ShÍMBAYDA LAPGÓY HÁM QÍZÍQShÍLAR TAŃLAWÍ ÓTKERILDI

Shımbay rayonlıq mádeniyat bóliminde 27-mart–xalıqaralıq teatrlar kúni múnásibeti menen Qaraqalpaqstan Respublikası Mádeniyat ministrligi tárepinen shólkemlestirilgen háwesker xalıq teatr jámáátleri drama hám quwırshaq teatrlarınıń jáne 1-aprel–kúlki kúni múnásibeti menen Jaqsımbay Bekmuratov hám Shamurat Ótemuratovlardıń jarqın esteligine arnap «Xosh keypiyat» atamasındaǵı respublikalıq lapgóyler hám qızıqshılar tańlawınıń Qaraqalpaqstan Respublikalıq basqıshı ótkerildi.

Hár jılı ótkeriliwi dástúrge aylanǵan bul tańlawǵa respublikamızdıń barlıq qala hám rayonlarınan 16 jámáát qatnastı.

Tańlawda tájiriybeli tóreshiler tárepinen óziniń tásirsheńligi, ayrıqshalıǵı menen kózge taslanǵan spektakler jeńimpaz dep tabıldı. Atap aytqanda, Shımbay rayonı xalıq teatrı tárepinen saxnaǵa qoyılǵan B.Aytmuratovtıń «Balalıq», M.Begimovtıń «Írzalasqan adamlar» spektaklleri birinshi, Taxtakópir rayonı xalıq teatrınıń D.Seytnazarovtıń «Lepesbay» spektakli ekinshi, Tórtkúl rayonı xalıq teatrı tárepinen saxnalastırılǵan H.Xojaniyazovtıń «Aldanǵan qız» spektakli úshinshi orınǵa ılayıqlı dep tabıldı.

Qaraózek hám Qanlıkól rayonı xalıq teatrları jámááti belsendi qatnasqanı ushın «Húrmet jarlıq» penen sıylıqlandı.


Xalqımızdıń qızıǵıp tamashalaytuǵın lapgóylik hám qızıqshılıq, miniatyura kórkem ónerin ele de keńnen en jaydırıw, rawajlandırıw, milliy úrp-ádet hám dástúrlerimizdi keleshek áwladqa jetkerip beriw maqsetinde shólkemlestirilgen «Xosh keypiyat» lapgóy hám qızıqshılardıń bellesiwi haqıyqıy talantlılırdıń saxnada óz ónerlerin kórsetip beretuǵın tańlawı boldı.

Tańlawda qatnasıwshılar qızıqlı waqıyalardı, qısqa intermediyalardı hám saxnalıq kórinislerdi ózleriniń aktyorlıq sheberligi menen tamashagóyler názerine usınıp, olardıń alǵısına miyasar boldı. Olardan taxtakópirli qızıqshılar B.Sultanov, Sh.Embergenov, J.Berdimuratovlar birinshi, lapgóyligi menen kózge túsken shımbaylı qızıqshılar R.Qudaybergenov, E.Allanazarovlar ekinshi, xojelishi qızıqshı S.Satullaev úshinshi orın jeńimpazları boldı.

Shomanay hám Kegeyli rayonınıń qızıqshıları «Húrmet jarlıq» penen sıylıqlandı.

Esletip ótemiz’ qos tańlawdıń birinshi orın jeńimpazları 5-6-aprel kúnleri aralıǵında Tashkent qalasında ótkeriletuǵın basqıshqa qatnasıw imkaniyatına iye bolıp, jollamanı qolǵa kirgizdi.

Jeńimpazlar shólkemlestiriwshiler tárepinen tayarlanǵan estelik sawǵaları hám diplom menen sıylıqlandı.

Tárbiya SEYTNAZAROVA,

Qaraqalpaqstan xabar agentligi xabarshısı

  30.04.2018, 09:54  |    49 ma'rte ko'rildi

Raxmet

Sayt administratsiaysi qa'te tekst haqqinda xabarlandirildi