Ózbekstan Respublikası Prezidentininiń mámleketlik másláhátshisi, Oliy Majlis Senatı aǵzası hám Ózbekstan jaslar awqamı Oraylıq Keńesiniń baslıǵı Qahramon Quranbaev Qaraqalpaqstan Respublikasındaǵı mekteplerde úlgili minez-qulqı hám oqıwda jaqsı bahalarǵa oqıp kiyatırǵan birneshe oqıwshılarǵa, olardıń ata-analarına hám mektep direktorlarına alǵısnama jolladı.
Usı jıldıń 5-6-aprel kúnleri Ózbekstan jaslar awqamı Nókis qalalıq Keńesi «Kamalak» balalar shólkemi baslıǵı Azamat Abibullaev paytaxtımızdaǵı 18-, 19-, 25- hám 27-sanlı ulıwma bilim beriw mektepleriniń oqıwshıları, olardıń ata-anaları hám mektep direktorlarına Prezident másláhátshisiniń jollaǵan alǵısnamaların saltanatlı túrde tapsırdı.
Sonday-aq, oqıwda jaqsı nátiyjelerge erise almay atırǵan oqıwshılarǵa isenim jarlıqları da tapsırıldı. Onda «Bileseń be, sende ele hesh kim bilmegen baslamashılıq, erteńgi kúnge degen isenim bar. Ózińdegi usı kúsh-jigerdi jaqsı jumıslarǵa sarpla!… Ustazlarıń, ata-anań, shańaraq aǵzalarıń, doslarıń hám Ózbekstan jaslar awqamı Saǵan isenedi!» dep jazılǵan.
– Keleshek iyeleri esaplanǵan oqıwshılarǵa bunday dárejedegi itibar tek ǵana biziń elimizde bar. Bul háreketlerimiz oqıwshılardıń dúnyaǵa belgili bolǵan ata-babalarımızdıń múnásip dawamshıları bolıp jetilisiwine, jarqın keleshegine tiykar jaratadı, olardı bárqulla izleniwde hám hárekette bolıwǵa úndeydi, – deydi Ózbekstan jaslar awqamı Nókis qalalıq Keńesi «Kamalak» balalar shólkemi baslıǵı Azamat Abibullaev.
Islam Matekov,
Qaraqalpaqstan xabar agentliginiń sholıwshısı.