Milliy baspasóz orayında Ministrler Kabineti janındaǵı Mámleketlik test orayı tárepinen baspasóz ánjumanı ótkerildi.
Onda Prezidentimizdiń 2017-jıl 16-noyabrdegi respublikamızdaǵı joqarı bilimlendiriw mákemeleriniń bakalavriatına kiriw test sınaqların ótkeriw tártibin jetilistiriw haqqındaǵı qararında belgilengen wazıypalardıń orınlanıwı tuwralı sóz boldı.
Qararǵa tiykarlanıp, joqarı bilimlendiriw orınlarına oqıwǵa kiriw ushın ótkeriletuǵın test sınaqları boyınsha úlken ózgerisler boldı. Bul ózgerisler boyınsha Mámleketlik test orayında basqa shólkemler menen birgelikte keń kólemli jumıslar alıp barıldı. Kompleksli ilajlar, olardı ámelge asırıw mexanizmleri islep shıǵıldı.
Keleshekte joqarı bilimlendiriw mákemelerine oqıwǵa kiriw ushın test sınaqları 15 kúnde, hár kúni eki smenada ótkeriledi. Kúnlik test tapsıratuǵın abiturientlerdiń sanı ortasha 57000-60000 dı quraydı. Test materialları kitap tipleri tiykarında tayarlanıp, bir tiptegi ilimler kompleksine sáykes keletuǵın bilimlendiriw baǵdarları boyınsha test sınaqları ótkerip barıladı.
Nátiyjelerdi test sınaǵı ótkerilgen kúnniń erteńine Mámleketlik test orayınıń rásmiy veb-saytında járiyalaw ushın juwaplar betin tez oqıytuǵın 2 dana «INSIGHT 150» optikalıq skaneri satıp alınbaqta. Bul boyınsha AQSh kompaniyası menen shártnama dúzildi. Qaraqalpaqstan Respublikası, wálayatlar hám Tashkent qalasında test sınaqların ótkeriw ushın úlken sıyımlılıqtaǵı pavilonlar, kóp orınlı imaratlar, kolledjlerdiń, shólkemlerdiń sıyımlılıǵı úlken imaratları úyrenip shıǵılıp, olardan jámi 57 imarat tańlap alındı. Olardıń eń kishisi 240, eń úlkeni 6150 orınlıq bolıp esaplanadı.
Bıyılǵı test sınaqlarına 2100 ge shamalas baqlawshı tartılıwı názerde tutılǵan. Olar ushın seminar shınıǵıwları ótkeriledi. Tańlap alınǵanlarǵa arnawlı sertifikatlar tapsırıladı.
Abiturient imaratqa shaxstı identifikaciyalaw quralı, videofiksaciya qurılmaları, metallodetektor arqalı kirgiziledi. Test procesi úzliksiz videobaqlaw astında ótedi. Házirgi kúnde imaratlardı jeterli muǵdarda stol-stul, jazıw taxtası (doskalar) jáne texnikalıq qurallar menen támiyinlew, ornatıw boyınsha dáslepki basqısh jumısları juwmaqlandı. Abiturientlerdiń ata-anaları test sınaǵı procesin turaqlı baqlap barıw imkaniyatına iye boladı.
Mámleketlik test orayındaǵı shtatlardıń sanı 150 ge kóbeytildi. Mákemede bas basqarma, basqarmalar menen bólimlerden ibarat jańa strukturalar ámelde boladı. MTOnıń Qaraqalpaqstan Respublikası, wálayatlardaǵı bólimlerine 35 shtat birligi ajıratıldı.
Ózbekstan Respublikası joqarı bilimlendiriw mákemeleriniń bakalavriatına oqıwǵa qabıllaw boyınsha test sınaqların ótkeriw tártibi haqqında Reje qayta islep shıǵılıp, Ministrler Kabinetiniń 2018-jıl 3-apreldegi tiyisli qararı menen tastıyıqlandı. Onda test sınaǵın ótkeriwge baylanıslı atamalarǵa túsinik berilgen. Auditoriya, auditoriya basshısı atamaları ushıraspaydı. Joqarı bilimlendiriw mákemesiniń qabıllaw komissiyası test sınaǵı proceslerinde qatnaspaydı, baslıq hám juwaplı xatker buǵan kirmeydi. Test sınaqları kúndizgi, arnawlı sırtqı hám keshki (smenalı) bilimlendiriw ushın hár jıldıń 1-avgustınan 15-avgustına shekemgi múddette kúnine eki smenada ótkeriledi. Birinshi smena saat 8:00 de, ekinshi smena 15:00 te baslanadı. Test sınaqları ótkeriletuǵın sáne hám waqıt Abiturienttiń ruqsatnamasında kórsetiledi. Ótkerilgen test sınaǵı boyınsha video jazıwlar Mámlkeketlik test orayında saqlanadı.
Sorawlar kitabında 3 pánnen test sınaǵı tapsırılatuǵın bilimlendiriw baǵdarları ushın 90, 2 pánnen test sınaǵı tapsırılatuǵın bilimlendiriw baǵdarları ushın 60, 1 pánnen 30 soraw boladı. Test tapsırmaların orınlaw hám juwaplar betine toltırıw ushın 30 test tapsırmasına 1 saat, 60 test tapsırmasına 2 saat, 90 test tapsırmasına 3 saat waqıt ajıratıladı. Test sınaǵı ótkerilmeytuǵın bilimlendiriw baǵdarları boyınsha ayrıqsha talant talap etiletuǵın bilimlendiriw baǵdarlarınıń dizimi qáliplestirildi hám tiyisli shólkemlerge tapsırıldı.
Baspasóz ánjumanında ǵalaba xabar quralları xızmetkerleriniń sorawlarına tolıq juwap berildi.
N.USMONOVA,
ÓzAnıń xabarshısı