Usı jıl 17-mart kúni paytaxtımızdaǵı Jaslar orayında «Jaslar keleshek dóretiwshileri!» súreni astında ótkeriletuǵın «Jaslar festivalı»n shólkemlestiriw hám «Mard uǵlon» sıylıǵı máselelerine baǵıshlanǵan «Jaslar Press klubı»nıń jurnalistler qatnasıwındaǵı 4-sessiyası bolıp ótti.
Sessiyada Ózbekstan Jaslar awqamı Milliy Keńesiniń Mámleketlik sıylıqlarǵa talabanlar menen islesiw bóliminiń baslıǵı B.Mamadaliev, Ózbekstan Respublikası Jaslar awqamı Qaraqalpaqstan Respublikası Keńesiniń baslıǵı A.Dániyarov hám basqalar shıǵıp sóylep, Ózbekstan Respublikası Jaslar máseleleri boyınsha respublikalıq mákemeleraralıq Keńesi májilisiniń 2018-jıl 9-fevraldaǵı bayanlamasında hám oǵan tiykarlanıp shıǵarılǵan hújjetlerde belgilengen jumıslarǵa keńnen toqtap ótti.
Atap ótilgenindey, Ózbekstan Respublikası Prezidentiniń 2017-jıl 21-noyabrdegi «Mard uǵlon» Mámleketlik sıylıǵın engiziw ilajları haqqında»ǵı qararı shıǵıp, onıń orınlanıwın támiyinlew maqsetinde bir qatar ilajlar ótkerilgen.
Festivaldıń shólkemlestiriw komiteti hám festivallardı shólkemlestiriw boyınsha jol kartası tastıyıqlandı.
Belgilengen tapsırmalardıń orınlanıwın támiyinlew maqsetinde festival sheńberinde ótkeriletuǵın «Jas qosıq atqarıwshıları», «Jaslar sazlı ansamblleri hám orkestrleri» hám «Studentler teatrı» studiyaları atamasındaǵı ilajlardıń birinshi basqıshı usı jıldıń 1-20-mart kúnleri ótkeriliwi belgilengen bolıp, búgingi kúnge shekem 5800 jastıń usı ilajlarǵa qatnasıwı bildirilgen múrájatları qabıl etilgen. Sonday-aq, 350 den aslam bilimlendiriw mákemelerinde festivaldıń birinshi basqıshları juwmaqlanǵan.
Press-klubta qatnasıwshılar ózlerin qızıqtırǵan sorawlarǵa juwap aldı.
Qaraqalpaqstan xabar agentligi.