Янги йил арчаси бир йилда ўн метрга "ўсди"

Сурхондарё вилоятида ҳам Янги йил байрамини юқори савияда ўтказиш учун пухта ҳозирлик кўрилмоқда.

Маҳалла, кўча ва хиёбонлар, корхона, ташкилот ва муассасалар байрамона безатилиб, ранг-баранг тунги чироқлар ўрнатилаётир. Байрамолди ярмаркалари ташкил этилиб, озиқ-овқат маҳсулотлари арзон нархларда аҳолига таклиф қилинмоқда. Жойларда байрам тадбирларининг тинч-осойишта ва кўтаринки руҳда ўтиши учун ёнғин, йўл-транспорт ва бошқа хавфсизлик чоралари белгилаб олинган.

3.jpg

Термиз шаҳридаги Болажон боғи ёнида ўрнатилган ва байрамона безатилган 33 метрли арча, айниқса, болалар ва ёшларга ўзгача завқ улашмоқда.

4.jpg

– Ўтган Янги йил байрами арафасида ҳам Термизга келган эдим, – дейди деновлик Ш.Маннопов. – Ўшанда бу майдонга ўрнатилган арчанинг бўйини 20 метрдан баланд дейишган эди. Бу йил эса 30 метрдан ортиқ. Қойил-э, бир йилда ўн метрдан кўпроқ «ўсибди»! Улкан арча Янги йил байрамига ўзгача файз берар экан.

 

Холмўмин Маматрайимов, Фарҳод Абдурасулов (сурат), ЎзА