FUTBOLDÍ BUNNAN BÍLAY DA RAWAJLANDÍRÍW ILAJLARÍ HAQQÍNDA

Ózbekstan Respublikası Prezidentiniń qararı

Perspektivalı hám talantlı futbolshılardı tańlaw hám tayarlawdıń nátiyjeli sistemasın jaratıw, milliy saylandı komandalar hám professional futbol klubları ushın sapalı sport rezervin qáliplestiriw, xalıqaralıq talaplar hám standartlar tiykarında futbol boyınsha trener hám tóreshilerdi tayarlaw, qayta tayarlaw hám mamanlıǵın arttırıw maqsetinde, sonday-aq, Ózbekstan Respublikası Prezidentiniń 2018-jıl 5-marttaǵı «Dene tárbiyası hám sport tarawında mámleketlik basqarıw sistemasın túp-tiykarınan jetilistiriw ilajları haqqında»ǵı PP-5368-sanlı Pármanına muwapıq:

Ózbekstan Respublikası Dene tárbiyası hám sport ministrligi, Ózbekstan Milliy olimpiada komiteti, Ózbekstan futbol associaciyası hám «Ózbekneftgaz» AJnıń:
«Bunyodkor» stadionın barlıq imaratları hám obektleri kompleksi menen birge (keyingi orınlarda «Bunyodkor» stadionı dep ataladı) futbol boyınsha milliy saylandı komandalar ushın oqıw-shınıǵıw procesin shólkemlestiriw hám sport jarısların jáne basqa da ilajlardı ótkeriw boyınsha Ózbekstan futbol associaciyasınıń tiykarǵı bazası etip belgilew;

perspektivalı jas futbolshılardı keyin ala professional tárizde tayarlaw hám futbol boyınsha milliy saylandı komandalar jáne professional futbol klubları ushın sapalı sport rezervin jaratıw maqsetinde orınlarda olardı tańlap alıw (selekciya) jumısların ámelge asıratuǵın Qaraqalpaqstan Respublikası, wálayatlar hám Tashkent qalasında balalar hám jas óspirimler futbol akademiyaların, sonday-aq, Ózbekstan futbol associaciyası janında Respublikalıq balalar hám jas óspirimler futbol akademiyasın shólkemlestiriw;

balalar hám jas óspirimler sport mekteplerine jumısqa qabıl etiletuǵın futbol boyınsha trenerlerdiń kandidaturaların Ózbekstan futbol associaciyası menen májbúriy kelisiw tártibin engiziw;

Ózbekstan Respublikası Dene tárbiyası hám sport ministrligi janındaǵı Futbol boyınsha trener hám tóreshilerdi tayarlaw respublikalıq mektebin tamamlap, futbol boyınsha trener hám tóreshilerdi tayarlaw, qayta tayarlaw hám mamanlıǵın arttırıw wazıypasın Ózbekstan futbol associaciyasına júklew;

Ózbekstan Futbolın qollap-quwatlaw qorı hám onıń Qaraqalpaqstan Respublikası, wálayatlar hám Tashkent qalasındaǵı filialların saplastırıw jáne bosaǵan qarjılardı Ózbekstan futbol associaciyasına ótkeriw haqqındaǵı usınısları maqullansın.

2018-2022-jıllarda Ózbekstan Respublikasında futboldı bunnan bılay da rawajlandırıw baǵdarlaması qosımshaǵa muwapıq tastıyıqlansın.
Puqaralardıń ózin-ózi basqarıw uyımlarınıń jumısın muwapıqlastırıw boyınsha respublikalıq keńes, Ózbekstan jaslar awqamı, Ózbekstan futbol associaciyası, Ózbekstan Respublikası Dene tárbiyası hám sport ministrliginiń:
puqaralar jıyınınıń jas óspirimler, jaslar hám sport máseleleri boyınsha komissiyası basshılarınıń wazıypasın puqaralar jıyınları baslıqlarınıń orınbasarları – jaslar máseleleri boyınsha másláhátshilerine júklew;

puqaralar jıyınları baslıqlarınıń orınbasarları – jaslar máseleleri boyınsha másláhátshilerdi Ózbekstan Respublikası Dene tárbiyası hám sport ministrligi janındaǵı Dene tárbiyasın hám sporttı rawajlandırıw qorı, Ózbekstan jaslar awqamı hám Ózbekstan futbol associaciyası qarjıları esabınan materiallıq xoshametlew tártibin engiziw haqqındaǵı usınısları qollap-quwatlansın.

Puqaralar jıyınlarınıń jas óspirimler, jaslar hám sport máseleleri boyınsha komissiyaları:
Futbol hám basqa da sport túrlerin ǵalaba en jaydırıw, salamat turmıs tárizine úyretiw, máhállelerde jasaytuǵınlar arasınan perspektivalı hám talantlı balalar menen jaslardı tańlap alıw (selekciya) jumısların shólkemlestiriw máselelerinde rayonlıq (qalalıq) dene tárbiyası hám sport bólimleri, balalar hám jas óspirimler sport mektepleri, balalar hám jas óspirimler futbol akademiyaları, sport federaciya (associaciya)larınıń aymaqlıq bólimleri menen birge islesetuǵını;

máhállelerde futbol maydanların hám basqa da sport obektlerin abadanlastırıwda jergilikli mámleketlik hákimiyat uyımları, rayonlıq (qalalıq) dene tárbiyası hám sport bólimleri, Ózbekstan futbol associaciyasınıń aymaqlıq bólimlerine kómeklesetuǵını belgilep qoyılsın.

Ózbekstan Respublikası Dene tárbiyası hám sport ministrligi, Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri Puqaralardıń ózin-ózi basqarıw uyımlarınıń jumısın muwapıqlastırıw boyınsha respublikalıq keńes, Ózbekstan jaslar awqamı, Ózbekstan Milliy olimpiada komiteti hám Ózbekstan futbol associaciyası menen birgelikte eki ay múddette:
máhállelerde futbol maydanları qurılısın, sonıń ishinde, mámleketlik-jeke menshik sheriklik shártlerinde qurılıwın názerde tutatuǵın «Hár bir máhállede futbol maydanı» baǵdarlamasın;

puqaralar jıyınları baslıqlarınıń orınbasarları – jaslar máseleleri boyınsha másláhátshilerdi materiallıq xoshamatlew tártibin tastıyıqlaw haqqındaǵı húkimetlik qararlardıń joybarların Ministrler Kabinetine kirgizsin.

Ózbekstan futbol associaciyası, Ferǵana hám Tashkent wálayatları hákimlikleriniń:
qáwenderlik qarjıları hám Ferǵana wálayatı jergilikli byudjetiniń qosımsha dáreklerin qarjılandırıw dáregi etip belgilegen halda, ózbek futbolınıń 105 jıllıǵına baǵıshlap Ferǵana wálayatı Qoqand qalasında zamanagóy futbol stadionın qurıw;

qáwenderlik qarjıları, Ózbekstan futbol associaciyası qarjıları hám Tashkent wálayatı jergilikli byudjetiniń qosımsha dáreklerin qarjılandırıw dáregi etip belgilegen halda, sud tárepinen mámleketlik dáramatqa ótkerilgen Tashkent wálayatı Bostanlıq rayonındaǵı «Sijjak» dem alıw ornı negizinde Ózbekstan futbol associaciyası janında futbol boyınsha milliy saylandı komandalar ushın oqıw-shınıǵıw bazasın shólkemlestiriw haqqındaǵı usınısları maqullansın.

Ózbekstan Respublikası Ministrler Kabineti bir ay múddette Qoqand qalasında futbol stadionı qurılısın hám Bostanlıq rayonında oqıw-shınıǵıw bazasın shólkemlestiriw haqqında qarar qabıl etsin.

Ózbekstan Respublikası Dene tárbiyası hám sport ministrligi, Ózbekstan Milliy olimpiada komiteti, Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri Ózbekstan futbol associaciyası hám basqa da mápdar vedomstvolar menen birgelikte bir ay múddette futbol boyınsha mámleketlik qánigelestirilgen mektep-internatlarınıń jumısın sın kózqarastan úyrensin hám nátiyjeleri boyınsha Ózbekstan Respublikası Ministrler Kabinetine:
olardıń negizinde 14 aymaqlıq balalar hám jas óspirimler futbol akademiyaları hám Ózbekstan futbol associaciyası janında Respublikalıq balalar hám jas óspirimler futbol akademiyasın shólkemlestiriw, olardı Ózbekstan Respublikası Dene tárbiyası hám sport ministrligi sistemasınan Ózbekstan futbol associaciyası qaramaǵına ótkeriw jáne ámeldegi qarjılandırıw tártibin saqlap qalıwdı;

futbol boyınsha basqa da mámleketlik qánigelestirilgen mektep-internatlardı aymaqlarda sport túrlerin rawajlandırıw zárúrligin hám áhmiyetin inabatqa ala otırıp, basqa olimpiada hám milliy sport túrleri, sonıń ishinde, sporttıń oyın túrleri boyınsha mámleketlik qánigelestirilgen mektep-internatlarına qayta qánigelestiriwdi;

balalar hám jas óspirimler futbol akademiyalarına, sonday-aq, qaytadan qánigelestirilip atırǵan mámleketlik qánigelestirilgen mektep-internatlarına beriletuǵın imaratlar menen obektlerdi rekonstrukciyalaw, ońlaw hám úskenelewdi basqıshpa-basqısh ámelge asırıw baǵdarlamasın tastıyıqlawdı;

qánigelestirilgen olimpiada rezervleri mektep-internatlarındaǵı futbol bólimlerin qısqartıw hám bosap atırǵan oqıwshı qabıllaw kvotaların olimpiada hám milliy sport túrlerine, sonıń ishinde, sporttıń oyın túrlerine baǵdarlawdı;

Ózbekstan futbol associaciyası janındaǵı Respublikalıq balalar hám jas óspirimler futbol akademiyasın «Bunyodkor» stadionına jaylastırıwdı názerde tutatuǵın húkimetlik qarardıń joybarın kirgizsin.

Tómendegiler:
«Bunyodkor» stadionı imaratları menen obektlerinen paydalanıw direkciyası» JShJ «Bunyodkor» stadionınan paydalanıwshı shólkem bolıp esaplanatuǵını;

«Bunyodkor» stadionı imaratları hám obektlerinen paydalanıw direkciyası» JShJ nı (keyingi orınlarda – Direkciya), sonday-aq, «Bunyodkor» stadionın saqlaw hám onnan paydalanıw qárejetlerin qarjılandırıw dárekleri «Ózbekneftgaz» AJ hám Direkciyanıń qarjıları, sonday-aq, nızam hújjetlerinde qadaǵan etilmegen basqa da dárekler bolıp esaplanatuǵını;

«Ózbekneftgaz» AJ bir ay múddette «Bunyodkor» stadionı imaratları hám obektlerinen paydalanıw Direkciyası» JShJ nıń shólkemlestiriwshilik hújjetlerine Direkciya Ózbekstan futbol associaciyası janında jumıs alıp barıwın názerde tutqan halda tiyisli ózgerisler kirgiziliwin támiyinlesin.

Ózbekstan jaslar awqamı, Dene tárbiyası hám sport ministrligi, Ózbekstan Milliy olimpiada komiteti, Ózbekstan futbol associaciyası, Qarjı ministrliginiń tómendegi qarjılardı:
Dene tárbiyası hám sport ministrliginiń sport hám dene tárbiyası-ǵalabalıq ilajlar respublikalıq Kalendar rejesinde názerde tutılǵan Ózbekstan Respublikası Mámleketlik byudjeti qarjıların;

Ózbekstan jaslar awqamınıń balalar hám jas óspirimler futbolın rawajlandırıw ushın ajıratılatuǵın qarjıların;

Ózbekstan Respublikası Dene tárbiyası hám sport ministrligi janındaǵı Dene tárbiyasın hám sporttı rawajlandırıw qorı qarjıların;

qáwenderler hám qayırqomlıq etiwshilerdiń qarjıları, sonday-aq, nızamshılıqta qadaǵan etilmegen basqa da dáreklerden túsetuǵın qarjılardı Ózbekstan futbol associaciyası jumısın hám oǵan júklengen wazıypalardı qarjılandırıw dárekleri etip belgilew haqqındaǵı usınısları maqullansın.

2023-jıl 1-yanvarǵa shekem tómendegiler:
Ózbekstan futbol associaciyası, onıń aymaqlıq bólimleri, «Ózbekstan Professional futbol ligası» jámiyetlik birlespesi hám Professional futbol klubları – barlıq túrdegi salıqlar jáne mámleketlik maqsetli qorlarǵa májbúriy ajıratpalardı;

Ózbekstan futbol associaciyası, onıń aymaqlıq bólimleri, «Ózbekstan Professional futbol ligası» jámiyetlik birlespesi hám professional futbol klubları – belgilengen tártipte tastıyıqlanatuǵın dizimge muwapıq futbol boyınsha sport obektleriniń materiallıq-texnikalıq bazasın bekkemlew ushın zárúr bolǵan, Ózbekstan Respublikasında islep shıǵarılmaytuǵın sport ásbap-úskenelerin, inventarların hám arnawlı professional sport kiyimlerin, transport quralların, sonıń ishinde, arnawlı transport quralların alıp kirgeni ushın bajıxana tólemlerin (bajıxana jıyımlarınan tasqarı);

Ózbekstan futbol associaciyası, onıń aymaqlıq bólimleri, «Ózbekstan Professional futbol ligası» jámiyetlik birlespesi hám professional futbol klubları tárepinen tartılatuǵın shet elli qánigelerden – fizikalıq shaxslardan alınatuǵın dáramat salıǵın tólewden azat etilsin.

Payda salıǵın esaplawda yuridikalıq shaxslardıń salıq salınatuǵın paydası Ózbekstan futbol associaciyası, onıń aymaqlıq bólimleri, «Ózbekstan Professional futbol ligası» jámiyetlik birlespesi hám professional futbol klublarınıń jumısın qarjılandırıwǵa jumsalatuǵın qáwenlerlik hám qayırqomlıq járdemi túrindegi qarjılar summasına, biraq salıq salınatuǵın paydanıń on procentinen kóp bolmaǵan muǵdarda azaytılatuǵını;
Futbol boyınsha shınıǵıwlardı hám jıyınlardı ótkeriw waqtında futbolshılar hám basqa da qánigeler (trener, tóreshi, instruktor), sonıń ishinde, shet el qánigeleriniń sport azıq-awqatları menen awqatlanıwın, sonday-aq, olardı sıylıqlaw (xoshametlew)dı shólkemlestiriwge jumsalatuǵın qarjılar fizikalıq shaxslardıń dáramatları esaplanbaytuǵını belgilep qoyılsın.

Ózbekstan Respublikası Sırtqı isler ministrligi Ózbekstan futbol associaciyasınıń talaplarına bola shet elden tartılatuǵın qánigelerge konsullıq hám basqa da jıyımlardı óndirmegen halda kiriw vizalarınıń rásmiylestiriliwin támiyinlesin.
Ózbekstan Respublikası Ishki isler ministrligi Ózbekstan futbol associaciyasınıń talaplarına bola shet elden tartılatuǵın qánigelerge mámleketlik bajı óndirmegen halda kóp mártelik kiriw vizaları rásmiylestiriliwin, beriliwin hám múddetiniń sozılıwın, sonday-aq, olar jasaytuǵın jerde waqtınsha dizimnen ótkeriliwin hám waqtınsha dizimnen ótkeriw múddeti sozılıwın támiyinlesin.
Ózbekstan Respublikası Bántlik hám miynet qatnasıqları ministrligi Ózbekstan futbol associaciyası talaplarına bola ornatılǵan tólemlerdi óndirmegen halda Ózbekstan Respublikasına shet el qánigelerin tartıwǵa ruqsatnamalar beriliwi (sozılıwı)n, sonday-aq, kórsetilgen shet el puqaralarına Ózbekstan Respublikası aymaǵında jumıs islewin ámelge asırıw huqıqına tastıyıqlawlar beriliwi (sozılıwı)n belgilengen tártipte támiyinlesin.
Ózbekstan Respublikası Jer resursları, geodeziya, kartografiya hám mámleketlik kadastr boyınsha mámleketlik komiteti, Menshiklestirilgen kárxanalarǵa kómeklesiw hám básekilikti rawajlandırıw boyınsha mámleketlik komiteti, Tashkent qalası hákimligi mápdar vedomstvolar menen birgelikte bir ay múddette «Bunyodkor» stadionınıń Ózbekstan futbol associaciyası balansına ótkeriliwin támiyinlesin.
Ózbekstan Respublikası Dene tárbiyası hám sport ministrligi, Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri Ádillik ministrligi, Ózbekstan futbol associaciyası hám basqa da mápdar vedomstvolar menen birgelikte eki ay múddette:
Ózbekstan futbol associaciyası aymaqlıq bólimleriniń basshıları hám hákimshilik quramı (apparatı)nıń úlgi strukturasın jańalaw, sonday-aq, olardıń xızmetkerlerin materiallıq xoshametlew mexanizmin jetilistiriw;

nızam hújjetlerine usı qarardan kelip shıǵatuǵın ózgerisler hám qosımshalar haqqında Ózbekstan Respublikası Ministrler Kabinetine usınıslar kirgizsin.

Usı qarardıń orınlanıwın qadaǵalaw Ózbekstan Respublikası Bas ministriniń orınbasarı Q.V.Akmalovqa, Ózbekstan Respublikası dene tárbiyası hám sport ministri Sh.X.Israilovqa, Ózbekstan Milliy olimpiada komitetiniń baslıǵı U.M.Axmatjonov hám Ózbekstan Respublikasınıń Bas prokurorı O.B.Muradovqa júklensin.
Ózbekstan Respublikası

Prezidenti Sh.MIRZIYoEV

Tashkent qalası,

2018-jıl 16-mart

  17.03.2018, 16:13  |    60 ma'rte ko'rildi

Raxmet

Sayt administratsiaysi qa'te tekst haqqinda xabarlandirildi