Мазкур танлов Ўзбекистон Республикаси Халқ таълими вазирлиги тизимидаги умумий таълим муассасалари ўқитувчилари ўртасида анъанавий тарзда ўтказилади. Жорий йил ҳам “Йилнинг энг яхши фан ўқитувчиси – 2019” республика танловига старт берилди.
Ташкилотчилар томонидан шаффофликни таъминлаш ва кенг оммани жараёнга жалб этиш мақсадида танлов низомига бир қатор ўзгартиришлар киритилди. Унга кўра, олий маълумотли, камида 3 (уч) йиллик педагогик стажли, иккинчи ва ундан юқори малака тоифасига эга бўлган ўқитувчилар танловда қатнашади. Иштирокчилар жорий йилнинг 18 мартидан 5 апрелига қадар Халқ таълими вазирлигининг расмий веб-сайтида ташкил этилган саҳифада онлайн рўйхатдан ўтади.
Шунингдек, ҳужжатлар сони 10 тадан 5 тага қисқартирилди ва барчаси электрон шаклга ўтказилди. Шартлар 5 тадан 3 тага қисқартирилди. Танловни адолатли ўтказиш учун ҳакамлар ҳайъати таркибига барча ҳудудлардан тенг миқдорда вакил олинади.
Танловнинг республика босқичи ғолиблари мос равишда энг кам иш ҳақининг 15, 12, 8 баравари миқдорида бир марталик пул мукофоти билан тақдирланади. Амалиётга татбиқ этилган бу ўзгаришлар ўзини оқлайдими? Танлов жараёнида буни кузатиш ва баҳолаш имкониятига эга бўлиш мумкин.
Барно Мелиқулова, ЎзА