Múbárek Ramazan haytınıń ruwxıy turmısımızdaǵı pazıyletlerin, shúkirshilik, miyrim-shápáát hám awızbirshilik qádriyatların bekkemlew baǵdarındaǵı ornın hám áhmiyetin itibarǵa alıp «Ekosan» ekologiya hám salamatlıq xalıqaralıq qayırqomlıq jámiyetlik qorınıń Qaraqalpaqstan aymaqlıq shólkemi tárepinen qıyırqomlıq ilajları ótkerildi.
Shólkem xızmetkerleri «Ózbekistan Arnawlı Olimpiadası» jámiyetlik birlespesi Qaraqalpaqstan Respublikalıq bólimi menen birgelikte 400 mıń sumǵa teń bolǵan azıq-awqat hám sút ónimleri, sport kiyimleri, kanсelyariya buyımlarınan ibarat sawǵalardı imkaniyatı sheklengen balalardıń úylerine barıp, olardıń hal-jaǵdaylarınan xabar alıp, saltanatlı túrde tapsırdı.
«Ekosan» qorı tárepinen usı jıldıń iyun ayında ulıwma bahası 10,8 million sumlıq 10 dana mayıplar arbashası, 100 dana hasa tayaqlar Oraza ayınıń ishinde Mayıplar jáne Kózi ázziler jámiyetleri esabında turǵan hám múrájat etken mútáj puqaralarǵa biypul tarqatılıp berildi. Sonday-aq, paytaxtımızdaǵı «Bes tóbe» mákan puqaralar jıyını turǵını X.Erejepovanıń balası Qońıratbay Esbosınovqa operaсiya isletiw ushın Nókis qalasındaǵı Xalıq bankinde ashılǵan esap betine qayırqomlıq járdem retinde 500 mıń sum ótkerip berildi.
Qaraqalpaqstan xabar agentligi