27-mart-Xalıqaralıq teatrlar kúni. Bul sáne hár jılı respublikamızda kóterińkilik penen belgilenedi.
Teatr – bul xalqımızdıń ruwxıy dúnyasınıń ajıralmas bir bólegi bolıp, ol haqıyqıy turmıs kórinislerin sáwlelendiretuǵın mádeniy-ruwxıy dárgay bolıp esaplanadı.
Mine, usı sáne múnásibeti menen paytaxtımızdaǵı Berdaq atındaǵı Qaraqalpaq mámleketlik akademiyalıq muzıkalı teatrında bayram keshesi ótkerildi.
Teatr aldına qara úy tigilip, átirapı ráńbáreń gúller menen bezelgen. Bayram tamashalarına qatnasıwshılardı duwtarshı qızlar ózleriniń yoshlı nama-qosıqları menen kútip aldı.
Teatr foyesinde Qaraqalpaqstan Respublikası tariyxı hám mádeniyatı mámleketlik muzeyi tárepinen óziniń ómirin teatrǵa baǵıshlaǵan ustaz aktyorlardıń dóretken obrazlarınan saxnalıq kórinisleri túsirilgen súwretler kórgizbesi orın alǵan.
Sonday-aq, simfoniyalıq orkestrdiń janlı koncert baǵdarlaması jıynalǵanlarǵa ózgeshe keypiyat baǵıshladı.
Keshede Qaraqalpaqstan Respublikası Mádeniyat ministri shıǵıp sóylep, teatr xızmetkerlerin, taraw pidayıların kásiplik bayramı menen qızǵın qutlıqladı.
Qaraqalpaqstan Respublikası Joqarı Keńesi komiteti hám Mádeniyat ministrligi tárepinen tayarlanǵan «Húrmet jarlıqları» Berdaq atındaǵı Qaraqalpaq mámleketlik akademiyalıq muzıkalı teatrı, Qaraqalpaq mámleketlik jas tamashagóyler teatrı, Qaraqalpaq mámleketlik quwırshaq teatrı xızmetkerlerine tapsırıldı.
Keshe qatnasıwshılarına kórkem óner sheberleri, jas talant iyeleri hám teatrdıń balet artistleri tárepinen tayarlanǵan yoshlı qosıqlar hám ayaq-oyınlar qoyıp berildi.
Teatr aktyorları tárepinen dramaturg K.Raxmanovtıń «Ínjıqtıń muhabbatı» komediyasınan úzindi, «Parodiyashılar», «Prodyusser», «Jezde hám baldızlar», Ózbekstan mámleketlik kórkem óner hám mádeniyat institutı Nókis filialınıń talantlı studentleri atqarıwındaǵı «Studentler» intermediyası kórsetilip, jıynalǵanlarda jaqsı tásir qaldırdı.
Tárbiya SEYTNAZAROVA,
Qaraqalpaqstan xabar agentligi xabarshısı