«ABAT AWÍL» BAǴDARLAMASÍNÍŃ ORÍNLANÍWÍN TALQÍLAW HÁM ÁHMIYETLI WAZÍYPALAR

Ózbekstan Respupublikası Prezidenti Shavkat Mirziyoevtiń basshılıǵında 26-aprel kúni «Abat awıl» baǵdarlamasın ámelge asırıwdı nátiyjeli shólkemlestiriwge baylanıslı máselelerge hám bul baǵdarda eń áhmiyetli wazıypalarǵa baǵıshlanǵan videoselektor májilisi ótkerildi.

Májiliske Bas ministr, onıń orınbasarları, ministrlikler menen vedomstvolardıń juwapker adamları, Qaraqalpaqstan Respublikası basshıları, wálayatlardıń hákimleri qatnastı. Tiykarǵı itibar «Abat awıl» baǵdarlamasınıń ámelge asırılıwına baylanıslı máselelerge qaratılıp, keleshektegi wazıypalar belgilep alındı.

Atap ótilgenindey, ótken jıllar dawamında elimizdiń barlıq aymaqlarında keń kólemli dóretiwshilik jumısları alıp barıldı. Biraq alıs awıllarda jasap atırǵan ápiwayı adamlardıń jasaw sharayatın jaqsılawǵa jetkilikli itibar qaratılmadı. Bunday jaǵday usı aymaqlarda xalıqtıń narazılıǵına sebep bolıp kiyatırǵan edi.

Prezidentimiz Shavkat Mirziyoevtiń baslaması menen bunday qatnas jasawǵa shek qoyılıp, xalıqtıń jasaw sharayatın bunnan bılay da jaqsılaw boyınsha anıq hám maqsetli sistema jaratıldı. Mámleketimiz basshısınıń 2018-jıl 29-marttaǵı «Abat awıl baǵdarlaması haqqında»ǵı pármanına muwapıq, bıyıl hár bir rayonda 2 awılda, keyingi jıldan baslap bolsa hár jılı hár bir rayonda 3 awılda keń kólemli qurılıs-abadanlastırıw jumısları ámelge asırıladı.

«Abat awıl» baǵdarlamasınıń ámelge asırılıwın muwapıqlastırıw boyınsha Respublikalıq komissiya hám onıń aymaqlıq shtabları tárepinen bıyıl abat etiletuǵın 368 awıl dizimge alınıp, tastıyıqlandı.

– Sońǵı 25 jıl dawamında úlgi joybarda turaq jay qurıwdı esapqa almaǵanda, awıldıń sırtqı kórinisin jaqsılaw hám abadanlastırıw boyınsha birde-bir ámeliy jumıs islenbegen, bul ushın qarjı qárejetleri ajıratılmaǵan, – dedi mámleketimiz basshısı. – Kópshilik awıllarda kósheler, sociallıq sala obektleri, ishimlik suw, elektr támiynatı sıyaqlı áhmiyetli tarawlar jıllar dawamında qarawsız hám itibarsız qalıwı aqıbetinde tómen awhalǵa kelip qalǵan.

Prezidentimiz xalıqtıń turaq jay hám imaratlardı zamanagóy normalarǵa ámel etpegen halda, tártipsiz jáne óz bildiginshe qurıp alıwı da ápiwayı jaǵdayǵa aylanǵanına itibar qarattı.

Atap ótilgenindey, awıl xalqı «bizge usı da bola beredi», degen pikirge kónligip, óziniń kóshesin, turaq jayın hám háwlisin abat etiwge ulıwma itibar bermey qoyǵan.

Sonı esapqa alıp, bıyıl Jizzaq wálayatı Doslıq rayonındaǵı turaq jaylar menen infrastruktura obektleri sıqılsız jaǵdayǵa kelip qalǵan Manas awılında abadanlastırıw boyınsha keń kólemli jumıslar ámelge asırıldı. Nátiyjede tek ǵana 1,5 ayda bul awıl pútkkilley zamanagóy kóriniske iye boldı. Eń áhmiyetlisi, awıl xalqınıń keypiyatı, turmıs dárejesi, dúnyatanıwı hám ómirge kózqarası ózgerip, olarda erteńgi kúnge bekkem isenim payda boldı.

Sırdárya wálayatı Xovos rayonındaǵı Xovosabad awılı da abat etilip, háwes etse arzıytuǵın aymaqqa aylandırıldı.

– Manas biz ushın sonday tájiriybe mektebi boladı, eger awıllardı zamanagóy orınǵa aylandırıwdı, sociallıq-ekonomikalıq ortalıqtı jaqsılawdı, adamlardıń keypiyatın unamlı tárepke keskin ózgertiwdi aldımızǵa maqset etip, izbe-iz háreket etsek, oǵan erisiw múmkin ekenine adamlardı isendire aldıq, ózimizde de bekkkem isenim arttı, – dedi Shavkat Mirziyoev.

«Abat awıl» baǵdarlamasın orınlaw ushın zárúr bolatuǵın qarjı resurslarınıń 80 procenti mámleketlik byudjet, mámleketlik kárxanalardıń qarjıları hám olarǵa tartılatuǵın shet el kreditleriniń esabınan támiyinlenedi. Qalǵan 20 procenti isbilermenlerdiń ózlerine tiyisli bazar infrastrukturası obektlerine jumsalatuǵın qarjıları hám bank kreditleri bolıp tabıladı.

Májiliste bul baǵdarda barlıq resurslardı hám qarjılardı iske qosıw zárúrligi atap ótildi.

– Sıqılsız hám bereketi joq jerde jasap atırǵan xalıqtıń keypiyatı da, keleshekke umtılıwı da bolmaydı, – dedi Prezidentimiz. – Eger biz awıllardı abat etsek, ol jerdegi xalıqtıń keypiyatı ózgeredi, óziniń turmısın jáne de jaqsılawǵa umtılıs payda boladı, awıllardıń ekonomikası artadı. Bulardıń bári Watanımızdıń abadanlıǵı hám ekonomikalıq jaqtan rawajlanıwı ushın jáne bir áhmiyetli túrtki boladı.

Májiliste mámleketimiz basshısı bıyıl «Abat awıl» baǵdarlaması tiykarında ámelge asırılıwı zárúr bolǵan eń áhmiyetli wazıypalarǵa ayrıqsha toqtap ótti.

Bıyıl 127 mıń turaq jaydı ońlaw hám átirapın abadanlastırıw, 1 mıń 900 kilometr ishimlik suwı tarmaǵı, 850 sociallıq taraw hám 2 mıń 400 bazar infrastrukturası obektlerin qurıw jáne iri ońlaw, derlik 2 mıń kilometr elektr hám 263 kilometr gaz tarmaqların, 440 kilometr jollardı iri ońlaw, 470 zamanagóy avtobus satıp alıw, 330 dan aslam bándirgi qurıw hám jańa qatnaw baǵdarların ashıw rejelestirilgen. Bul maqsetler ushın 3 trillion 447 milliard sum qarjı ózlestiriledi.

Ótken dáwirde qurılıs-abadanlastırıw jumısları ushın 292 milliard sum qarjı qaratılıp, sonnan 87 milliard sumı tikkeley jergilikli byudjettiń esabınan ajıratıldı.

Sonıń menen birge, Tashkent, Sırdárya wálayatları hám Tashkent qalasında ajıratılǵan qarjılar jetkilikli emes. Ayırım aymaqlardıń hákimleri bul máselege ekinshi dárejeli jumıs sıpatında qarap atırǵanı kózge taslanbaqta.

Májiliste mámleketimiz basshısı qurılıs jumısların qarjılandırıw óz waqtında ámelge asırılmay atırǵanın, usı waqıtqa shekem tek ǵana 6 awıl boyınsha bas reje islep shıǵılǵanın, 81 awılda abadanlastırıw jumısları baslanbaǵanın atap ótti. Atap aytqanda, Qaraqalpaqstan Respublikası, Jizzaq, Sırdárya, Qashqadárya, Buxara, Namangan hám Samarqand wálayatlarında awıllardı abat etiw máselesine jetkilikli itibar berilmey atırǵanına toqtap ótip, bul jumıslardı jedellestiriw boyınsha juwapker adamlarǵa zárúr tapsırmalar berdi.

Kóp kvartiralı turaq jaylardıń ulıwma paydalanıw bólimlerin ońlaw, turmıslıq infrastruktura obektlerin ornalastırıw, qorshaǵan ortalıqtı tártipke keltiriw boyınsha úlgi talaplardı islep shıǵıp, jumıstı sol tiykarda shólkemlestiriw, barlıq aymaqlardaǵı qurılıslarǵa arzan hám sapalı materiallardı óz waqtında jetkerip beriw boyınsha da wazıypalar belgilendi.

Májiliste aymaqlardaǵı 336 awıllıq balalar baqshası, 318 mektep, 109 shańaraqlıq poliklinika, 79 máhálle orayı hám basqa da obektlerdiń texnikalıq jaǵdayın úyreniw, imaratlardıń sırtqı hám ishki bólegin zamanagóy talaplar tiykarında ońlaw, úskenelew, átirapın abadanlastırıw jumısların shólkemlestiriw boyınsha tapsırmalar berildi.

Jergilikli hákimliklerge awıllarda turmıslıq xızmet komplekslerin qurıw ushın zárúr jer maydanları hám bos turǵan imaratlar ajıratılıwın támiyinlew, awılǵa sanaattı alıp kiriw arqalı ıqsham hám zamanagóy jańa jumıs orınların jaratıw tapsırıldı.

Mámleketimiz basshısı abat etiletuǵın 368 awıl xalqınıń qıytaq jerlerine dáramatlı eginler egiliwin támiyinlew, kishi ıssıxanalardıń qurılısına ámeliy járdem beriw boyınsha juwapker adamlarǵa anıq wazıypalar tapsırdı.

Eń áhmiyetli máselelerden biri awıl xalqınıń ruwxıy dúnyasın bayıtıw hám huqıqıy mádeniyatın bunnan bılay da arttırıw esaplanadı. Prezidentimiz bul baǵdarda Manas awılında ámelge asırılıp atırǵan jumıslardı mısal etip keltirdi. Awıllarǵa ádillik, huqıq qorǵaw, mádeniyat, sport, bilimlendiriw, densawlıqtı saqlaw hám basqa da tarawlardıń wákilleri turaqlı túrde barıp, xalıqtıń huqıqıy, medicinalıq mádeniyatın, bilim dárejesin hám ruwxıylıǵın arttırıw boyınsha túrli ushırasıwlar, sáwbetlesiwler ótkerip barıwı zárúrligi atap ótildi.

Májiliste «Abat awıl» baǵdarlamasın ámelge asırıw boyınsha júzege kelgen kemshilikler hám olardı saplastırıwǵa qaratılǵan jumıslardı shólkemlestiriw baǵdarında kórilip atırǵan ilajlar boyınsha juwapker adamlardıń esapları tıńlandı.

Kórilgen máseleler boyınsha anıq wazıypalar hám zárúr ilajlar belgilendi.

ÓzA

  28.04.2018, 15:52  |    92 ma'rte ko'rildi

Raxmet

Sayt administratsiaysi qa'te tekst haqqinda xabarlandirildi