Qaraqalpaqstan boyınsha shet tilin biliw dárejesi haqqında mámleketlik úlgidegi B1 hám onnan joqarı dárejedegi sertifikatına iye bolǵan talabanlar anıq boldı.

Solardıń arasında inglis tili boyınsha eń joqarı ball toplaǵanlardıń biri Ayjamal Madiyarova házirgi waqıtta Tashkent informaciyalıq texnologiyalar universiteti Nókis filialı janındaǵı 3-sanlı akademiyalıq liceydiń pitkeriwshi kursında oqıydı. Bıyılǵı oqıw jılında Tashkent mámleketlik finans (qarjı) institutına oqıwǵa tapsırıw niyetinde.

Ayjamal Madiyarova

Al, Ayımgúl Xalıqnazarova bolsa, nemis tili boyınsha 112 ball toplap, B1 dárejedegi sertifikattı qolǵa kirgizdi. Ol da paytaxtımızdaǵı Tashkent informaciyalıq texnologiyalar universiteti Nókis filialı janındaǵı 3-sanlı akademiyalıq liceydiń 3-kurs studenti. Keleshekte Tashkent mámleketlik jáhán ekonomikası hám diplomatiyası universitetine hújjet tapsırmaqshı.


Ayımgul Xalıknazarova

Bıyılǵı jılı fevral ayınıń aqırlarında Nókis agroekonomika kásip-óner kolledjinde 71 talaban shet tilin biliw dárejesin anıqlaw sertifikatına iye bolıw ushın awızsha imtixandı tapsırǵan edi. Sonnan 35 i B1 dárejedegi sertifikatqa iye boldı. Endi Ayjamal hám Ayımgúl qatarı olar da joqarı oqıw orınlarınıń bakalavriatına kiriwde shet tili boyınsha ótkeriletuǵın test sınaǵınan azat etilip, usı pánnen belgilengen maksimal ballǵa iye boladı.

– Men usı sertifikat penen eń maksimal ball – 75,6 balldı qolǵa kirgizdim. Sebebi men tapsıratuǵın baǵdarda shet tili ekinshi blok páni sanaladı, – deydi Ayımgúl Xalıqnazarova. – Húkimetimizdiń usınday ádil ólshem jaratqanı biz ushın quwanıshlı, álbette. Házirgi kúnde basqa pánlerimdi jetik ózlestiriw háreketindemen.

Shet tilin biliw dárejesi haqqında mámleketlik úlgidegi A2, B1, B2 dárejesindegi sertifikattı alıwdı qálewshi talabanlarǵa qolaylıq jaratıw maqsetinde bıyılǵı jıldan baslap Qaraqalpaqstan Respublikasınan hújjet tapsırǵanlar Nókis qalasında imtixannan ótetuǵın boldı. Imtixannıń tıńlap túsiniw, oqıp túsiniw, leksikalıq hám grammatikalıq kompetenciya, jazıw kónlikpeleri, awızsha sınaqları 17-18-aprel kúnleri aralıǵında paytaxtımızda bolıp ótedi.

Esletip ótemiz, sertifikat alıw ushın eń maksimal – 150 ball bolıp, 90 balldan joqarısı muwapıq dep esaplanadı.

Qaraqalpaqstan xabar agentligi.