Birden-bir salıq tólemin tólewshilerdiń jer salıǵın esaplaw hám tólew tártibi haqqındaǵı reje Ádillik ministrliginde mámleketlik dizimnen ótkerildi, dep xabar bermekte ministrliktiń «Huquqiy axborot» kanalı.
Rejege muwapıq, 2018-jıldıń 1-aprelinen baslap ulıwmalıq maydanı 1 gektardan artıq bolǵan jer maydanına iye bolǵan birden-bir salıq tólemin tólewshiler yuridikalıq shaxslardan alınatuǵın jer salıǵın tóleydi.
Tastıyıqlanǵan reje tómendegilerge engiziledi:
– jer uchastkasınıń bir bóleginde isbilermenlik penen shuǵıllanatuǵın hám birden-bir salıq tólemin tóleytuǵın kommerciyalıq emes shólkemler, eger isbilermenlik penen shuǵıllanıp atırǵan jer uchastkası bir gektardan artıq bolsa;
– awıl xojalıq ónimlerin islep shıǵarıw hám qayta islew menen baylanıslı bolmaǵan basqa jumıslar menen shuǵıllanatuǵın birden-bir jer salıǵın tóleytuǵınlar hám birden-bir salıq tólemin tóleytuǵınlar, eger awıl xojalıq ónimlerin islep shıǵarıw hám qayta islew menen baylanıslı bolmaǵan basqa jumıslarına tuwra keletuǵın jer maydanı 1 gektardan artıq bolsa.
Bunda jer uchastkalarınıń ulıwmalıq maydanı degende, jer uchastkasınıń salıqqa tartıw obekti sıpatında esaplanbaytuǵın jer uchastkaları maydanları shegirip taslanǵan jaǵdaydaǵı ulıwmalıq maydanı túsiniledi.
2018-jıldıń 1-aprelinen baslap jer uchastkasınıń ulıwmalıq maydanı 1 gektardan artıq bolǵan birden-bir salıq tólemin tóleytuǵınlarǵa:
– Birden-bir salıq tóleminiń eń kem muǵdarı kirgiziliwi múnásibeti menen birden-bir salıq tólemin esaplaw hám tólew tártibi haqqındaǵı reje;
– Birden-bir salıq tóleminiń eń kem muǵdarı kirgiziliwi múnásibeti menen usaqlap satıw boyınsha sawda kárxanaları tárepinen birden-bir salıq tólemin esaplaw hám tólew tártibi haqqındaǵı reje engizilmeydi.
Yuridikalıq shaxslardan alınatuǵın jer salıǵınıń stavkaları Ózbekstan Respublikası Prezidentiniń kelesi jıl ushın tiykarǵı makroekonomikalıq kórsetkishler prognozı hám Ózbekstan Respublikası Mámleketlik byudjeti parametrleri haqqındaǵı qararı tiykarında hár jılı tastıyıqlanadı.
Jer salıǵı hár bir salıq dáwiriniń 1-yanvar jaǵdayına bola esaplanadı.
2018-jıldıń 1-yanvar jaǵdayına esaplanǵan jer salıǵınıń esaplanıwı jer uchastkası jaylasqan jerdegi mámleketlik salıq xızmeti organına usı salıq dáwiriniń 10-mayına shekem usınıladı.
Salıqqa tartılatuǵın baza (salıqtıń esaplanǵan muǵdarı) salıq dáwirinde ózgerse, mámleketlik salıq xızmeti organına bir ay múddette anıqlastırılǵan jer salıǵınıń esaplanıwın usınadı.
Salıq dáwiri waqtında salıqqa tartılatuǵın baza 1 gektardan artıp ketse, yuridikalıq shaxslardan alınatuǵın jer salıǵı jer maydanına tiyisli huqıq payda bolǵan aydıń keyingi ayınan baslap esaplanadı.
Salıq dáwiri dawamında salıqqa tartılatuǵın baza 1 gektardan azaysa, yuridikalıq shaxslardan alınatuǵın jer salıǵı jer maydanına tiyisli huqıq payda bolǵan aydan baslap toqtatıladı.
Jer uchastkasınıń ulıwmalıq maydanı 1 gektardan artıq bolǵan birden-bir salıq tólemin tóleytuǵınlar tárepinen jer salıǵı tólemi hám aydıń 10-kúnine shekem jer salıǵı jıllıq summasınıń on ekiden bir bólegi muǵdarında ámelge asırıladı.
2018-jılı jer salıǵı tólemi aprel ayınan baslap ámelge asırıladı, bunda aprel ayı ushın tólem usı jıldıń 10-mayına shekem ámelge asırıladı.
Qaraqalpaqstan xabar agentligi