Ózbekstan Qurallı Kúshleri 2018-jılı dúnyanıń eń kúshli armiyaları reytinginde 9 tekshe joqarılap, 39-orındı iyeledi, dep xabar bermekte Daryo.uz saytı.

Global Firepower tárepinen dúzilgen reytingde 136 mámlekettiń qurallı kúshleri qatnasqan. Bul mámleketlerdiń qurallı kúshleri 50 den aslam kórsetkishlerine qaray baha berilgen. Atap aytqanda, qurǵaqlıqtaǵı áskeriy kúshlerdiń dárejesi, áskeriy hawa kúshleriniń darejesi, teńiz kúshleriniń qúdireti, áskeriy texnika hám áskeriy xızmetke minnetli xalıqtıń sanı, áskeriy sektordıń qarjılandırılıwı, mámlekette janar may dárekleriniń bolıwı, transport infrastrukturasınıń rawajlanǵanlıǵı hám basqa kórsetkishler.

Atap kórsetiliwinshe, búgingi kúnde Ózbekstan Qurallı Kúshleriniń ıqtıyarında 420 tank, 179 samolyot, 715 áskeriy mashina, 143 ózi háreketlenetuǵın top, 880 top hám 109 jalpılamay oq atıw quralları bar.

ǴMDA elleri arasında Ózbekstan qurallı kúshleri Rossiya hám Ukrainadan keyingi úshinshi orındı iyelep tur. Belarus – 41, Qazaqstan – 50, Ázerbayjan – 53-orınlardı iyelegen.

Reytingniń eń joqarı tekshesinde AQSh (1), Rossiya (2), Qıtay (3), Hindstan (4), Franciya (5), Britaniya (6), Qubla Koreya (7), Yaponiya (8), Turkiya (9), Germaniya (10) hám basqa mámleketler jaylasqan.

Qaraqalpaqstan xabar agentligi