Rossiyanıń eń úlken elektron hám sanaat tárezilerin islep shıǵaratuǵın – Qubla Ural tárezi zavodı Ózbekstanda tárezi islep shıǵarıwdı jolǵa qoyıw niyetinde, dep jazadı Daryo.uz.
Rossiya kárxanası birinshi basqıshta 100 million rubl investiciya kirgizip, 150 tonna hám onnan aslam júklerge arnalǵan avtomobil hám temir jol vagonları ushın tárezi islep shıǵarıwdı rejelestirgen.
«Házirde biz sóylesiwlerdiń birinshi basqıshındamız, keleshektegi islep shıǵarıw ushın orın izlep atırmız. Bizde birneshe variant bar: erkin ekonomikalıq zonalardıń biri, Tashkent yamasa Samarqand. Bul óziniń kepserlew, tokarlıq hám jıynaw cexlarına iye bolǵan tolıq túrdegi Ózbekstan-Rossiya qospa kárxanası boladı. Biz bazarǵa joqarı sapaǵa iye hám básekige shıdamlı bolǵan ónim shıǵarıwǵa tayarmız», – deydi Qubla Ural tárezi zavodı direktorlar keńesiniń baslıǵı Sergey Potapov.
Maǵlıwmat ushın, házirgi waqıtta Rossiyanıń Ózbekstan ekonomikasına kirgizgen investiciyası 8,5 milliard rublden ótip ketti hám Ózbekstanda Rossiya investiciyası qatnasıwında 961 kárxana jumıs islemekte. Jıldıń aqırına shekem bul kárxanalar sanı mıńnan aslam bolıwı kútilmekte.
Qaraqalpaqstan xabar agentligi