Ноодатий ихтиролари билан таниқли бўлаётган нукуслик тиниб-тинчимас тадбиркор Рашид Қартбаев энди саҳро қўйнига тарвуз эка бошлади. Тадбиркорнинг ушбу ихтироси ҳам муваффақиятли бошланди.
Аввал хабар қилганимиздек, 7 сотих ерда 70 тонна тарвуз етиштиришни режалаштираётган Рашид Қартбаев энди бепоён саҳро бағридан ҳам унумли фойдаланиш мумкинлигини исботломақчи, яъни у чўлистонликка тарвуз етиштириш тажрибасини синовдан ўтказмоқда. Муҳими шундаки, тажриба синовлари дастлабки натижаларини бера бошлади.
Бу усул қандай амалга оширилаётгани билан қизиқдик.
– Бунинг йўли оддий: қум ва табиий ўғит аралашмаси челакка ва халтага жойлаштирилиб, ерга кўмилади ва устидан сув қуюлади, – дейди тадбиркор Р.Қартбаев. – Қумни уч жойдан танлаб олдик. Дарёнинг ултонидан, саҳро қуми ва оддий тўпроқ. Энг яхши натижа бераётгани – дарёнинг ултонидаги қум бўлиб чиқди. У сув ва ўғитни кам талаб қилади ҳамда ўсимлик 3 кун ичида бўй кўрсатяпти.
– Президентимизга минг раҳмат, мана бугун бизга ўхшаган тадбиркорларга кенг йўл очилди, – дея қўшимча қилади Рашид оға. – Фақат ишла, ҳаракат қил, ярат, юрт равнақига ҳисса қўш деяптилар. Бу бизга куч беради.
Р.Қартбаев Кегейли туманининг Жузимбоғ қишлоғида 32 га ер майдонда тарвуз экишнинг яна бир усулини синовдан ўтказмоқда.
Тадбиркорнинг фикрига кўра, хохлаган киши ўз томорқасидан миллионлаб даромад кўриши мумкин.
Ҳар хил инновацион ғоялари билан кенг жамоатчилик назарига тушаётган ихтирочи шу кунгача ўзи ихтиро қилган топилмаларнинг деярли ҳаммасини амалда исботлаб келган.
Унинг текстил чиқиндиларидан ясаётган суюқ гулқоғозлари эса харидоргир маҳсулотга айланмоқда.
Эслатиб ўтамиз, унинг кузда тўкилган ёпроқлардан экологик уй қуриш бўйича ташаббуслари ҳам ижтимоий тармоқларда кенг муҳокамага сабаб бўлганди.
Қуйида тадбиркорнинг саҳрода тарвуз етиштириш бўйича тажриба синовидан фотолавҳаларни эътиборингизга ҳавола қиламиз.
