«Ózbekstan Respublikasınıń ayrım nızam hújjetlerine ózgeris hám qosımshalar kirgiziw haqqında»ǵı Nızam tiykarında «Jurnalistlik xızmetti qorǵaw haqqında»ǵı Nızamnıń 9 statyasına ózgeris hám qosımshalar kirgizildi. Nızam 7-1-statya menen tolıqtırıldı. Sonday-aq, 16-statyada kórsetilgen normalar nızamnıń 2-statyasına kóshirilgeni sebepli alıp taslandı. Bul haqqında «Inson va qonun» saytı xabar bermekte.

Nızamnıń 15-statyasında jurnalisttiń juwapkershiligi máselesi sáwlelengen bolıp, atap aytqanda, nızamnıń ekinshi bóliminde qanday jaǵdaylarda jurnalist juwapker bolmaytuǵınlıǵı boyınsha norma belgilengen.

«Jurnalist ǵalaba xabar qurallarında haqıyqatqa sáykes kelmeytuǵın materiallardı tarqatqanı ushın tómendegi jaǵdaylarda juwapker bolmaydı:

– eger bul maǵlıwmatlar rásmiy xabarlardan, huqıqıy-normativlik hújjetlerden yamasa rásmiy statistikalıq esaplardaǵı maǵlıwmatlardan yamasa málimleme agentlikleri yaki mámleketlik hákimiyat jáne basqarıw organlarınıń baspasóz xızmetleri arqalı, sonday-aq, olardıń rásmiy veb-saytlarınan alınǵan bolsa;

– eger bul maǵlıwmatlar aldın ala jazıp alınbastan efirge beriletuǵın avtorlıq shıǵıwlarda bolsa yamasa shıǵıp sóylewlerdiń sózbe-sóz tákirarlanıwı (stenografiya, audio-, videojazıwı) bolsa».

Islam Matekov,

Qaraqalpaqstan xabar agentliginiń sholıwshısı.