2018-jıl 23-mart kúni Ózbekstan Respublikası Ministrler Kabinetiniń «Akademiyalıq liceylerge ulıwmalıq orta bilim beriw oqıwshıların saylap alıw, oqıwǵa qabıl etiw, olardıń oqıwın kóshiriw hám oqıwdan shetletiw tártibi haqqındaǵı ustavtı tastıyıqlaw haqqında»ǵı 212-sanlı qararı qabıl etildi.
Qararǵa muwapıq tastıyıqlanıp atırǵan Ustavqa tiykarlanıp, akademiyalıq liceyler jumısına baylanıslı birneshe jańalıqlar engizilmekte. Bul haqqında Kun.uz xabar bermekte.
Akademiyalıq licey pitkeriwshileriniń joqarı oqıw orınlarına oqıwǵa kiriw darejesi 80 procentten joqarı bolǵanda tiyisli joqarı oqıw orınları rektorları, akademiyalıq liceyler menen islesiw boyınsha tiyisli prorektorlar, akademiyalıq liceylerdiń direktorları, oqıwshıları joqarı nátiyje kórsetken baǵdarda oqıw sabaqların shólkemlestirgen barlıq professor-oqıtıwshılarǵa keyingi oqıw jılınıń 1-yanvarınan baslap oqıw jılı aqırına shekem olardıń miynet haqısına 50 procent muǵdarında ústeme haqı joqarı oqıw orınlarınıń arttırılǵan tólemli kontrakt túsimleriniń esabınan ámelge asırıladı.
Akademiyalıq licey pitkeriwshileriniń joqarı oqıw orınlarına oqıwǵa kiriw dárejesi:
– 70 procentten 80 procentke shekem bolǵanda bir aylıq lawazımlıq miynet haqısınıń 15 procenti muǵdarında;
– 60 procentten 70 procentke shekem bolǵanda bir aylıq lawazımlıq miynet haqısınıń 20 procenti muǵdarında;
– 50 procentten 60 procentke shekem bolǵanda bir aylıq lawazımlıq miynet haqısınıń 25 procenti muǵdarında;
– 50 procentke shekem bolǵanda bir aylıq lawazımlıq miynet haqısınıń 30 procenti muǵdarında bir mártelik járiyma qollanıladı.
Intizamlı járiymalar 2018-2019-oqıw jılı aqırınan baslap akademiyalıq licey pitkeriwshileriniń joqarı oqıw orınlarına oqıwǵa kiriw dárejesine muwapıq tiyisli joqarı oqıw orınları rektorları, akademiyalıq liceyler menen islesiw boyınsha tiyisli prorektorlar hám akademiyalıq liceylerdiń direktorları, oqıwshıları oqıwǵa kirmegen baǵdarda oqıw sabaqların shólkemlestirgen barlıq professor-oqıtıwshılarǵa (xızmet kórsetiwshi hám texnikalıq xızmetkerler buǵan kirmeydi) qollanıladı.
2017-2018-oqıw jılı aqırında akademiyalıq licey pitkeriwshileriniń joqarı oqıw orınlarına oqıwǵa kiriw dárejesi 50 procentten tómen bolǵanda tiyisli joqarı oqıw ornı rektorları, akademiyalıq liceyler menen islesiw boyınsha tiyisli prorektorlar hám akademiyalıq liceylerdiń direktorları, oqıwshıları oqıwǵa kirmegen baǵdarda oqıw sabaqların shólkemlestirgen barlıq professor-oqıtıwshılarǵa (xızmet kórsetiwshi hám texnikalıq xızmetkerler buǵan kirmeydi) bir aylıq lawazımlıq miynet haqısınıń 15 procenti muǵdarında bir mártelik járiyma qollanıladı.
Akademiyalıq licey pitkeriwshileriniń joqarı oqıw orınlarına oqıwǵa kiriw dárejesine muwapıq intizamlı jaza sharası qollanılǵan basshı xızmetkerlerge keyingi oqıw jılı dawamında miynet haqısına ústeme belgilewge jol qoyılmaydı.
Qaraqalpaqstan xabar agentligi