Múbárek Ramazan ayında respublikamızda keń kólemli qayırqomlıq ilajları ótkerilmekte.
Paytaxtımızdaǵı «Meridian» restoranında «Dáwranbek-Bayrambek» juwapkershiligi sheklengen jámiyetiniń qáwenderliginde Ózbekistan Respublikasınıń Birinshi Prezidenti Islam Kárimovtıń esteligine baǵıshlap qayır-saqawat ilajı ótti. Oǵan «Jiydeli Baysın» mákan puqaralar jıyını aymaǵında jasawshı nuranıy kekseler, kem támiyinlengen shańaraqlardıń aǵzaları qatnastı.
Ilajda atap ótilgenindey, elim dep, jurtım dep, janıp jasaǵan insanlardıń mártlik isleri hesh waqıtta umıtılmaydı. Solardıń biri, ǵárezsiz mámleketimizdiń tiykarın salıwshı, óziniń kóp qırlı siyasiy jumısı, ullı insanıylıq pazıyletleri menen Watanımızdıń kóp ásirlik tariyxında óshpes iz qaldırǵan Birinshi Prezidentimiz Islam Ábdiǵanievich Kárimov boldı. Onıń ana Watanımızdıń ǵárezsizligi, el-jurtımızdıń rawajlanıwı jolındaǵı ullı tariyxıy xızmetleri xalqımızdıń júrek túrinen orın alǵan.
Ózbekistan Respublikası Prezidentiniń usı jıl 25-yanvardaǵı «Ózbekistan Respublikasınıń Birinshi Prezidenti Islam Ábdiǵanievich Kárimovtıń esteligin máńgilestiriw haqqında»ǵı qararınıń orınlanıwın támiyinlew baǵdarında keń kólemli jumıslar ámelge asırılmaqta. Paytaxtımızdaǵı oraylıq kóshelerdiń birine Birinshi Prezidentimizdiń atı berildi. Joqarı oqıw orınlarınıń studentleri ushın Islam Kárimov atındaǵı mámleketlik stipendiya engizilmekte.
-Sawap isti hár kim, hár kúni islewi kerek,-degen edi Birinshi Prezidentimiz I.Kárimov,-deydi nuranıy Kaipbay Tajetdinov.-Aymaǵımızda 1063 shańaraqta 7 mıńnan aslam xalıq bekkem awızbirshilikte jasap, miynet etip kelmekte. Múbárek Ramazan ayı múnásibeti menen Birinshi Prezidentimiz Islam Kárimovtıń esteligine baǵıshlanǵan qayır-saqawat ilajın ótkeriwge qáwenderlik etken «Dáwranbek-Bayrambek» juwapkershiligi sheklengen jámiyeti jámáátine, «Jiydeli Baysın» mákan puqaralar jıyını basshılarına minnetdarshılıq bildiremiz.
Ilajda Birinshi Prezidentimizdiń elimizdiń hár tárepleme gúllep-rawajlanıwı, xalqımızdıń abadan turmısı, jaslarımızdıń aydın keleshegi jolında islegen pidákerlik miyneti jáne bir márte atap ótilip, onıń esteligine húrmet kórsetildi.
D.ABIBULLAEV,
Qaraqalpaqstan xabar agentliginiń xabarshısı.