«Ózbekstan Respublikasınıń ayrım nızam hújjetlerine ózgeris hám qosımshalar kirgiziw haqqında»ǵı Nızam tiykarında «Jurnalistlik xızmetti qorǵaw haqqında»ǵı Nızamnıń 9 statyasına ózgeris hám qosımshalar kirgizildi. Nızam 7-1-statya menen tolıqtırıldı. Sonday-aq, 16-statyada kórsetilgen normalar nızamnıń 2-statyasına kóshirilgeni sebepli alıp taslandı. Bul haqqında «Inson va qonun» saytı xabar bermekte.
Nızam tiykarında, jurnalistlerdiń huqıqları sheńberi «mámleketlik organlardıń ashıq jıynalıslarında hám ǵalabalıq ilajlarında qatnasıwı» bánti menen tolıqtırıldı.
Jurnalistlerdiń minnetlemelerine bolsa «Jurnalistlik sırdı áshkaralamawı, jurnalistlerdiń kásipke baylanıslı etikalıq qaǵıydalarına ámel etiwi» sıyaqlı bántler kirgizildi.
Nızam jurnalistlerdiń kásipke baylanıslı qaǵıydalarına arnalǵan 7-1-statya menen tolıqtırıldı.
Oǵan muwapıq, «Jurnalistlerdiń kásipke baylanıslı etikalıq qaǵıydaları jurnalisttiń shaxsına hám óz kásibine baylanıslı wazıypalardı atqarıw waqtında onıń minez-qulqına qoyılatuǵın talaplardı belgileytuǵın qaǵıydalar kompleksinen ibarat. Jurnalistlerdiń kásipke baylanıslı bolǵan etikalıq qaǵıydaları jurnalistlerdiń hám ǵalaba xabar qurallarınıń birlespeleri tárepinen belgilenedi».
Islam Matekov,
Qaraqalpaqstan xabar agentliginiń sholıwshısı.