Usı jıl 12-aprel kúni Respublikalıq málimleme resurs orayı Balalar kitapxanasında «Ádebiyat – bárkamallıq quyashı» atamasında ádebiy ánjuman bolıp ótti. Bul ilaj Ózbekstan Respublikası Prezidentiniń usı jıl 5-apreldegi «Ózbekstan Jazıwshılar awqamınıń jumısın bunnan bılay da jetilistiriw ilajları haqqında»ǵı qararı hám onda belgilengen wazıypalarǵa baǵıshlandı.
Oǵan respublikamızǵa belgili shayırlar, jazıwshılar, ádebiyatshı ilimpazlar, Ibrayım Yusupov atındaǵı intalı balalar mektep internatınıń talantlı oqıwshıları, jas dóretiwshiler, kitap oqıwshılar, baspa sóz hám ǵalaba xabar qurallarınıń xızmetkerleri qatnastı.
Ilajdı Qaraqalpaqstan Jazıwshılar awqamınıń baslıǵı Keńesbay Karimov alıp bardı.
Ilajda Ózbekstan Respublikası Oliy Majlisi Senatınıń aǵzası, «Qaraqalpaq ádebiyatı» gazetasınıń bas redaktorı Gúlistan Matyakubova, Qaraqalpaqstan xalıq jazıwshısı Sharap Usnatdinov, filologiya ilimleri boyınsha filosofiya doktorı Jupar Qaniyazova hám basqalar shıǵıp sóylep, qarar hám onda belgilengen wazıypalar boyınsha tolıq túsinik berdi.
Ózbekstan Respublikasın 2017-2021-jıllarda rawajlandırıw boyınsha Háreketler strategiyasında belgilep berilgen tiykarǵı wazıypalarda «Mámleket – ruwxıylıqtıń bas qáwenderi», degen tiykarǵı princip turmısqa izbe-iz engizilip atırǵanlıǵı, barlıq tarawlar qatarında ádebiyat, kórkem óner hám mádeniyattıń rawajlanıwına ayrıqsha itibar qaratılǵanı, ásirese, Prezidentimizdiń elimizdegi jetekshi dóretiwshilik shólkemlerdiń «Doslar klubları»n shólkemlestiriw, olarǵa iri kárxana, bank hám kompaniyalardı qáwender sıpatında biriktiriw, shártnama tiykarında olardıń turaqlı birge islesiwin jolǵa qoyıw baslaması búgin óz nátiyjesin berip atırǵanı ayrıqsha tilge alındı.
Usı qararda Ózbekstan Jazıwshılar awqamnıń aǵzası bolǵan hár bir dóretiwshiniń avtorlıq huqıqın qorǵaw, olarǵa sharayat jaratıp beriw ayrıqsha kórsetip ótilgen.
Ilajda kekse áwlad wákilleriniń dóretiwshilik sheberligin jaslarǵa sińdiriw, jas talantlılardı qollap-quwatlaw, dúnya ádebiyatınıń eń jaqsı úlgilerin qaraqalpaq tiline, milliy ádebiyatımızdıń eń jaqsı shıǵarmaların shet tillerge awdarıw hám úgit-násiyatlawdı jolǵa qoyıw, internet ádebiyatın qáliplestiriw sıyaqlı áhmiyetli usınıslar ortaǵa taslandı.
Ánjuman qatnasıwshıları qarar tiykarında ózleriniń pikir-usınısların bildirip, qaraqalpaq ádebiyatı aldında turǵan wazıypalardı keńnen talqıladı.
Á.Jiemuratov,
Qaraqalpaqstan xabar agentliginiń xabarshısı.