40 JÍLLÍQ ÓMIRIN TEARTǴA BAǴÍShLAǴAN INSAN

Aramızda sonday talantlı, kópshilikke belgili, miynetkesh insanlar júdá kóp. Olardıń talantın, xalıqqa islegen miynetin kórip, kóziń quwanıp, háwesiń keledi.

Hár jılı respublikamızda 27-mart «Xalıqaralıq teatrlar kúni» úlken kóterińkilik jaǵdayında ótkeriledi. Usı bayram múnásibeti menen Kegeyli rayonlıq Mádeniyat hám xalıqtıń dem alıw orayı aktrisası, óziniń 40 jıllıq ómirin kórkem ónerge, saxnaǵa baǵıshlaǵan pidayı insan Alima Saparovanı bayram menen qutlıqladıq.

A.Saparova 1958-jılı Kegeyli rayonında jumısshılar shańaraǵında dúnyaǵa kelgen. Ata-babası kórkem ónerge janı kumar adamlar bolıp, atası Sapar kosıq aytıp, xalıqtıń shın ıqlasına bólengen insanlar bolǵan.

– Mektepte oqıp júrgen waqıtlarımda kórkem ónerge bolǵan qızıǵıwshılıǵım joqarı bolıp, bayram keshelerinde ayaq oyınlarım həm saxnalıq kórinisleri menen turaqlı qatnasıp turǵanman. Sonıń nátiyjesin kásibim arqalı xalıqqa tanılıwǵa háreket etpektemen.

1977-jılı mektepti pitkergennen keyin rayonlıq mádeniyat úyine oyınshı bolıp jumısqa kirdim, saxnada spektakl, drama, intermediyalarda rol atqarǵan aktyor, aktirisalarǵa eliklep, olar oynaǵan rollerdi qaytalap, yadlap júrgen kúnlerim de bolǵan. Eń dáslepki atqarǵan rolim qazaq jazıwshısınıń «Kimge tartqan» spektaklindegi Xanipa apa roli boldı. Usı atqarǵan rolim ushın eń joqarı baldı alıp, jaqsı nətiyje kórsettim. Usı arqalı «Eń jaqsı hayal obrazı» nominaciyası jeńimpazı boldım.

Turmısqa shıǵıp, shańaraq ǵalma-ǵalı menen sharshap, geyde «usı kəsipti qoysamba eken» degen kúnlerim de bolǵan. Sonday qıyın kúnlerde ómirlik joldasım súyenish bolıp, «jumısıńdı taslama, sen xalıqqa kerekseń » dep maǵan jiger baǵıshlap turdı.

Alima Saparova həmme waqıt izleniste, dóretiwshilikte bolıp waqtın bosqa jibermedi. 1978-jılı «Ananıń kewli balada, balanıń kewli dalada», 2006-jılı P.Aytmuratovtıń «Oynaqlaǵan ot basar», 2007-jılı P.Aytmuratovtıń «Tuwǵan jer qádiri», 2008-2012-jılları B.Pirdanovtıń «Terletpe», «Sırlı súwretler», J.Serjanovtıń «Másidegi muhabbat» draması, 2013-jılı E.Aytmuratovtıń «Muqaddes hayal» spektakl, 2014-jılı J.Jaqsılıqovtıń «Aqıbet» dramasında ana rólin atqarıp Xalıq teatrı hám drama jámáátleriniń Respublikalıq tańlawlarında «Eń jaqsı rejissura» nominaciyası jeńimpaz bolıwǵa óz úlesin qostı. J.Serjanovtıń «Adasıw», S.Jumaǵulovtıń «Jeńgem aytıp edi», M.Nızanovtıń «Jıǵılsań jer kóteredi» spektakllerinde, S.Matkarimovtıń «Ómir soqpaqları» telekórsetiwlerinde ana rolin sheberlik penen atqarıp kelmekte.

Alima apanı xalqımız «Qarakalpaqfilm» kinostudiyası tárepinen súwretke alınǵan «Qońsılar» kinofilmindegi bas qaxarman-Kansulıw, «Qaysar» filmindegi shopan ǵarrınıń kempiri roli, «Qarakalpaqfilm» kinostudiyası tárepinen súwretke alınǵan «Ómirdiń úsh paslı» qısqa metrajlı kinofilminde sheberlik penen atqarıp shıqqan rolleri arqalı jaqsı tanıydı.

Alima apa saxna rollerinen basqa jámiyetlik jumıslarǵa da belsene qatnasıp, rayon kóleminde elimizdiń Ǵárezsizlik, Nawrız ulıwmaxalıqlıq bayramı sıyaqlı belgili sánelerge baǵıshlanıp ótkeriletuǵin bayram keshelerine qatnasıp kelmekte.

2013-jıldan baslap ol drama dógeregin basqarıp, óz talantın jáne de jetilistirip, óz shákirtlerine saxna sırların úyretip kelmekte. Onıń miynetleri esapqa alınıp 2011-jılı Ózbekistan Respublikası Ǵárezsizliginiń 10 jıllıǵı hám 2011-jılı 20 jıllıǵı múnásibetine kókirek belgisi menen sıylıqlandı.

Həzirgi kúnde Alima apa ómirlik joldası menen birgelikte bir ul, eki qızdı tárbiyalamaqta.

Alima apa-ómirde insan eki nárse tańlawda aljaspawı kerek biri-ómirlik joldas bolsa, ekinshisi-kásip, men ómirdegi eń baxıtlı insanman dep aytsam aljaspaǵan bolaman, sebebi ómirlik joldasım qanday qıyınshılıq bolsa da bárhama meni qollap maǵan súyew bolǵan. Perzentlerim de meniń jolımdı tutıp, úlken ulım Azamat həm qızım Ləzzet Kegeyli rayonlıq Mədeniyat həm sport isleri bóliminiń mədeniyat həm dem alıw bóliminde, al kishkene qızım Raxatay «Ayqulash juldızları» Qaraqalpaq məmleketlik milliy folklor ansamblinde oyınshı bolıp islep atır.

Gawhar BEGJANOVA,

QMU jurnalistika qánigeligi 2-basqısh studenti

  28.04.2018, 15:23  |    99 ma'rte ko'rildi

Raxmet

Sayt administratsiaysi qa'te tekst haqqinda xabarlandirildi