Buxarada «Eń úlgili rayonlıq (qalalıq) Sárdarlar keńesi» tańlawınıń Ózbekstan Respublikalıq basqıshı ótkerildi. Bul haqqında ÓzA xabar bermekte.

Ózbekstan jaslar awqamı hám «Kamalak» balalar shólkeminiń rayonlıq hám qalalıq keńeslerindegi Sárdarlar keńesleri arasında shólkemlestirilgen tańlawda 14 komanda «Bul biziń jumıslarımız…», «Biziń imkaniyatlarımız», «Intellektual ring» shártleri boyınsha jeńimpazlıq ushın óz ara jarıstı.

Tańlaw juwmaǵına muwapıq, Buxara wálayatı Kogon qalasınıń «Eń, samıy, very» komandası 1-orın, Samarqand wálayatı Kattaqorǵan qalasınıń «Keleshek qurıwshıları» komandası 2-orın, Qaraqalpaqstan Respublikası Shımbay rayonınıń «Aydın keleshek» komandası 3-orındı iyeledi. Jeńimpazlar hám belsendi qatnasıwshılar diplom jáne estelik sawǵaları menen sıylıqlandı.

Tańlaw shártine muwapıq, jeńimpaz komanda tolıq quramda, ekinshi hám úshinshi orınlardı iyelegen komandalardıń wákilleri usı jıldıń may ayında Qashqadárya wálayatınıń «Lashın» dem alıw orayında ótkeriletuǵın «Kamalak» balalar shólkeminiń respublikalıq ánjumanında qatnasadı.

Qaraqalpaqstan xabar agentligi