PREZIDENTIMIZDIŃ TARIYXÍY QARARÍ ÁDEBIYaTÍMÍZDÍ, RUWXÍY DÚNYaMÍZDÍ RAWAJLANDÍRÍWDA JAŃA DÁWIRDI BASLAP BERDI

Prezidentimiz Shavkat Mirziyoevtiń 5-apreldegi «Ózbekstan Jazıwshılar awqamınıń jumısın bunnan bılay da jetilistiriw ilajları haqqında»ǵı qararı qabıl etiliwi múnásibeti menen Ózbekstan Jazıwshılar awqamında ilaj bolıp ótti.

Oǵan mámleketlik hám jámiyetlik shólkemlerdiń wákilleri, shayır hám jazıwshılar, ádebiyattanıwshı ilimpazlar, jas dóretiwshiler, ǵalaba xabar qurallarınıń xızmetkerleri qatnastı.

Prezidentimizdiń «Ózbekstan Jazıwshılar awqamınıń jumısın bunnan bılay da jetilistiriw ilajları haqqında»ǵı qararın Ózbekstan Respublikası Prezidentiniń Mámleketlik keńesgóyi X.Sultanov oqıp esittirdi hám onda belgilengen wazıypalar boyınsha tolıq túsinik berdi.

Mámleketimiz basshısı tárepinen barlıq tarawlardıń qatarında ádebiyat, kórkem óner hám mádeniyattıń rawajlanıwına ayrıqsha itibar qaratılmaqta. Ózbekstan Respublikasın 2017-2021-jıllarda rawajlandırıw boyınsha Háreketler strategiyasında belgilep berilgen tiykarǵı wazıypalardı, sonıń ishinde, «Mámleket – ruwxıylıqtıń bas qáwenderi», degen tiykarǵı princip turmısqa izbe-iz engizilmekte. Prezidentimizdiń 2017-jıl 3-avgusttaǵı Ózbekstan dóretiwshi zıyalıları wákilleri menen ushırasıwında alǵa qoyılǵan wazıypalardıń orınlanıwı boyınsha áhmiyetli hújjetler qabıl etilip, úlken jumıslar ámelge asırılmaqta. Ásirese, Prezidentimizdiń elimizdegi jetekshi dóretiwshilik shólkemlerdiń «Doslar klubları»n shólkemlestiriw, olarǵa iri kárxana, bank hám kompaniyalardı qáwender sıpatında biriktiriw, shártnama tiykarında olardıń turaqlı birge islesiwin jolǵa qoyıw baslaması búgin óz nátiyjesin bermekte.

Milliy ádebiyatımızdıń rawajlanıwın jańa basqıshqa kóteriw boyınsha da keń kólemli jumıslar alıp barılmaqta. Sonıń ishinde, Ózbekstan Jazıwshılar awqamınıń «Dúrmen» dóretiwshilik úyi hám poliklinikası túp-tiykarınan rekonstrukciyalandı. Awqam janınan «Ijod» jámiyetlik qorı dúzildi. Paytaxtımızda Jazıwshılar qıyabanı qurıldı, Jazıwshılar awqamı ushın jańa imarat qurılıp, aymaqlarda ullı jazıwshılarımızdıń ismi menen atalǵan dóretiwshilik mektepleri, mádeniyat hám dem alıw baǵları jaratılmaqta. Belgili jazıwshılardıń yubiley sáneleri keńnen belgilenbekte, talantlı jaslardı tárbiyalaw, olardı qollap-quwatlaw maqsetinde túrli dóretiwshilik ánjumanlar ótkerilmekte. Jas shayır hám jazıwshılardıń birinshi kitapları mámleket esabınan kóp mıń tirajlarda basıp shıǵarılıp, bilimlendiriw mákemelerine hám kitapxanalarǵa jetkerip berilmekte. Kitap ónimlerin basıp shıǵarıw hám tarqatıw sistemasın rawajlandırıw, kitap oqıwdı hám kitapqumarlıq mádeniyatın arttırıw jáne úgit-násiyatlaw baǵdarında izbe-iz jumıslar ámelge asırılmaqta. Tuwısqan xalıqlardıń ullı jazıwshılarınıń dóretiwshilik miyrasın keńnen úyreniw hám úgit-násiyatlaw, tuwılǵan kúnlerin belgilew boyınsha áhmiyetli hújjetlerdiń qabıl etiliwi xalıqlarımız arasındaǵı mádeniy-ádebiy baylanıslardı bunnan bılay da rawajlandırıwǵa xızmet etedi.

Prezidentimizdiń «Ózbekstan Jazıwshılar awqamınıń jumısın bunnan bılay da jetilistiriw ilajları haqqında»ǵı qararı bul baǵdardaǵı jumıslardıń logikalıq dawamı bolıp tabıladı.

Ilajda Jazıwshılar awqamı baslıǵı M.Ahmedov, Qaraqalpaqstan Jazıwshılar awqamı baslıǵı K.Karimov, Ózbekstan xalıq shayırı M.Toir, jas dóretiwshi N.Jwraev, M.Abbosova hám basqalar ruwxıylıǵımızǵa joqarı itibardıń ayqın kórinisi bolǵan bul tariyxıy qarar ádebiyatımızdıń rawajlanıwı jolında jańa basqıshtı baslap beretuǵının ayrıqsha atap ótti.

Qararda atap ótilgenindey, ózbek ádebiyatınıń búgingi rawajlanıwında 80 jıldan aslam tariyxqa iye, elimizdegi abıroylı dóretiwshilik shólkemlerden biri esaplanatuǵın Ózbekstan Jazıwshılar awqamınıń múnásip ornı bar. Házirgi waqıtta Jazıwshılar awqamınıń tiykarǵı jumıs baǵdarları, onıń Rejesi hám strukturalıq dúzilisi búgingi dáwir talaplarına tolıq juwap bermey atır. Bazar ekonomikası hám globallasıw processlerine baylanıslı házirgi qıyın sharayatta Ózbekstan Jazıwshılar awqamı aǵzalarınıń turmıslıq máplerin támiyinlew, olardıń jámiyetti rawajlandırıw ushın sheksiz áhmiyetke iye bolǵan mashaqatlı dóretiwshilik miynetin múnásip qádirlew, ádebiyat hám kórkem óner tarawın hár tárepleme rawajlandırıw, kórkem dóretiwshilerdiń jámiyetimiz turmısındaǵı ornın hám tásirin kúsheytiw, talantlı jas dóretiwshilerdi sistemalı tiykarda tárbiyalaw hám basqa da oǵada áhmiyetli baǵdarlarda qalaqlıqqa jol qoyılmaqta.

Jigirma tórt bántten ibarat bul tariyxıy hújjette Ózbekstan Jazıwshılar awqamınıń jumısın jetilistiriw hám onıń jumıs nátiyjeliligin bunnan bılay da arttırıw, awqam aǵzalarınıń jámiyetlik-ruwxıy belsendiligin hám juwapkershiligin arttırıw, olardı joqarı dárejedegi kórkem shıǵarmalar dóretiwge xoshametlew, olardıń materiallıq hám ruwxıy máplerin, avtorlıq huqıqların qorǵaw, awqamnıń abıroyın hám joqarı statusın múnásip saqlaw, onıń quramınıń sapasın jaqsılaw maqsetinde shólkemge aǵzalıqqa qabıl etiw boyınsha zamanagóy hám tásirsheń ólshemlerdi belgilew, jas talant iyelerin izlep tabıw, olardıń talantın júzege shıǵarıw, dúnya ádebiyatınıń eń jaqsı úlgilerin ózbek tiline awdarıw hám basıp shıǵarıw, klassikalıq hám zamanagóy ádebiyatımızdıń eń tańlamalı úlgilerin shet tillerge awdarıw hám shet tillerde úgit-násiyatlaw sistemasın jaratıw, ózbek tilindegi Internet ádebiyatın qáliplestiriw sıyaqlı oǵada áhmiyetli hám baslı wazıypalar belgilengen.

– Elimizde sońǵı jıllarda júz berip atırǵan úlken ózgerisler biz, dóretiwshilerdi tolqınlandırıp jibermekte. Prezidentimizdiń jumısında xalıqtıń kewline jol tabıw, adamlardıń dártin tıńlaw, mashqalalardı sheshiw menen birge, ruwxıylıǵımızǵa, ádebiyatqa, kórkem ónerge úlken itibar ayqın kózge taslanıp atırǵanınıń gúwası bolmaqtamız, – deydi «Yoshlik» jurnalınıń bas redaktorı, shayır, Nodir Jonuzoq. – Bular bir-birine óz-ara baylanıslı ekenin atap ótiwdi qáler edim. Sebebi ádebiyat xalıqtıń kewlin úyrenedi, adamlardıń qálbin jarqın boyawlarda jetkeriwge xızmet etedi. Mámleketimiz basshısınıń «Ózbekstan Jazıwshılar awqamınıń jumısın bunnan bılay da jetilistiriw ilajları haqqında»ǵı qararı ádebiyatqa itibardıń eń joqarı úlgisi boldı. Qarardıń hár bir bántinde ádebiyat álemin hár bir tárepine tereń kirip barılǵan. Ásirese, ádebiy basılımlar redakciyalarınıń materiallıq-texnikalıq bazasın bekkemlew, olar menen jetekshi kárxanalar arasında «Doslar klubları»n dúziw wazıypaları belgilep qoyılǵanı ádebiyat basılımları xızmetkerlerin oǵada quwanıshqa bólep jiberdi. Búgin kewlimiz quwanıshqa, minnetdarshılıqqa tolǵan kún. Bul bizge úlken yosh deregi bolıp xızmet etpekte.

– Búgin dóretiwshilerdiń júreginde maqtanısh, quwanısh sezimleri atlıǵıp tur, – deydi Ózbekstan Jazıwshılar awqamı Sırdárya wálayatı bóliminiń basshısı, Ózbekstanda xızmet kórsetken mádeniyat xızmetkeri Hayotxon Ortiqboeva. – Prezidentimizdiń ádebiyatımızdıń rawajlanıwın jolındaǵı áhmiyetli qararı Ózbekstan Jazıwshılar awqamına jańa ruwx, jańa ómir baǵıshladı. Hújjettiń mazmunına tereń názer salatuǵın bolsaq, onıń tiykarında dóretiwshilerge joqarı itibar hám húrmet, xalıqtıń mádeniyatın bunnan bılay da arttırıw maqseti jámlengenin kóriw múmkin. Bul qarar bizdi bunnan bılay da kóbirek dóretiwshilikke shaqırıw menen birge, jas talant iyelerin, ádebiyatımızdıń jańa áwladın tárbiyalawda úlken áhmiyetke iye.

– Bul tariyxıy hújjet hár bir dóretiwshini óz jumısına ele de juwapkershilik penen qarawǵa shaqıradı, – deydi Ózbekstan Jazıwshılar awqamınıń aǵzası, shayır Faxriddin Hayit. – Prezidentimiz biz, dóretiwshilerge usınday itibar hám ǵamqorlıq kórsetip atırǵan eken, bul itibarǵa óz shıǵarmalarımız benen múnásip juwap beriwdi parızımız dep bilemiz.

Usı kúni «Dúrmen» dóretiwshilik úyinde dóretiwshiler ushın bayram ilajı shólkemlestirildi. Onda Ózbekstan Jazıwshılar awqamınıń jańa aǵzalarına aǵzalıq gúwalıqları tapsırıldı.

– Búgin ádebiyat xalqı ushın úlken bayram. Kúni Keshe mámleketimiz basshısı tárepinen ádebiyatımızdı, mádeniyatımızdı jetilistiriw jolındaǵı áhmiyetli hújjetke qol qoyılǵanı bárshemizdi quwandırıp jiberdi, – deydi awqam aǵzası, jazıwshı Nurilla Chori. – ásirese, men ushın búgin eki ese quwanısh. Ózbekstan Jazıwshılar awqamınıń jańa tuwılǵan kúni, dep tán alınıp atırǵan sánede awqam aǵzalıǵına qabıl etilgenin, ustazlarım meni ózleriniń qatarına múnásip kórgeninen quwanıshlıman. Bul ele de tınbay izleniwge, ádebiyatımızǵa múnásip úles qosıw juwapkershiligi menen jasawǵa shaqıradı.

Ilajda kórkem óner xızmetkerleriniń qatnasıwında koncert baǵdarlaması qoyıldı, dóretiwshiler ushın bayram dástúrxanı jayıldı.

Bayram AYTMURATOV,

ÓzAnıń xabarshısı

  30.04.2018, 11:01  |    67 ma'rte ko'rildi

Raxmet

Sayt administratsiaysi qa'te tekst haqqinda xabarlandirildi