Qıtay Xalıq Respublikasınıń «Tiandzin Tyan Syan» juwapkershiligi sheklengen jámiyetiniń, Xeylundziansk balıqshılıq ilimiy-izertlew institutınıń bir topar qánigeleri usı jıl may ayınıń basında respublikamızda bolıp, Nókis qalasında hám Tórtkúl rayonlarında ózleriniń aldıńǵı is tájiriybeleri menen ortaqlasadı.
Bul ilaj «Qaraqalpaqbalıqsanaat» hám Qıtaydıń «Tiandzin Tyan Syan» juwapkershiligi sheklengen jámiyetleri arasında dúzilgen memorandum sheńberinde ótkeriledi. Atap aytqanda, qıtaylı qánigeler Nókis qalasında hám Tórtkúl rayonında respublikamızdaǵı balıqshılıqqa qánigelestirilgen kárxanalar, fermer xojalıqlarınıń wákillerine master klass ótkeredi.
-«Ózbekstan Respublikası delegaciyasınıń 2017-jıl avgust ayında Indoneziya Respublikasına saparı dawamında erisilgen kelisimler hám qol qoyılǵan hújjetlerdiń orınlanıwın támiyinlew jáne eki tárepleme birge islesiwdi rawajlandırıw boyınsha» ilajlar rejesine («Jol kartasına») muwapıq, ótken jıldıń noyabr-dekabr aylarında Qıtay Xalıq Respublikasınıń Pekin qalasında, Usi, Chendu, Xarbin wálayatlarında bolıp, balıq órshitiw, onı intensiv usılda ósiriw, inkubaciya cexlarınıń jumısların jolǵa qoyıw, balıqtıń Amur osyotrı hám basqa da túrlerin kóbeytiw boyınsha aldıńǵı tájiriybeleri menen tanısıp qayttıq,-deydi «Qaraqalpaqbalıqsanaat» juwapkershiligi sheklengen jámiyetiniń baslıǵı Abat Bekniyazov.-Usı sapar etiw sheńberinde balıqshılıqta dúnyaǵa belgili «Tiandzin Tyan Syan» juwapkershiligi sheklengen jámiyetiniń baslıǵı Miao Jzienfa menen úsh jıllıq memorandumǵa qol qoyısıwǵa eristik.
Esletip ótemiz, Ózbekistan Respublikası Prezidentiniń 2017-jıl 1-maydaǵı «Balıqshılıq tarmaǵın basqarıw sistemasın jetilistiriw ilajları haqqında»ǵı qararına muwapıq shólkemlestirilgen «Qaraqalpaqbalıqsanaat» juwapkershiligi sheklengen jámiyetiniń tiykarǵı wazıypası hám baǵdarı respublikamızda balıq ónimlerin islep shıǵarıwdıń shólkemlestiriwshilik-texnologiyalıq processlerin sistemalı shólkemlestiriw, balıq shabaqların tákirar kóbeytiw hám onıń azıqlıq bazasın bekkemlew, tábiyǵıy suw saqlaǵıshlardıń hám jasalma kóllerdiń resurslarınan aqılǵa uǵras paydalanıw, sonday-aq, balıq jetistiriw procesine ilimiy tiykarlanǵan usıllar menen intensiv texnologiyalardı engiziw bolıp tabıladı.
D.ABIBULLAEV,
Qaraqalpaqstan xabar agentliginiń xabarshısı.