Usı jılı 4-sentyabr` ku`ni «Uz–Kor Gas Chemical» qospa ka`rxanasının` buyırtpası menen Qon`ırat rayonı «Qırıq qız» posyolkasında jan`a zamanago`y 384 orınlıq mekteptin` ashılıw saltanatı bolıp o`tti.

Jan`adan qurılg`an mektep arxitekturalıq dizaynı, oqıwshılar ha`m mug`allimler ushın jaratılg`an sharayatları boyınsha respublikamızdın` basqa mekteplerinen ajıralıp turadı. Mektep a`tirapında a`jayıp landshaftlı dizayn ornatılg`an, basqa mekteplerde ushıraspaytug`ın bahası 4 milliard sumg`a ten` bolg`an sport yadrosı, zamanago`y sport zalı, ag`ashtan gezlemeler islep shıg`arıw stanokları, qızlar ushın tigiw mashinaları qurılg`an miynet kabinetleri, lingafon kabineti, 14 tu`rdegi milliy a`sbaplar alıp kelingen muzıka kabineti, ja`mi 22 dana komp`yuter ornatılg`an eki informatika kabineti, kitapxana, 120 orıng`a mo`lsherlengen belsendiler zalı tolıq paydalanıwg`a tayar.

Mekteptegi zamanago`y texnologiyalar tiykarında qurılg`an sport yadrosı ayrıqsha itibardı tartadı. 250 kvadrat metrli jasalma gazon menen qaplang`an futbol maydanshası balalarg`a su`yikli sport penen shug`ıllanıw ushın tayar tur. Shveytsariya texnologiyaları boyınsha rezinalı qaplamalar menen u`skenelengen basketbol, voleybol maydanshaları, tennis kortı, 250 metrlik juwırıw jolı da xalıqaralıq standartlarg`a juwap beretug`ın barlıq qolaylıqlarg`a iye orınlar sanaladı. Bul rezina qaplamaları 10 jıllıq kepillikke iye.

2 million 680 mın` AQSh dolları jumsalg`an bul zamanago`y ob`ekt 6 ay dawamında bas bo`lip alıp islewshi «ENEP» shet el ka`rxanası, «Alrut Build» JShJ nin` qolı gu`l ustaları ta`repinen sapalı etip qurıp pitkerildi. Ob`ektte 200 den aslam jumısshı ha`m injenerler tınımsız jumıs alıp bardı.

– Bizin` «Qırıq qız» posyolka puqaralar jıyınında 700 shan`araqta 4 mın`g`a jaqın puqaralar jasaydı, sonnan 500 ge shamalası mektep jasındag`ı balalar, – deydi puqaralar jıyını aqsaqalı Farxad Kulbaev. – Puqaralar jıyınında jasawshılardın` barlıg`ı «Uz-Kor Gas Chemical» qospa ka`rxanasına, «ENEP» shet el ka`rxanası, «Alrut Build» JShJ nin` qolı gu`l ustalarına sheksiz minnetdarshılıg`ın bildiredi, sebebi balalarımızdın` bunday zamanago`y, respublikamızda ten`i joq bilim da`rgayında oqıp, ta`lim alıw imkaniyatına iye bolıp atır.

Ashılıw ma`resimi mektep oqıwshılarının` kontsert bag`darlaması menen juwmaqlandı.

Ilajg`a Qon`ırat rayonının` ha`kimi Sh.Temirbaev, U`stirt gaz-ximiya kompleksinin` direktorı T.Juraev qatnastı.

M.IGILIKOVA,

Qaraqalpaqstan xabar agentiliginin` xabarshısı