Usı jıl 23-aprel kúni Respublikamızǵa xalıqqa kardiologiyalıq xızmet kórsetiwdi jaqsılaw hám usı baǵdardaǵı jumıslardı sistemalı túrde úyreniw maqsetinde Tashkent qalasınan usı tarawdaǵı bir topar qánigeler keldi. Olar usı kúni Respublikalıq kardiologiya orayı, qalalıq, rayonlıq medicina birlespeleriniń bas shıpakerleri, kardiologiya hám ulıwma ámeliyat shıpakerleriniń qatnasında seminar ótkerdi.

– AQShta, Evropa ellerinde xalıqtı medicinalıq tekseriwlerde hár qıylı júrek keselliklerine shalınǵan puqaralardı anıqlaw 30 procentten joqarı, al bizde bolsa 3,7 procentti quraydı. Sonlıqtan, usı keselliktiń awır túrlerine shalınǵan puqaralardıń 59 procenti waqtında emlene almaǵanı ushın qaytıs bolmaqta. Biz orınlarda xalıqtı medicinalıq tekseriwlerden ótkerip, kesellikti erte anıqlasaq, asqınıwınıń aldın alsaq, xalıqqa sapalı xızmet kórsetken bolamız. Puqaralar da óz gezeginde keselliktiń qan basımı artıwı sıyaqlı ápiwayı kórinislerine de biypárwa bolmay óz waqtında densawlıǵına qarap, tez-tezden kórinip tursa maqsetke muwapıq bolar edi. Sebebi, keselliktiń asqınıwı sebepli adam insult bolsa, bul tikkeley ólimge alıp keledi. Infarkt yamasa basqa da jaǵdayǵa ushıraǵanda da onı jaqsı dep bolmaydı,-deydi medicina ilimleriniń doktorı Gúlnaza Hamidullaeva.

Málim bolıwınsha, Respublikamız boyınsha ótken jıl dawamında hár qıylı júrek kesellikleri menen nawqaslanǵan 20 mıńnan aslam puqara emlenip shıqqan. Topar aǵzaları 28-aprelge shekem respublikamızda bolıp, qala hám rayonlardaǵı medicina birlespelerinde xalıqtı qabıllap, medicinalıq tekseriwlerden ótkeredi.


Á.Jiemuratov,

Qaraqalpaqstan xabar agentliginiń xabarshısı.