https://kknews.uz/wp-content/uploads/2017/08/22-800x532.jpg

Ba`rshemiz asıg`ıp ku`tken en` ullı, en` a`ziz bayramımız – Watanımız g`a`rezsizliginin` jigirma altıjıllıq bayramı elimizdin` barlıq orınlarda ko`terin`ki ruwxta o`tpekte. Usınday bayram ilajları «Pidayın` bolg`aymız senin`, O`zbekistan!» su`reni astında U`stirt gaz ximiya kompleksinde bolıp o`tti.

Og`an Qon`ırat rayonı ha`kimi Sh.Temirbaev, Moynaq rayonı ha`kimi S.Daniyarov, O`zbekistan Jaslar awqamı Qaraqalpaqstan Respublikası ken`esi baslıg`ı A.Daniyarov, ma`keme, ka`rxana basshıları, miynet ja`ma`a`tleri, jaslar qatnastı ha`m bayram menen qutlıqladı.

Ilajda shıg`ıp so`ylegenlerdin` atap o`tkenindey, barlıq taraw wa`killeri ullı bayramımızg`a joqarı tabıslar, jetiskenlikler menen jetip keliwge umtıladı.

U`stirt gaz ximiya kompleksinde islep shıg`arılıp atırg`an polietilen ha`m polipropilen o`nimlerinin` 90 protsenti eksportqa bag`darlang`an bolıp, ol o`nimler Rossiya, Qazaqstan, Tu`rkiya, Qubla Koreya, Qıtay,  Qırg`ızstan, Latviya, Awg`anstan, Tu`rkmenstan, Bolgariya, Italiya, Ukraina, Shveytsariya, Gruziya, Belorussiya, Germaniya sıyaqlı ellerge satılmaqta. Bir g`ana yarım jıllıqtın` ozinde jan`adan altı ma`mleket bazarlarına o`nimlerdin shıg`arılıwı jolg`a qoyıldı.

Ilajda U`stirt gaz ximiya kompleksinde o`zlerinin` pidayı miyneti, intası, elimizdin` ekonomikasına ha`m eksport potentsialının` rawajlanıwına u`les qosıp kiyatırg`an 20 jumısshıg`a Qaraqalpaqstan Respublikası Ministrler Ken`esinin`, Qon`ırat rayonı ha`kimiyatının` ha`m U`stirt gaz ximiya kompleksinin` Hu`rmet jarlıqları menen bahalı sawg`alar tapsırıldı.

Sonday-aq, bayramımızdın` jigirma altı jıllıg`ına bag`ıshlap sporttın` altı tu`ri (futbol, basketbol, voleybol, shaxmat, shashka, stol tennisi) boyınsha ja`ma`a`t arasında o`tkerilgen jarıs jen`impazların sıylıqlaw ma`resimi de o`tkerildi. Onda en` jaqsı oyınshılar menen ja`ma`a`tler xoshametlendi.

– Elimizdegi en` iri ka`rxanalarınan biri sanalatug`ın miynet ja`ma`a`timizdin` basım ko`pshiligi otız jasqa shekemgi xızmetker qurag`anlıg`ı sebepli bizin` kompleksimizdi xalıq arasında jaslar kompleksi dep te atap ketken, – deydi «Uz-Kor Gas Chemical» qospa ka`rxanasının` Oraylıq zavod laboratoriyası baslıg`ı, ta`jiriybeli jas qa`nige Abbaz Sulaymanov.

Bayram ilajları kontsert bag`darlaması menen dawam etti.

Ilajg`a Qaraqalpaqstan Respublikası Joqarg`ı Ken`esininn` komitet baslıg`ı S.Turmanov qatnastı.

 

M.IGILIKOVA,

Qaraqalpaqstan xabar agentliginin` xabarshısı