SAVICKIY MUZEYINE 3 AYDA 6 YaRÍM MÍŃNAN ASLAM ADAM SAYaXAT ETTI

Usı jıldıń yanvar, fevral, mart ayları dawamında respublikamızdıń derlik barlıq qala hám wálayatlarınan, rayonlardan I.V.Savickiy muzeyine 6 yarım mıńnan aslam adam sayaxat etken.


Eki ekspoziciyalıq kórgizbe imaratına iye muzeydiń birinshi imaratında 2000ǵa jaqın eksponatlar bar bolıp, olar Áyyemgi Xorezm mádeniyatı, qaraqalpaq qol óneri, zamanagóy qaraqalpaq óneri, Ózbekstan súwretlew óneri, XX ásir baslarındaǵı Rossiya kórkem óneri (reńli súwretlew, grafika, músinshilik, ámeliy dekorativlik óner) dóretpeleri orın alǵan. Ekinshi imaratta 400ge jaqın eksponatlar jaylasqan.

Sayaxatshılardı, ásirese, shet elli turistlerdi muzeydegi jivopislik, grafikalıq dóretpeler hám qaraqalpaq milliy kiyim-kenshekleri, qara úy hám onıń bezewleri jáne arxeologiyalıq buyımlar, sonday-aq, rus avangardları oǵada qızıqtırmaqta, – deydi muzey direktorı Gúlbáhár Izentaeva.


Málim bolıwınsha, mart ayınıń ózinde Jizzaqtan 95, Xorezmnen 245, Tashkent qalasınan 487, Nókis qalasınan 1161, Ámiwdáryadan 87, Qońırattan 104, Taxtakópirden 59, Shımbaydan 76, Shomanaydan 38, Ellikqaladan 214, jámi barlıq qala hám rayonlardan, wálayatlardan 3634 sayaxatshılar kelip tamashalaǵan.


«Sahradaǵı Luvr» atı menen dúnyaǵa dańq taratqan muzeyge qızıǵıwshı shet elli sayaxatshılar sanı da artpaqta. Ásirese, Rossiya, Franciya, Germaniya, Qıtay, Yaponiya, Indoneziya, Italiya, Belgiya, Gollandiya, Avstriya, Meksika, Ispaniya, Amerika, Chexiya, Ukraina, Angliya, Hindstan hám t.b. ellerinen kóplep sayaxatshılar kelmekte.

Esletip ótemiz, Ózbekstan Respublikası Prezidentiniń 2017-jıl 28-dekabrdegi «2018-jılda rásmiy sánelerdi belgilew dáwirinde qosımsha islemeytuǵın kúnlerdi belgilew hám dem alıs kúnlerin kóshiriw haqqında»ǵı Pármanına muwapıq Nawrız bayramı qarsańında ishki turizmdi rawajlandırıw ushın 5 kún qatarına dem alıs kúnleri berilgen edi. Áyne usı bes kúnde muzeyge sayaxat etiwshiler sanı ádewir artqan.

Tárbiya SEYTNAZAROVA,

Qaraqalpaqstan xabar agentligi xabarshısı

  30.04.2018, 10:28  |    46 ma'rte ko'rildi

Raxmet

Sayt administratsiaysi qa'te tekst haqqinda xabarlandirildi