Paytaxtımızda Ózbekstan fermer, diyqan xojalıqları hám qıytaq jer iyleri keńesiniń Prezidium májilisi bolıp ótti. Onda keńestiń Prezidium aǵzaları – Qaraqalpaqstan Respublikası hám wálayatlıq keńesleriniń basshıları, tiyisli ministrlikler menen vedomstvolardıń basshıları qatnastı.

Májiliste Prezidentimiz Shavkat Mirziyoev tárepinen agrar tarawında ámelge asırılıp atırǵan reformalar fermer, diyqan xojalıqları hám qıytaq jer iyeleriniń huqıqıy hám nızamlı máplerin isenimli qorǵaw, sistemada bazar mexanizmlerin engiziw, kóp tarmaqlı fermer xojalıqların bunnan bılay da rawajlandırıw, awıl xojalıǵı ónimlerin islep shıǵarıw kólemin turaqlı arttırıp barıw jáne egislik jerlerden nátiyjeli paydalanıw, awıl xojalıǵı eginlerin, eksportqa qolaylı azıq-awqat ónimlerin jetistiriwde joqarı nátiyjeler berip atırǵanı atap ótildi.

Mámleketimiz basshısınıń 2017-jıl 9-oktyabrdegi «Fermer, diyqan xojalıqları hám qıytaq jer iyeleriniń huqıqları menen nızamlı máplerin qorǵaw, awıl xojalıǵı egislik jerlerinen nátiyjeli paydalanıw sistemasın túp-tiykarınan jetilistiriw ilajları haqqında»ǵı pármanı, 2017-jıl 10-oktyabrdegi «Fermer, diyqan xojalıqları hám qıytaq jer iyeleri jumısın bunnan bılay da rawajlandırıw boyınsha shólkemlestiriw ilajları haqqında»ǵı qararı bul baǵdarda áhmiyetli qollanba bolıp xızmet etpekte.

Keńestiń keleshektegi jumısında tarawdı jáne de reformalaw, awıl xojalıǵı egislik jerlerinen, sonıń ishinde, xalıqtıń qıytaq jerinen nátiyjeli paydalanıwdı támiyinlew, tarawǵa aldınǵı texnologiyalardı hám ilim jetiskenliklerin keńnen engiziw arqalı óndiris kólemin arttırıw sıyaqlı áhmiyetli wazıypalar belgilendi.

Májiliste shólkemlestiriw máselesi kórip shıǵıldı. Ózbekstan Fermer, diyqan xojalıqları hám qıytaq jer iyeleri keńesiniń baslıǵı Baxadır Yusupov basqa jumısqa ótiwi múnásibeti menen Ózbekstan Respublikası bántlik hám miynet qatnasıqları ministri lawazımında islep atırǵan Aktam Xaitov keńestiń baslıǵı wazıypasın atqarıwshı etip saylandı.

Májiliste Ózbekstan Respublikası Bas ministri A.Aripov shıǵıp sóyledi.

B.AYTMURODOV,

ÓzA nıń xabarshısı