O`zbekistan Respublikası Prezidentinin` 2016-jıl 28-dekabr`degi «Fizikalıq ha`m yuridikalıq shaxslardın` mu`ra`jatları menen islesiw sistemasın tu`p-tiykarınan jetilistiriw ilajları haqqında»g`ı Pa`rmanının` orınlanıwın ta`miyinlew, sonday-aq, «Xalıq penen pikirlesiw ha`m insan ma`pleri jılı»  mu`na`sibeti menen Xalıq qabıllawxanalarının` orınlarda ko`shpeli qabıllawları sho`lkemlestirilmekte.

Usınday ko`shpeli qabıllaw 5-sentyabr` ku`ni A`miwda`r`ya rayonında bolıp o`tti. Og`an ministrlikler menen vedomstvolardın`, ka`rxana, sho`lkem, ma`kemelerdin` basshıları, huqıq qorg`aw uyımlarının`, g`alaba xabar qurallarının` wa`killeri qatnastı.

Hu`rmetli Prezidentimiz Sh.Mirziyoevtın` tikkeley basshılıg`ında respublikamızdı sotsiallıq-ekonomikalıq jaqtan rawajlandırıw,  aymaq turg`ınlarının` turmıs sharayatın jaqsılaw, olardın` ba`ntligin ta`miyinlew boyınsha ken` ko`lemli jumıslar a`melge asırılmaqta. Bunda Jurtbasshımızdın` usı jıl 18-yanvar` ku`ngi «2017-2021-jıllarda Aralboyı regionın rawajlandırıwdın` Ma`mleketlik bag`darlaması haqqında»g`ı, sonday-aq, usı jıl 28-fevral` ku`ngi «2017-2018-jıllarda Qaraqalpaqstan Respublikasının` Moynaq rayonın ekonomikalıq rawajlandırıw ha`m xalıqtın` ba`ntligin ta`miyinlew boyınsha qosımsha ilajlar haqqında»g`ı qararlarının` qabıl etiliwi ayrıqsha a`hmiyetke iye boldı.

O`zbekistan Respublikası Prezidentinin` rayondag`ı Xalıq qabıllawxanasına bıyılg`ı jıldın` o`tken ayları dawamında fizikalıq ha`m yuridikalıq shaxslardan ja`mi  481 mu`ra`jat kelip tu`sken. Sonnan 42 mu`ra`jat joqarı uyımlarg`a, 307 mu`ra`jat rayondag`ı ma`kemelerge jiberilgen bolsa, 132 mu`ra`jat Xalıq qabıllawxanasının` o`zinde u`yrenip shıg`ıldı. Sonnan 199 ı qanaatlandırıldı, 241 mu`ra`jat boyınsha tu`sinik berildi, 41i tiyisli sho`lkemler ta`repinen u`yrenip shıg`ılmaqta.

Usı ku`ni rayonda sho`lkemlestirilgen ko`shpeli qabıllawg`a tiykarınan  ba`ntlik, kommunallıq xızmetten narazılıq, meditsinalıq ja`rdem, kredit alıw, turaq jay, jer ornı menen ta`miyinlew ha`m basqa da ma`seleler boyınsha 44 puqara mu`ra`jat etti. Kelip tu`sken mu`ra`jatlardan 8 i sol jerdin` o`zinde qanaatlandırıldı. Qalg`anları tiyisli taraw basshıları ta`repinen u`yrenip shıg`ılmaqta.

Ma`selen, rayondag`ı «Qıpshaq» awıl puqaralar jıyını aymag`ında jasawshı Roza Erdasheva bıyıl Qaraqalpaq ma`mleketlik universitetinin` ekologiya fakul`tetine to`lemli sha`rtnama tiykarında oqıwg`a qabıllandı. Degen menen shan`araq jag`dayına bola  sha`rtnama to`leminen qıynalıp, ta`lim kredit alıwg`a ja`rdem sorap ko`shpeli qabıllawg`a mu`ra`jat etti. Onın` bul mu`ra`jatı tiyisli sho`lkemler ta`repinen qanaatlantırıldı. Sonday-aq, «Orta qala» awıl puqaralar jıyını aymag`ınan Maxsud Yuldashev «Temir beton» juwapkershiligi sheklengen ja`miyetine, «Du`rmen» awıl puqaralar jıyını aymag`ında jasawshı Dilaram Raximova rayondag`ı 23-sanlı ulıwma bilim beriw mektebine  o`z qa`nigelegi boyınsha jumısqa ornalasatug`ın boldı.

Usı ku`ni rayondag`ı «Tasjap» awıl puqaralar jıyını aymag`ında u`y-jayg`a mu`ta`j, imkaniyatı sheklengen puqaralarg`a qurılg`an eki qabatlı  16 kvartiralı turaq jaydın` paydalanıwg`a tapsırıw saltanatı bolıp o`tti.

Prezidentimiz Shavkat Mirziyoevtın` 2016-jıl 21-oktyabr`degi «2017-2021-jıllarda awıllıq jerlerde jan`alang`an u`lgili joybarlar boyınsha arzan u`y-jaylar qurıw bag`darlaması haqqında»g`ı ja`ne 2016-jıl 22-noyabr`degi «2017-2020-jıllarda qalalarda arzan ko`p kvartiralı u`y-jaylar qurıw ja`ne rekonstruktsiyalaw bag`darlamasın a`melge asırıwg`a baylanıslı qosımsha ilajlar haqqında»g`ı qararlarına muwapıq tiykarınan kem ta`miyinlengen, jas shan`araqlar, jalg`ız baslı puqaralar usınday u`y-jaylar menen ta`miyinlenbekte. Ulıwma smetalıq bahası 1 milliard 284 million sum bolg`an bul jaydı «Mang`ıt invest maksimum» juwapkershiligi sheklengen ja`miyetinin` qurılısshıları qurıp pitkerdi.

Jen`illikli u`y-jay alıw baxtına miyasar bolg`anlardın` arasında birinshi ha`m ekinshi topar mayıpları Da`rmenjan  Ibadullaeva, Yulduz Karimova, Minavar Sultanova, Sharofat Raximovalar bar. Atap o`tetug`ın na`rse, bul puqaralardın` u`y-jayları ushın baslang`ısh to`lemler «O`zbekpaxtasanaat» aktsionerlik birlespesi ha`m «Ma`ha`lle» qayırqomlıq ja`miyetlik fondı ta`repinen to`lep berildi.

-Bunday g`amxorlıg`ı ushın Hu`rmetli Prezidentimiz Shavkat Mirziyoevqa sheksiz minnetdarshılıq bildiremiz,-deydi jan`a u`y-jay iyelerinen biri, «Jasorat» medalının` iyesi Da`rmenjan  Ibadullaeva. -Usı jıl  iyun` ayında rayonımızda bolıp o`tken ko`shpeli qabıllawda mag`an zamanago`y tigiw mashinası berilgen edi. Ha`zir  paxta tazalaw zavodı menen sha`rtnama tiykarında jumıs alıp barıp atırmız. Ka`rxana ta`repinen bizlerge miynet da`ptershesi ashılıp, salıqtan jen`illik berilmekte. En` baslısı, alg`an da`ramatımız esabınan u`y-jaydın` to`lemin to`lep baramız.

Jan`a u`y-jaydın` paydalanıwg`a tapsırılıwı haqıyqıy bayramg`a ulasıp ketdi. Bul jerde jaqın ku`nlerde eki qabatlı  16 kvartiralı ja`ne bir turaq jay paydalanıwg`a tapsırıladı.

Haqıyqatında da, 2017-2020-jıllarda O`zbekistan Respublikasın rawajlandırıwdın` bes a`hmiyetli jo`nelisi boyınsha qabıl etilgen Ha`reketler strategiyasında belgilengen «Xalıq ma`mleketlik uyımlarg`a emes, al ma`mleketlik uyımlar xalqımızg`a xızmet etiwi kerek» degen printsip bu`gingi ku`ni elimiz siyasatının` en` a`hmiyetli bag`darının` birine aylanbaqta. Bunı orınlarda o`tkerilip atırg`an ko`shpeli qabıllawlar mısalınan da ko`riwimizge boladı.

Bunday ko`shpeli qabıllaw Taxtako`pir, Moynaq, Qanlıko`l rayonlarında da bolıp o`tti. Olarda usı rayonlardan tısqarı Shımbay, Qarao`zek, Kegeyli, Qon`ırat, Shomanay rayonlarının` puqaraları da qabıl etildi. Ko`shpeli qabıllaw shen`berinde u`y-jayg`a mu`ta`j, imkaniyatı sheklengen puqaralarg`a turaq jaylar tapsırıldı.

D.ABIBULLAEV

Qaraqalpaqstan xabar agentliginin` xabarshısı.