Paytaxtımızdaǵı «Kórgizbeler sarayı»nda Qaraqalpaqstan Respublikası Densawlıqtı saqlaw ministrligi menen «Shegarasız shıpakerler» shólkeminiń tuberkulyozge qarsı gúresiw baǵdarında birge islesiwiniń 20 jıllıǵına baǵıshlanǵan ilaj ótkerildi.
Oǵan Qaraqalpaqstan Respublikası Densawlıqtı saqlaw ministrliginiń, «Shegarasız shıpakerler» shólkeminiń basshıları, paytaxtımızda jaylasqan emlew hám profilaktika mákemeleriniń basshıları, taraw qánigeleri qatnastı.
Shıǵıp sóylewshilerdiń atap ótkenindey, 1882-jıl 24-mart kúni Robert Kox atlı shıpaker tuberkulyoz keselligin keltirip shıǵaratuǵın bakteriyanı anıqlaǵanın járiyalaǵanı sebepli, usı sáne dúnya júzilik tuberkulyoz keselligine qarsı gúresiw kúni sıpatında belgilenip kelmekte. Usı kúnnen baslap bul kesellikke qarsı gúresiw baǵdarında aytarlıqtay nátiyjelerge erisilgen. Ásirese, ekologiyalıq qıyınshılıqlardı basınan keshirip atırǵan Qaraqalpaqstanda «Shegarasız shıpakerler» shólkemi menen birge islesiw óziniń unamlı nátiyjelerin bermekte.
– Búgingi kúni respublikamızdıń barlıq rayonlarında «Hámme tuberkulyoz kesseligi menen nawqaslanǵan adamlardı kompleksli emlew» baǵdarlaması engizilgen. Oǵan tiykarlanıp nawqaslar eń zamanagóy emlew usıllarınan paydalanıw múmkinshiligine iye bolmaqta. Jaqında, Densawlıqtı saqlaw ministrligi innovaciyalıq em túrin engiziw ilajların qollap-quwatladı. Sonıń nátiyjesinde nawqaslar qısqa waqıt aralıǵında jáne óz úylerine jaqın orınlarda emleniw múmkinshiligine iye boladı,-deydi «Shegarasız shıpakerler» shólkemi jámiyetshilik penen islesiw bóliminiń qánigesi A.Babaniyazov.
Ilajda birge islesiw dawamında erisilgen nátiyjelerdi ózinde jámlegen kórgizbeli pannolar qoyıldı. Tuberkulyoz keselliginiń aldın alıw, jámiyetshiliktiń usı kesellik hám onıń aqıbetleri boyınsha xabardarlıǵın arttırıw baǵdarında járiyalanǵan materialları menen belsendilik kórsetken bir qatar jurnalistler xoshametlenip, olarǵa Húrmet jarlıqları jáne estelik sawǵaları tapsırıldı.
Esjan baqsı atındaǵı Balalar hám kórkem óner mektebi oqıwshılarınıń usı tema boyınsha sızǵan súwretleri tamashalanıp, olarǵa shólkemlestiriwshiler tárepinen tayarlanǵan xoshametlew sıylıqları tapsırıldı.
Qaraqalpaqstan xabar agentligi.
(M.Habibullaevtıń túsirgen súwretleri).