan.
Jámiyet xatkeri Didechi sawǵa ushın sayaxatshıǵa minnetdarshılıq bildirip, oǵan Rossiya patshası usınıs etken bahadaǵı qarjı tólenetuǵının aytadı. Sol jıldıń ózinde Vasilio Vatache usınıs etken karta qánigege úyrenip shıǵıw ushın tapsırıladı, keyin bolsa Korollik geografiya jámiyetiniń kartograf ilimpazı Djon Seneks tárepinen basıp shıǵarıladı. Bul karta Orta Aziyanıń Ullı Britaniyada basıp shıǵarılǵan birinshi kartası boldı.
Sayaxatshı Vasilio Vatacheniń Evropa iliminiń aldına qoyǵan tiykarǵı oylap tabıwı sonda, ol Orta Aziyada Aral teńiziniń bar ekenligin Evropaǵa birinshi márte tanıttı. Oǵan shekem Aral teńizi de Kaspiy teńiziniń bir bólegi yamasa buǵazı dep esaplanǵan. Ol Aral teńizin úsh márte piyada aylanıp shıǵıp, onı óz kartasına túsirgen.

Qaraqalpaqstan xabar agentligi