Bu`gingi ku`nde respublikamızdın` barlıq jerlerinde u`lken qurılıs jumısları alıp barılmaqta. Jan`adan-jan`a imaratlar boy tiklep, abadanlastırıw jumısları qızg`ın pa`t almaqta.

Usınday u`lken qurılıs jumıslar 4-5-jıl burın No`kis qalasınan No`kis rayonına shıg`a beriste «Qattıag`ar» elatının` tusındag`ı ashıq jerde  baslang`an edi. Ha`zirgi ku`ni bul jerde zamanago`y imaratlar boy tikledi ha`m jan`a «Uzınko`l» atlı elat payda boldı. Biraq, ulıwma bilim beriw mektepleri bul jerlerden uzaqta jaylasqanlıg`ı sebepli, oqıwshı balalar uzaqqa qatnap oqıytug`ın edi.

Ha`mmemizge belgili, Prezidentimiz usı jıl 20-21-yanvar` ku`nleri respublikamızg`a saparı dawamında bilimlendiriw tarawına da u`lken kewil bo`lip, bir qatar tapsırmalar bergen edi. Tapsırmalar tiykarında usı jıldın` fevral` ayında jan`a elat ushın jan`a zamanago`y tiptegi mektep qurıp beriw boyınsha jumıslar baslap jiberildi. Bul ushın 3 milliard 423 million sumlıq qarjı jumsalıp, jumıslar qızg`ın tu`rde alıp barıldı ha`m 2017-2018-jan`a oqıw jılı aldınan mektep tolıg`ı menen qurıp pitkerilip, paydalanıwg`a tapsırıldı.

2-sentyabr` ku`ni usı mekteptin` ashılıw ma`resimi bolıp o`tti.

Og`an Qaraqalpaqstan Respublikası Ministrler Ken`esi, Xalıq bilimlendiriw ministrligi basshıları, rayon ha`kimiyatının`, ka`rxana ha`m sho`lkemlerdin` basshıları, mektep oqıwshıları, mug`allimler menen oqıwshılardın` ata-anaları, aymaq belsendileri, g`alaba xabar qurallarının` xızmetkerleri qatnastı.

Ilajda Qaraqalpaqstan Respublikası Xalıq bilimlendiriw ministri Q.Bekturdiev, rayon ha`kimi A`.Seytaxov ha`m basqalar shıg`ıp so`ylep, jıynalg`anlardı bayram menen qızg`ın qutlıqladı.

Mektep 315 orıng`a mo`lsherlengen. Oqıwg`a 310 oqıwshı, jumısqa jan`adan 32 mug`allim qabıl etildi. Mektepte 12×24 ko`lemdegi jan`a sport zalı qurılg`an, stadion bar, mug`allimler xanası, ximiya, biologiya, fizika laboratoriyaları, informatikalıq, meditsinalıq xanaları islep tur.

U`yinin` qasınan taza mektep salınıwı, a`sirese oqıwshılar ushın u`lken quwanıshlı waqıya boldı.

– Men 2015-jıldan beri usı jerde jasayman. Biraq jaqın jerde mektep bolmag`anı ushın, aeroport bettegi 9-mektepke qatnap oqıytug`ın edim. U`yimizdin` qasınan mektep ashılg`anı jaqsı boldı,-deydi mekteptin` 6-klass oqıwshısı S.Xojametova.

Ilajg`a Qaraqalpaqstan Respublikası Ministrler Ken`esinin` Baslıg`ı Q.Sariev qatnastı.

A`.Jiyemuratov,

Qaraqalpaqstan xabar agentliginin` xabarshısı.