Кеча ижтимоий сайтларда футбол бўйича Ўзбекистон миллий терма жамоаси билан 3+1 шаклида тузилган шартномага кўра иш олиб бораётган Эктор Куперга Испаниянинг “Уэска” клубидан таклифлар бўлаётганлиги ҳақидаги хабарлар тарқалди. Уларда ёзилишича Испаниянинг “Марcа” нашри “Уэска” жамоаси бош мураббийи Лео Франко ўрнини тез кунда Эктор Купер эгаллаши ҳақидаги хабарнинг чоп этилганлиги изоҳланади. Эмишки, яқиндагина Ўзбекистон МТЖ билан узоқ муддатли шартнома имзолаган аргентиналик мутахассис 20 та жамоа орасида 19-ўринда бораётган клубда қутқарувчи вазифасини ўташи керак. Испан манбаси Куперни “Валенсия”да фаолият олиб боргани ва Миср билан ЖЧда иштирок этганини тилга олган.

Худди шу масала билан Ўзбекистон футбол ассоциацияси матбуот хизматига мурожаат этдик. Уларнинг жавоб беришича Эктор Куперга ҳеч қаердан, ҳеч кимдан ва ҳеч қанақа таклиф бўлмаган, энг муҳими, аргентиналик мутахассис фаолиятини Ўзбекистон билан боғлаган ва миллий терма жамоамизни Осиё Кубогига тайёрлашда давом этади.

Маълум бўлишича, бу каби хабарлар айнан “Марcа” нашрининг мустақил ижоди эмас, аксинча, улар ҳам мамлакатда ижтимоий тармоқлардан бири сифатида (айнан футбол бўйича эмас) фаолият юритаётган “Onda Cera” сайтидан олинганлигига гувоҳ бўлдик. Мазкур сайт эса Эктор Купер билан боғлиқ аниқ таклиф бермаган. Балки вазиятни таҳлил қилгандек бўлган, холос.

Хабарингиз бор, миллий терма жамоамиз 13 ва 16 октябрь кунлари Тошкентда КХДР ҳамда Қатар миллий терма жамоалари билан халқаро ўртоқлик учрашувларини ўтказади.

Эктор Купер ушбу учрашувларга тайёргарлик кўриш мақсадида 6 октябрдан ўқув-машғулот йиғини ташкил этишни режалаштирган. Йиғинга аввалги ўйинларга чақирилмаган янги номзодларнинг борлиги ҳам кўпчиликни қизиқтириши турган гап. Номзодлар билан эса кейинроқ таништирамиз.