Hár jılı iyun ayı elimizde «Náshebentlikke qarsı gúresiw aylıǵı» dep járiyalanıp, 26-iyunde Náshebentlikke qarsı gúresiw kúni ótkerip kelinbekte. «Ásir obası» dep atalǵan bul illet qanshadan-qansha insanlardıń ómirin zaya etti, olardı túrli jınayat jolına basladı. Eń ashınarlısı, kelshek áwladtıń salamatlıǵına keri tásirin tiygizbekte. Sonlıqtanda narkotikalıq zatlardıń nızamsız aylanısı hám náshebentlikke qarsı gúresiw xalıqaralıq dárejede alıp barılmaqta.
Búgingi kúnge aylıq sheńberinde náshebentlikke hám psixotroplıq zatlardıń tásirine túsip qalǵan jaslardı anıqlaw, olardıń bul jolǵa túsip qalıwınıń sebeplerin úyreniw, shańaraqtaǵı jaǵdayları menen tanısıw, olar menen profilaktikalıq jumıslar alıp barıw, sonday-aq, náshebentlik zatlardıń insan salamatlıǵına zıyanı, oǵan qarsı gúresiw boyınsha alıp barılıp atırǵan jumıslarǵa baylanıslı 100 den zıyat ilaj ótkerilip, olarǵa 1500 ge jaqın jas qamtıp alındı.
Atap aytqanda, «Kamolot» JJH Qońırat rayonlıq Keńesi tárepinen Hayal-qızlar komiteti, ishki isler bólimi menen birgelikte rayondaǵı «Jayxun-1», «Jayxun-2» balalar dem alıs oraylarında «Biz náshebentlikke qarsımız!» súreni astında súwret salıw boyınsha tańlaw ótkerilip, onıń jeńimpazları «Kamolot» JJH Qońırat rayonlıq Keńesiniń Húrmet jarlıqları hám estelik sawǵaları menen sıylıqlandı.
Bunnan tısqarı, Berdaq atındaǵı Qaraqalpaq mámleketlik universitetiniń sport sarayında «Biz jaslar náshebentlikke qarsımızÁ» súreni astında karate boyınsha jarıs, Shımbay rayonında boks boyınsha ashıq birinshilik, Shomanay rayonında «Náshebentlik ómir zawalı» súreni menen kórkem gimnastika boyınsha jarıs ótkerilgen bolsa, Xojeli rayonında «Náshebentlik zatlarsız ómir gózzal» temasında ushırasıw keshesi ótkerildi. Sonday-aq, Qaraqalpaqstan Respublikası Densawlıqtı saqlaw ministrligi, «Máhálle» qayırqomlıq jámiyetlik fondınıń Qaraqalpaqstan Respublikası bólimi, «Ekosan» fondınıń Qaraqalpaqstan aymaqlıq shókemi, basqada mápdar shólkemler menen birgelikte joqarı oqıw orınlarınıń student jasları, akademiyalıq liсey hám kásip-óner kolledjleriniń oqıwshıları arasında «Biz jaslar salamat turmıs tárizi tárepdarımız!» súreni astında seminarlar, dógerek sáwbetlerin ótkeriw rejelestirilgen. Bunday ilajlar aylıq sheńberinde emes, bálkim jıl boyı dawam etip, ol xalqımız, sonıń ishinde jaslarımız arasında salamat turmıs tárizin qáliplestiriw, olardı náshebentlik sıyaqlı zıyanlı illetten saqlawǵa xızmet etedi.
D.ABIBULLAEV,
Qaraqalpaqstan xabar agentliginiń xabarshısı.