Usı jıldıń 3-aprel kúni Ózbekstan Respublikası Ministrler Kabinetiniń «Ovosh-palız ónimleri, baǵshılıq hám júzimgershilik baǵdarındaǵı fermer xojalıqlarınıń jer maydanlarınan paydalanıwdıń nátiyjeliligin arttırıw ilajları haqqında»ǵı qararı qabıl etildi. Bul haqqında Ádillik ministrliginiń «Huquqiy axborot» kanalı málim etti.

Usı qararǵa muwapıq, jer sharayatı hám suw menen támiyinleniwi awır, tómen rentabelli, aqırǵı úsh jıldıń ishinde paxta ónimdarlıǵı 15 centnerden kem bolǵan 99371 gektar jer maydanlarında ovosh, palız, kartoshka, maylı hám dánli eginler egiliwi belgilendi.

Qaraqalpaqstan Respublikası Ministrler Keńesiniń Baslıǵı, wálayatlar hám rayonlardıń hákimleri usınday jer maydanlarına paxta hám biyday ónimlerin ekpew boyınsha qatań túrde eskertildi.

Kommerciyalıq bankler tárepinen fermer xojalıqların avanslıq qarjılar menen támiyinlew ushın qayta islew, tayarlaw hám eksportyor kárxanalarǵa, sonday-aq, ovosh, palız, kartoshka, maylı hám dánli eginlerdi jetistiriw ushın fermer xojalıqlarına ajıratılatuǵın kommerciyalıq kreditler procentlik stavkalarınıń bes procenti Isbilermendik jumısların rawajlandırıwdı qollap-quwatlaw mámleketlik qorı tárepinen tólep beriledi.

Ekonomika ministrligine miywe-ovosh, júzim, palız hám dánli ónimlerdiń túrleri boyınsha jetistiriwdiń ózine túser bahasınan kelip shıǵıp, ónim jetistiriwshilerdiń rentabelligin esapqa alǵan halda usı ónimlerdiń satılıwı ushın ortasha usınıs etilgen bahalardı islep shıǵıw tapsırılıp, usı ónimlerdiń bahası satıp alıw waqtındaǵı bazar qunlılıǵınan kelip shıǵa otırıp ózgertiliwi múmkinligi belgilendi.

Qaraqalpaqstan xabar agentligi