Hár jılı 27-iyun sánesin baspasóz hám ǵalaba xabar quralları xızmetkerleriniń kásiplik bayramı sıpatında keńnen belgilew dástúrge aylanǵan.

Bıyıl da elimizdiń barlıq orınlarında hár jılǵıday usı sánege baylanıslı kóplegen ilajlar, jarıslar, dóretiwshilik ushırasıwlar ótkerildi. Bıyılǵı kásiplik bayramnıń Múbárek Ramazan ayı kúnlerine tuwra keliwi bayramǵa basqasha ruwh engizdi. Qaraqalpaqstan Respublikası Joqarǵı Keńesiniń qollap-quwatlawında baspasóz hám ǵalaba xabar quralları mákemleri baslaması menen usı jıl 23-iyun kúni kásiplik bayramǵa baylanıslı Nókis polgrafkombinatı imaratı janında arzanlatılǵan bahadaǵı yarmarka ótkerilgen bolsa, 24-iyun kúni paytaxtımızdaǵı Ámir Temur dem alıw baǵında «Qalamızdı abat eteyik!» súreni astında ekologiyalıq akсiya shólkemlestirildi. Ekologiyalıq akсiyaǵa taraw xızmetkerleri belsene qatnasıp, átiraptı shıǵındılardan, jabayı shóplerden tazalaw, terek túpleriniń dógeregin jumsartıw, suw quyıw jumısları menen shuǵıllandı.
Usı kúni jámleskenlik úlgisin kórsetken taraw xızmetkerleri salada uzaq jıllar jemisli miynet etken marhum insanlardıń qábirin zıyarat etip, olardıń ruwhına quran oqıp, qábiri átirapların abadanlastırdı.

Qaraqalpaqstan xabar agentligi