Қорақалпоғистон Республикасининг барча туман ва шаҳарларида Бош қомусимизнинг 26 йиллиги муносабати билан “Ўзбекистон ёшлари – янги замон бунёдкорлари!” шиори остида ёшлар фестивали ўтказилди.
Ўзбекистон ёшлар иттифоқи Қорақалпоғистон Республикаси кенгаши томонидан ташкил этилган фестиваль давомида “Ёшлар билан очиқ суҳбат”, “Карьера куни”, “Келажак бунёдкорлари”, “Муваффақиятга эришиш сирлари”, “Агросаёҳат”, “Бизнес саёҳат” каби лойиҳалар, “Фарзандлик бурчим” номли патронаж ёшлар лойиҳаси, “Ёшлар спартакиадаси” спорт мусобақалари, “Ўзбекистон Қуролли Кучлари – матонатли ёшларнинг ҳаёт мактаби” тушунчасини тарғиб қиладиган оммавий тадбирлар, “Мустаҳкам оила сири”, “Келажак фермери”, “Музейга саёҳат” сингари қатор тадбирлар ташкил қилинди.
– Фестиваль доирасида ўтказилган 425 та тадбирда 15 мингдан ортиқ ёшлар қатнашди, – дейди Ўзбекистон ёшлар иттифоқи Қорақалпоғистон Республикаси кенгаши раиси А.Дониёров. – Хусусан, “Карьера куни” лойиҳаси доирасида ёшларни иш билан таъминлаш масалалари кўрилиб, унда кўплаб ёшларнинг бандлиги таъминланди. “Келажак бунёдкорлари” лойиҳаси доирасида эса 2016-2018 йилларда турли даражадаги давлат мукофотларига эга бўлган ёшларнинг ишларини тенгдошлари ўртасида тарғиб қилиш мақсадида кўплаб учрашувлар ўтказилди. Тажрибали тадбиркорлар иштирокида ўз бизнесини бошлаш истагида бўлган ёшлар учун “Муваффақиятга эришиш сирлари” мавзусида маҳорат дарслари ташкил этилди.
“Ёшлар спартакиадаси” доирасида спортнинг марафон, мини-футбол, баскетбол, волейбол, шахмат-шашка, стол тенниси, бадиий гимнастика турлари бўйича 51 та спорт мусобақаси ўтказилиб, уларда 4 минг 600 дан зиёд ёшлар иштирок этди.
Фестиваль доирасида Нукус шаҳар “Ёшлар маркази”да ташкил этилган “Бўлажак келин-куёвлар инновацион мактаби”да “Мустаҳкам оила сири” мавзусида давра суҳбати ўтказилди. Унда соҳа вакиллари, ёш оилалар вакиллари қатнашди. Шунингдек, ижтимоий фаол 48 ёш оилага Нукус шаҳрида янгидан қурилган “Ёшлар уйлари” тантанали равишда топширилди.
Тадбир якунида санъат усталари иштирокида гала-концерт намойиш этилди.
Есимхон Қаноатов, Мақсад Ҳабибуллаев (сурат), ЎзА
