Qaraqalpaqstan Respublikası Ministrler Keńesi jámiyetlik hám diniy shólkemler menen baylanıslar boyınsha sekretariatı bergen maǵlıwmatqa muwapıq usı jıl báhárgi umra máwsiminde (27-fevral – 7-mart) Qaraqalpaqstannan 55 puqaranıń saparı ámelge asırılǵan. Xosh, gezektegi Ramazan umra máwsimin shólkemlestiriw boyınsha Ministrler Keńesinde qanday ilajlar ámelge asırılmaqta.
Bul tuwralı sekretariat baslıǵı B.Aymbetov tómendegishe málimleme beredi, dep jazadı Ministrler Keńesiniń málimleme xızmeti.
– Gezektegi “Umra – 2018” ilajların shólkemlestiriw hám ótkeriw máseleleri boyınsha Jámiyetshilik keńesiniń májilisinde umra máwsimi topar basshıları menen sapar aldınan oqıw–ámeliy sabaqların shólkemlestiriw belgilep qoyılǵan.
Usı múnásibet penen usı jıldıń 9-10-may kúnleri Tashkent qalasındaǵı “Shayx Zayniddin” meshitiniń májilisler zalında 2018-jılǵı Ramazan umra máwsimin úlgili shólkemlestiriw maqsetinde umra Ramazan máwsiminde ziyaratshılarǵa xızmet kórsetiw ushın tastıyıqlanǵan topar (eliwbası) basshılarınıń sapar aldınan oqıw sabaqları shólkemlestiriledi.
Oqıw sabaqlarında topar basshıları ziyarat dawamında ámel etiw zárúr bolǵan tártip-qaǵıydalar menen tanıstırıladı.
Bul ilajǵa Qaraqalpaqstan Respublikasınan (eliwbası) Xojeli rayonınıń imam-kátibi A.Allaniyazov qatnasadı. Gezektegi Ramazan ayında shólkemlestirilip atırǵan usı ziyaratqa bolsa, respublikamızdan 18 puqaranıń barıp keliwi belgilengen.
Házirgi waqıtta Qaraqalpaqstan Respublikası “Haj” hám “Umra” ilajların shólkemlestiriw hám ótkeriw máseleleri boyınsha kollegiyası tárepinen shólkemlestiriw jumısları dawam etpekte.
Qaraqalpaqstan xabar agentligi