Ózbekistan Respublikası Prezidentiniń pármanı

Respublikanıń turizm potencialın, birinshi gezekte, investiciyalardı belsene tartıw, tarawǵa innovaciyalıq ideyalar menen texnologiyalardı engiziw, sonday-aq, eldiń bay tábiyǵıy, mádeniy hám tariyxıy miyrasınıń bar resursları menen imkaniyatlarınan hár tárepleme paydalanıw esabınan rawajlandırıw ushın bunnan bılay da qolaylı sharayatlar jaratıw maqsetinde:

2018-jıl 10-fevraldan baslap Izrail mámleketi, Indoneziya Respublikası, Koreya Respublikası, Malayziya, Singapur Respublikası, Túrkiya Respublikası hám Yaponiya puqaraları, sonday-aq, Ózbekistan Respublikasına turaqlı aviaqatnawlardı ámelge asıratuǵın shet el aviakompaniyaları hawa kemeleri ekipajınıń aǵzaları ushın Ózbekistan Respublikası aymaǵına kirgen kúnnen baslap 30 kúnlik múddetke vizasız rejim belgilensin.
2018-jıl 10-fevraldan baslap puqaraları ushın Sırtqı isler ministrligine turistlik vaucherdi yamasa Ózbekistan Respublikasına mirát etip atırǵan yuridikalıq yamasa fizikalıq shaxstıń múrájatın usınıwǵa baylanıslı talap biykar etiliwin hám hújjetlerdi qabıllaw kúni esapqa alınbaǵan halda eki jumıs kúni dawamında vizanı rásmiylestiriwdi názerde tutatuǵın turizm vizaların rásmiylestiriwdiń ápiwayılastırılǵan tártibi engiziletuǵın eller dizimi 1-qosımshaǵa muwapıq tastıyıqlansın.
Ózbekistan Respublikası Ministrler Kabineti janındaǵı Mámleketlik personallastırıw orayı Sırtqı isler ministrligi, Turizmdi rawajlandırıw boyınsha mámleketlik komiteti, Qarjı ministrligi hám basqa da mápdar ministrlikler hám vedomstvolar menen birgelikte 2018-jıl 1-iyulden baslap elektron kiriw vizaların beriw sisteması iske qosılıwın támiyinlesin.
Ózbekistan Respublikası Turizmdi rawajlandırıw boyınsha mámleketlik komiteti janındaǵı «Miliy turizm ónimin úgit-násiyatlaw orayı» MUK Ózbekistan Respublikası Turizmdi rawajlandırıw boyınsha mámleketlik komiteti janındaǵı «Milliy PR-orayı» MUK etip qayta shólkemlestirilsin, oǵan respublikanıń turizm potencialın úgit-násiyatlawdı shólkemlestiriw boyınsha wazıypalar júklensin.
Ózbekistan Respublikası Turizmdi rawajlandırıw boyınsha mámleketlik komiteti byudjetten tısqarı Turizm tarawın qollap-quwatlaw qorı qarjıları esabınan:

2018-jıldıń 1-martına shekem «Milliy PR-orayı» MUK ushın zamanagóy hám joqarı texnologiyalı súwretke alıw úskenelerin, avtotransport quralların, sonıń ishinde, joqarı ótiw qábiletine iye bolǵan avtotransport quralların satıp alıwdı óz ishine alatuǵın zárúr materiallıq-texnikalıq bazanıń jaratılıwın, sonday-aq, ijara tólemisiz zárúrli bólmeler ajıratılıwın;

2018-jıldıń 1-apreline shekem dóretiwshilik hám súwretke alıw toparların, sonıń ishinde, shet elli qánigelerdi tartıw jolı menen qáliplestiriwdi, sonday-aq, olardı támiyinlew hám materiallıq jaqtan xoshametlew ushın zárúrli qarjılardıń ajıratılıwın;

qáliplestirilgen dóretiwshilik hám súwretke alıw toparlarınıń scenariylerin hám súwretke alıw jumıslarınıń koncepciyasın islep shıǵıw, respublika aymaqlarına dórtiwshilik ekspediciyalar menen xızmet saparları, sonday-aq, elimizdiń turizm potencialın úgit-násiyatlaw boyınsha materiallardı tayarlaytuǵın basqa da dóretiwshilik toparlardıń jumısın turaqlı tiykarda, sonıń ishinde, autsorsing arqalı qarjılandırılıwın támiyinlesin.

Ózbekistan Respublikası Turizmdi rawajlandırıw boyınsha mámleketlik komiteti, Xalıq bilimlendiriw ministrligi, Joqarı hám orta arnawlı bilimlendiriw ministrligi, Ózbekistan jaslar awqamı, Ózbekistan Kásiplik awqamları federaciyası keńesi, Ózbekistan Hayal-qızlar komiteti, Ózbekistan «Máhálle» qayırqomlıq jámiyetlik fondı hám Ózbekistan veteranlarınıń sociallıq jumısın qollap-quwatlaw «Nuraniy» qorınıń tómendegi xalıq qatlamları ushın respublika aymaqları boylap turizm-ekskursiya túrleri shólkemlestiriliwin názerde tutatuǵın «Ózbekistan boylap sayaxat et!» ishki turizmdi rawajlandırıw baǵdarlamasın (keyingi orınlarda – Baǵdarlama) ámelge asırıw haqqındaǵı usınısı maqullansın:
bilimlendiriw mákemeleriniń oqıwshıları ushın – kanikul dáwiri hám dem alıs kúnlerinde;

shólkemlerdiń xızmetkerleri ushın – dem alıs kúnlerinde, ulıwma milliy bayramlar hám dem alıs kúnlerinde, ásirese, turizm máwsiminiń tómen dáwirinde;

xalıqtıń sociallıq ázzi qatlamları, pensionerler, urıs hám miynet veteranları ushın – sanatoriy-kurortlarda dem alıwdan belsene paydalanǵan halda jıl dawamında;

kekseler, jas shańaraqlar, puqaralar jıyınlarınıń belsendileri, hayal-qızlar hám basqa da jámiyetlik birlespelerdiń wákilleri ushın – turizm máwsimi tómen dáwirde.

Ózbekistan Respublikası Turizmdi rawajlandırıw boyınsha mámleketlik komiteti:
bir ay múddette Baǵdarlamanı ámelge asırıw boyınsha ámeliy ilajlar rejesin tastıyıqlaw ushın kirgizsin;

Sawda-sanaat palatası, Ózbekistan Respublikası Menshiklestirilgen kárxanalarǵa kómeklesiw hám básekilikti rawajlandırıw boyınsha mámleketlik komiteti menen birgelikte bir ay múddette turizm xızmetlerin kórsetiwshi isbilermenlik subektleriniń sapa, qáwipsizlik hám bahalardıń básekige shıdamlılıǵı normalarınan kelip shıǵıp Baǵdarlamada qatnasıw jáne olardıń Baǵdarlamanı ámelge asırıw sheńberinde óz-ara birge islesiw mexanizmlerin belgilesin;

2018-jıldıń 1-martına shekem óziniń rásmiy veb-saytında Baǵdarlamada qatnasıw shártleri, turizm-ekskursiya baǵdarlamaların shólkemlestiriw mexanizmleri haqqındaǵı, birge islesiwshi shólkemler hám olar tárepinen kórsetiletuǵın xızmetlerdiń dizimin hám basqa da zárúrli maǵlıwmatlardı jaylastırsın.

Ózbekistan Respublikası Sırtqı isler ministrligi mápdar ministrlikler hám vedomstvolar menen birgelikte Ózbekistan Respublikasınıń dúzilgen xalıqaralıq shártnamaların usı Pármannıń talaplarına muwapıq qayta kórip shıǵılıwın támiyinlesin.
Tómendegiler:
a) tiykarǵı jumıs túri tematikalıq qıyabanlar xızmetlerin shólkemlestiriw bolǵan yuridikalıq shaxslardı olar tárepinen tematikalıq qıyabanlar paydalanıwǵa tapsırılǵan kúnnen baslap 3 jıl múddetke – yuridikalıq shaxslardan alınatuǵın dáramat salıǵı, jer salıǵı hám múlk salıǵı, sonday-aq, birden-bir salıq tólemin tólewden;

b) tematikalıq qıyabanlar, miymanxana hám basqa da jaylastırıw quralların 2022-jıldıń 1-yanvarına shekem – belgilengen tártipte tastıyıqlanatuǵın dizimlerge bola tematikalıq qıyabanlar, miymanxana hám basqa da jaylastırıw quralların qurıw, qayta ońlaw hám úskenelew ushın Ózbekistan Respublikasında islep shıǵarılmaytuǵın ásbap-úskenelerdi, texnikalardı, shiyki zattı, komplektlewshi buyımlardı hám awısıq bóleklerdi, qurılıs hám basqa da materiallardı alıp kiriw ushın bajıxana tólemlerin tólewden (bajıxana rásmiylestiriwi ushın jıyımlardan tısqarı);

v) turizm tarawındaǵı isbilermenlik jumısı subektlerin 2022-jıl 1-yanvarǵa shekem – Ózbekistan Respublikasınıń aymaǵına alıp kirilip atırǵan:

avtotransport basqarıwshı menen birgelikte 8 hám odan artıq adamdı tasıwǵa mólsherlengen turizm kategoriyasına baylanıslı transport quralları;

aspa jollardı, taw-lıja kótergishler, funikulyorlar hám basqa da uqsas obektler menen qurılmalardı qurıw, qayta ońlaw hám úskenelew ushın ásbap-úskeneler, mexanizm hám awısıq bólekler, sonday-aq, aerostatlar (hawa sharları), motor qayıqlar hám kvadrocikller ushın belgilengen tártipte tastıyıqlanatuǵın dizimlerge bola bajıxana tólemlerin tólewden (bajıxana rásmiylestiriwi ushın jıyımlardan tısqarı) azat etilsin.

Qaraqalpaqstan Respublikasında dizimge alınıp, licenziyaǵa iye bolǵan turizm operatorlarına ádettegiden ózgeshe tárizde ekstremal túrlerdi shólkemlestiriw ushın dvigatel kólemi 2,4 l. den az bolmaǵan joqarı ótiw qábiletine iye bolǵan alıp kirilip atırǵan transport qurallarına avtotransport quralların dizimge alıw boyınsha ayrıqsha mámleketlik nomer seriyasın engizgen halda hám olardan tek ǵana Qaraqalpaqstan Respublikası aymaǵında paydalanıw shárti menen 5 jıl múddetke bólip-bólip tólew arqalı ámeldegi stavkanıń 25 procenti muǵdarında bajıxana tólemlerin tólewge ruqsat etilsin.
Tómendegiler:
2018-jıldıń 1-yanvarınan baslap turizm ónimlerin satıw yamasa turizm xızmetlerin onlaynbron (bánt) etiw boyınsha xızmet kórsetetuǵın xojalıq júrgiziwshi subektlerdiń salıqqa salınatuǵın bazası elektron xızmetlerdi, sonıń ishinde, elektron tólemlerdi, bron (bánt) etiw, ekvayring hám basqa da xızmetlerdi, sonday-aq, turizm xızmetleriniń zamanagóy túrlerin usınıs etetuǵın qánigelestirilgen internet-saytlar menen portallardı jolǵa qoyıwǵa baǵdarlanǵan hújjetlerdiń muǵdarına azaytılatuǵını;

jámiyetlik orınlarda Internet tarmaǵına sımsız biypul jalǵanıw aymaqların (Wi-Fi) qurıp atırǵan operatorlar, provayderler hám basqa da xojalıq júrgiziwshi subektler paydalanıwshılardıń shaxsın májbúriy tártipte anıqlaǵan halda tiyisli sapadaǵı jalǵanıwdı támiyinlewi zárúr ekeni;

óz aymaǵında Internet tarmaǵına sımsız biypul jalǵanıw aymaqların (Wi-Fi) ornatqan xojalıq júrgiziwshi subektlerdiń salıq salınatuǵın bazasın, sonıń ishinde, birden-bir salıq tólemi boyınsha bazası tiyisli sapadaǵı sımsız jalǵanıw aymaǵın keńeytiw ushın ásbep-úskenelerdi satıp alıwǵa hám internet trafikti satıp alıwǵa baǵdarlanǵan qárejetlerdiń muǵdarına azaytılatuǵını;

jámiyetlik orınlarda Internet tarmaǵına sımsız biypul jalǵanıw aymaqların (Wi-Fi) qurıp atırǵan operatorlar, provayderler hám basqa da xojalıq júrgiziwshi subektlerge bunday aymaqlardı shólkemlestirgen jerlerde 18 kv.m.den artıq bolmaǵan ólshemdegi reklama bannerin yamasa ramların ornatıw huqıqı erkin tiykarda hám jergilikli mámleketlik hákimiyat uyımlarınıń tiyisli ruqsatnamaların almay usınıs etiletuǵını;

Internet tarmaǵına sımsız biypul jalǵanıw aymaqlarında (Wi-Fi) usınılıp atırǵan xızmetlerdiń sapasın qadaǵalaw Málimleme texnologiyaların hám kommunikaciyaların rawajlandırıw ministrligi janındaǵı Baylanıs, málimlemelestiriw hám telekommunikaciya texnologiyaları tarawında qadaǵalaw boyınsha mámleketlik inspekciyası tárepinen ámelge asırılatuǵını belgilep qoyılsın.

Turizmdi rawajlandırıw boyınsha mámleketlik komiteti hám Investiciyalar boyınsha mámleketlik komitetiniń miymanxanalardı, tutas joldı, injenerlik hám kommunikaciya infrastrukturaların qurıw boyınsha investiciyalıq joybarlardı birgelikte qarjılandırıw ushın Ózbekistan Respublikası Tikleniw hám rawajlandırıw qorınıń 200 million AQSh dolları muǵdarındaǵı kredit liniyasın ashıw haqqındaǵı usınıslarına kelisim berilsin.
Ózbekistan Respublikasınıń Tikleniw hám rawajlandırıw qorı eki ay múddette kommerciyalıq bankler tárepinen isbilermenlik subektleine tómendegi shártlerde kreditler ajıratılıwı ushın olarǵa kredit liniyaların ashsın:

miymanxanalar hám tutas jollar, injenerlik hám kommunikaciya infrastrukturaları obektleri ushın import úskeneler menen texnologiyalardı satıp alıw ushın kredit múddeti 15 jıldı (jeńillikli dáwir – 5 jıl) quraydı. Maqsetli kredit liniyasınıń qarjıları esabınan bir qarıydar ushın ajıratılatuǵın kredit muǵdarı joybar bahasınıń 50 procentinen artpawı zárúr;

kreditler wákillikli kommerciyalıq banklerdiń investiciyalıq joybarın ámelge asırıwdıń ekonomikalıq hám qarjılıq maqsetke muwapıqlıǵı haqqındaǵı unamlı qararları tiykarında beriledi. Onda, bir qarız alıwshıǵa beriletuǵın kredit muǵdarı bir investiciyalıq joybar ushın 10 million AQSh dollarınan artpawı zárúr.

Ózbekistan Milliy teleradiokompaniyasınıń «Dunyo Bo’ylab» telekanalı Ózbekistan Respublikası Turzimdi rawajlandırıw boyınsha mámleketlik komitetiniń ishki turizmdi, dem alıwdıń belsene túrlerin hám sport turizmin rawajlandırıw, mádeniy miyras obektlerin hám tábiyǵıy baylıqlardı, sonıń ishinde, qorǵalatuǵın tábiyǵıy aymaqlardı saqlaw hám olardan paydalanıw boyınsha ótkeriletuǵın ilajlardı sáwlelendiriw máseleleri boyınsha bas málimleme sherigi sıpatında belgilensin.
Ózbekistan Respublikası Turzimdi rawajlandırıw boyınsha mámleketlik komiteti mápdar ministrlikler hám vedomstvolar, Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri menen birgelikte on kúnlik múddette usı Pármandı esapqa alǵan halda kiriw turizmin rawajlandırıw, ishki turizmniń jedel rawajlanıwın támiyinlew, sonday-aq, Ózbekistan Respublikası Turzimdi rawajlandırıw boyınsha mámleketlik komitetiniń wákillikleri menen strukturasın qayta kórip shıǵıw boyınsha ilajlardı názerde tutatuǵın Ózbekistan Respublikası Prezidenti qararlarınıń joybarların islep shıqsın hám kirgizsin.
Ózbekistan Respublikası Prezidentiniń ayırım pármanlarına 2-qosımshaǵa muwapıq ózgerisler kirgizilsin.
Ózbekistan Respublikası Turzimdi rawajlandırıw boyınsha mámleketlik komiteti tiyisli ministrlikler hám vedomstvolar menen birgelikte eki ay múddette nızamshılıqqa usı Pármannan kelip shıǵatuǵın ózgerisler menen qosımshalar haqqındaǵı usınıslardı Ózbekistan Respublikası Ministrler Kabinetine kirgizsin.
Ministrlikler menen vedomstvolar bir ay múddette olar tárepinen qabıl etilgen normativlik-huqıqıy hújjetlerdi usı párman menen muwapıqlastırsın.

Usı Pármannıń orınlanıwın qadaǵalaw Ózbekistan Respublikasınıń Bas ministri – Turzimdi rawajlandırıw boyınsha muwapıqlastırıwshı keńestiń baslıǵı A.N.Aripovqa, Ózbekistan Respublikası Bas ministriniń orınbasarı S.R.Xolmuradovqa hám Ózbekistan Respublikası Turzimdi rawajlandırıw boyınsha mámleketlik komitetiniń baslıǵı A.A.Abduhakimovqa júklensin.

Ózbekistan Respublikası Prezidenti Sh.MIRZIYoEV

Tashkent qalası,

2018-jıl 3-fevral

Ózbekistan Respublikası Prezidentiniń «Ózbekistan Respublikasınıń turizm potencialın rawajlandırıw ushın qolaylı sharayatlar jaratıw boyınsha qosımsha shólkemlestiriw ilajları haqqında»ǵı

Pármanına TÚSINIK

Ózbekistan Respublikası bay ruwxıy-mádeniy miyrasqa, hár qıylı tariyxıy-arxeologiyalıq obektlerge, qolaylı tábiyǵıy-ıqlım sharayatına hám kóp tarmaqlı sociallıq infrastrukturaǵa iye bolıp, bul bolsa, turizmniń hár qıylı túrlerin jedel rawajlandırıw ushın barlıq zárúr sharayatlardı jaratadı.

Qısqa waqıt ishinde respublikada turistlik tarawdı rawajlandırıw boyınsha bir qatar ilajlar ámelge asırıldı. Sonıń ishinde, Ózbekistannıń turizm potencialın kompleksli túrde rawajlandırıwǵa baǵdarlanǵan 20 dan aslam normativlik-huqıqıy hújjetler qabıl etildi, olar óz gezeginde turizm tarawındaǵı jańa mámleketlik siyasatqa tiykar boldı, turizm tarawındaǵı subektlerge áhmiyetli tárizde salıq hám bajıxana jeńillikleri menen abzallıqların berdi.

Sonıń menen bir qatarda, tarawda bir qatar sheshilmegen máselelerdiń bar ekeni, sonıń ishinde, shet el puqaraları ushın viza hám pasport rejimin liberallastırıw jumısları tómen dárejede alıp barılıp atırǵanı, olar ushın elektron kiriw vizaların rásmiylestiriw imkaniyatınıń joq ekeni, bay ishki zıyarat turizmleri potencialınan tómen dárejede paydalanıp atırǵanlıǵı, investiciyalar, atap aytqanda, shet el investiciyaları áste-aqırın tartılıp atırǵanı sebepli turizm infrastrukturasınıń tolıq rawajlanbaǵanı, sonday-aq, málimleme-kommunikaciya texnologiyaları tolıq engizilmegeni tarawdıń rawajlanıwına tosqınlıq etpekte.

Atap ótilgen máselelerdi sheshiw maqsetinde Ózbekistan Respublikası Prezidentiniń «Ózbekistan Respublikasınıń turizm potencialın rawajlandırıw ushın qolaylı sharayatlar jaratıw boyınsha qosımsha shólkemlestiriw ilajları haqqında»ǵı Pármanı qabıl etildi.

Usı Pármanda Izrail mámleketi, Indoneziya Respublikası, Koreya Respublikası, Malayziya, Singapur Respublikası, Túrkiya Respublikası hám Yaponiya puqaraları, sonday-aq, Ózbekistan Respublikasına turaqlı aviaqatnawlardı ámelge asıratuǵın shet el aviakompaniyaları hawa kemeleri ekipajınıń aǵzaları ushın Ózbekistan Respublikası aymaǵına kirgen kúnnen baslap 30 kúnlik múddetke vizasız rejim belgileniwi názerde tutılǵan.

Sonday-aq, Evropa awqamınıń, Shıǵıs Aziyanıń bir qatar mámleketleri menen Jaqın Shıǵıs elleriniń jáne Hindstan Respublikası, Kanada, Jańa Zelandiya, Amerika Qurama Shtatları sıyaqlı 39 eldiń puqaraları ushın Ózbekistan Respublikası Sırtqı isler ministrligine turistlik vaucherdi yamasa Ózbekistan Respublikasına mirát etip atırǵan yuridikalıq yamasa fizikalıq shaxstıń múrájatın usınıwǵa baylanıslı talap biykar etiliwin hám hújjetlerdi qabıllaw kúni esapqa alınbaǵan halda eki jumıs kúni dawamında vizanı rásmiylestiriwdi názerde tutatuǵın turizm vizaların rásmiylestiriwdiń 2018-jıl 10-fevraldan baslap ápiwaylastırılǵan tártibi kirgizildi.

Elimizdiń turistlik, mádeniy, tábiyǵıy hám sport potencialın úgit-násiyatlaw boyınsha jumıslardı bunnan bılay da jedellestiriw maqsetinde Ózbekistan Respublikası Turizmdi rawajlandırıw boyınsha mámleketlik komiteti janındaǵı «Miliy turizm ónimin úgit-násiyatlaw orayı» MUK Ózbekistan Respublikası Turizmdi rawajlandırıw boyınsha mámleketlik komiteti janındaǵı «Milliy PR-orayı» MUK sıpatında qayta shólkemlestirildi hám oǵan respublikanıń turizm potencialın úgit-násiyatlawdı shólkemlestiriw boyınsha wazıypalar júklendi.

Sonıń menen birge, 2018-jıldıń 1-iyulinen baslap bir qatar shet ellerdiń puqaraları ushın elektron kiriw aizaların beriw sisteması engiziledi.

Párman qabıl etiliwi menen respublikada «Ózbekistan boylap sayaxat et!» ataması astında elimiz boylap tanıstırıw sayaxatları menen túrlerin shólkemlestiriwdiń keń kólemli baǵdarlaması iske qosılmaqta, onıń sheńberinde bir millionǵa shamalas puqaralarımız, sonıń ishinde, bilimlendiriw mákemeleriniń oqıwshıları menen studentleri, mayıplıǵı bolǵan balalar hám kem támiyinlengen shańaraqlardıń perzentleri, jumısshılar, napaqa alıwshılar, máhálle belsendileri, hayal-qızlar menen xalıqtıń basqa da qatalamları da elimiz boylap sayaxat etiw imkaniyatına iye boladı.

Turizm tarawındaǵı isbilermenlik subektlerin qollap-quwatlaw maqsetinde miymanxanalar, olardıń boyındaǵı jollar, injenerlik hám kommunikaciya infrastrukturaların qurıw boyınsha investiciyalıq joybarlardı birgelikte qarjılandırıw ushın turizm tarawı isbilermenlik subektlerine kredit qarjıların ajıratıw maqsetinde Ózbekistan Tikleniw hám rawajlandırıw qorınıń kredit liniyaların ashıw názerde tutılǵan.

Tiykarǵı jumısı tematikalıq qıyabanlar xızmetlerin shólkemlestiriwden ibarat bolǵan yuridikalıq shaxslar tematikalıq dem alıw baǵların paydalanıwǵa tapsırıw sánesinen baslap 3 jıl múddetke yuridikalıq shaxslardan alınatuǵın dáramat salıǵın, jer salıǵın hám múlk salıǵın, sonday-aq, birden-bir salıq tólemin tólewden azat etiledi.

Sonday-aq, tematikalıq qıyabanlar, miymanxanalar hám basqa da jaylastırıw quralların qurıw, rekonstrukciyalaw hám úskenelew ushın tematikalıq qıyabanlar, miymanxanalar hám basqa da jaylastırıw quralları tárepinen 2022-jıldıń 1-yanvarına shekem alıp kirilip atırǵan úskeneler, texnikalar, shiyki zatlar, komplektlewshi buyımlar hám rezerv bólekler jáne qurılıs materialları hám Ózbekistan Respublikasında islep shıǵarılmaytuǵın basqa da materiallar bajıxana tóleminen azat etiledi.

Bunnan tısqarı, turizm tarawında jumıs alıp baratuǵın isbilermenlik subektleri respublika aymaǵına alıp kirilip atırǵan turistlik kategoriyadaǵı transport quralları hám aspa jol, taw-lıja kótergishler, funikulyorlar hám basqa da soǵan uqsas obektler menen qurılmalardı qurıw, rekonstrukciyalaw hám úskenelew ushın ásbap-úskeneler, mexanizmler hám awısıq bólekler, sonday-aq, hawa sharları, aerostatlar, kvadrocikller hám motorlı qayıqlar ushın 2022-jıl 1-yanvarǵa shekem bajıxana tólemlerinen azat etiledi.

Párman menen Qaraqalpaqstan Respublikasında dizimge alınǵan licenziyaǵa iye bolǵan turizm operatorlarına ádettegiden ózgeshe tárizde ekstremal túrlerdi shólkemlestiriw ushın alıp kirilip atırǵan dvigatel kólemi 2,4 l. az bolmaǵan joqarı ótiw qábiletine iye bolǵan transport qurallarına avtotransport quralların dizimge alıw boyınsha ayrıqsha mámleketlik nomer seriyasın engizgen halda hám olardan tek ǵana Qaraqalpaqstan Respublikası aymaǵında paydalanıw shárti menen 5 jıl múddetke bólip-bólip tólew arqalı ámeldegi stavkanıń 25 procenti muǵdarında bajıxana tólemlerin tólewge ruqsat etiledi.

Málimleme-kommunikaciya texnologiyaların turizm tarawına jedel engiziw maqsetinde Párman menen tómendegiler názerde tutılǵan:

2018-jıldıń 1-yanvarınan baslap turizm ónimlerin satıw yamasa turizm xızmetlerin onlayn bronlaw boyınsha xızmet kórsetetuǵın xojalıq júrgiziwshi subektlerge elektron tólemler, bronlaw, ekvayring hám basqa da xızmetlerdi, sonday-aq, turizm xızmetleriniń zamanagóy túrlerin usınıs etetuǵın qánigelestirilgen internet-saytlar menen portallardı jolǵa qoyıwdı xoshametlewge baǵdarlanǵan salıq jeńilliklerin usınıw;

jámiyetlik orınlarda Internet tarmaǵına sımsız biypul jalǵanıw aymaqları (Wi-Fi) menen úskenelengen operatorlar, provayderler hám basqa da xojalıq júrgiziwshi subektlerge paydalanıwshılardıń shaxsın májbúriy tártipte anıqlaw menen birgelikte tiyisli sapadaǵı jalǵanıwdı támiyinlew boyınsha minnetleme qoyıldı;

óz aymaǵında Internet tarmaǵına sımsız biypul jalǵanıw aymaqların (Wi-Fi) ornatqan xojalıq júrgiziwshi subektlerge tiyisli sapadaǵı sımsız jalǵanıw aymaǵın keńeytiw ushın ásbep-úskenelerdi satıp alıwǵa hám internet trafikti satıp alıwǵa baǵdarlanǵan salıq jeńilliklerin engiziw;

Internet tarmaǵına sımsız biypul jalǵanıw aymaqların (Wi-Fi) qurıp atırǵan operatorlar, provayderler hám basqa da xojalıq júrgiziwshi subektlerge bunday aymaqlar shólkemlestirilgen orında erkin tiykarda 18 kv.m. den aslam bolmaǵan maydandaǵı reklama bannerin yamasa ramların ornatıw huqıqın beriw.

Sutka dawamında óz kórsetiwlerin berip baratuǵın «D7n69 B9’6lab» telekanalı Ózbekistan Respublikası Turzimdi rawajlandırıw boyınsha mámleketlik komitetiniń ishki turizmdi, dem alıwdıń belsendi túrlerin hám sport turizmin rawajlandırıw, mádeniy miyras obektlerin hám tábiyǵıy baylıqlardı, sonıń ishinde, qorǵalatuǵın tábiyat aymaqların saqlaw hám olardan pydalanıw boyınsha ótkeriletuǵın ilajlardı sáwlelendiriw máseleleri boyınsha málimleme sherigi sıpatında belgilendi.

Pármanda belgilengen ilajlardıń ámelge asırılıwı ishki hám zıyarat turizmlerin jedel rawajlandırıw hám olardıń bay potencialınan hár tárepleme paydalanıw ushın bunnan bılay da qolaylı sharayatlar jaratadı.